Qyzylorda oblysy ákiminiń qoldaýymen Syr aımaǵyndaǵy ulttyq muraǵat qoryna jatatyn qujattar elektrondy muraǵatqa kóshirilmek. Oblystyq muraǵat qoryndaǵy qujattardy sandyq úlgige kóshirý maqsatynda jergilikti bıýdjetten 32 mln. 974 myń teńge qarjy qaralyp, osy baǵdarlamamen jumys jasaıtyn aqparattyq tehnologııalar bólimi úshin 4 shtattyq birlik berilgen.
Syr aımaǵyndaǵy muraǵattar qorlaryndaǵy qujattardy sandyq úlgige kóshirýge baılanysty bólingen qarjyǵa sáıkes tender jarııalanyp, nátıjesinde “Letograf IT Konsaltıng Qazaqstan qyzmeti” JShS jeńimpaz bolyp tanylady.
Letograf júıesiniń ereksheligi – baǵdarlamalyq kodqa ózgeris engizýdi talap etpeıdi, qajettiligine qaraı qyzmetin ózgertýge bolady,-deıdi “Letograf IT Konsaltıng Qazaqstan qyzmeti” JShS dırektorynyń orynbasary M.Prokopeva.
Búginde elektrondy muraǵat úshin arnaıy avtomattandyrylǵan baǵdarlamany ornatýǵa Reseıdiń Máskeý qalasy men Almatydan arnaıy atbasyn burǵan mamandar shuǵyl kirisip te ketti.
Erkin ÁBIL. Qyzylorda.
* * *
60 qol arba syılady
Oblys ortalyǵyndaǵy “Baqyt baǵanasy” eskertkishiniń alańynda “Birligimiz jarasqan!” respýblıkalyq aksııasy aıasynda aqtóbelikter aıta júretindeı ádemi shara ótti. Sharaǵa qatysqan Densaýlyq saqtaý mınıstrligi janyndaǵy “Densaýlyq saqtaý ınvestısııalyq jobalaryn basqarý ortalyǵy”JShS-niń bas menedjeri Arynǵazy Berkimbaev óziniń qarjysy esebinen 60 múgedek adamǵa qolarba syılady. Aqtóbe qalasy ákiminiń orynbasary Sánııa Qaldyǵulova jergilikti bıliktiń múmkindigi shekteýli múgedek jandarǵa qaıyrymdylyq jasaý maqsatynda uıymdarmen, kásiporyndarmen, kásipkerlermen birlese jumys jasap otyrǵanyn jetkizdi. Atymtaı jomarttyq tanytqan azamat Arynǵazy Berkimbaev qala ákimdigimen aqyldasa kelip, múmkindigi shekteýli jandarǵa qaıyrymdylyq kómek kórsetýdi sheshkenin, munyń aqtóbelikterge degen az ǵana qoldaýy ekenin aıtty. О́z kezeginde sóz alǵan oblystyq múgedekter uıymynyń tóraǵasy Fedor Chemodanov pen sal aýrýlaryna shaldyqqan azamattardy qorǵaý qoǵamynyń tóraıymy Quralaı Báımenova oǵan qaıyrymdylyq kómegi úshin rızashylyq bildirdi. Satybaldy SÁÝIRBAI. Aqtóbe oblysy.
