Elbasy týrnıri esik ashady

Búgin Astanadaǵy “Qazaqstan” sport kesheninde bastalatyn Qazaqstan Respýblıkasy Prezıdenti kýbogy úshin týrnır otandyq hokkeı tarıhyndaǵy osy tektegi birinshi jarys bolǵaly tur. Bul sonymen birge TMD elderi úzdik jasaqtarynyń basyn qosyp otyrǵan Kontınentaldy hokkeı lıgasy deńgeıinde de mundaı alǵashqy alaman bolyp tabylady. Budan buryn habardar etkeni­miz­deı, atalmysh týrnırge tórt elden tórt úzdik komanda qatysady. Olardyń qatarynda Qazaqstan atynan túsetin Astananyń “Barysynan” bólek, Latvııa men Belarýsten Rıga men Mınskiniń “Dınamo” komanda­lary, Reseıden Máskeý oblysy­nyń “Atlant” klýby bar. Osydan bastap bul týrnır jyl saıyn ótip turatyn dástúrli saıysqa aınalady. Keleshekte oǵan qatysatyn komandalardyń sany arttyryla túspek. Osyndaı bir týrnır ótkizý jónindegi ıdeıany basynda “Nur Otan” halyqtyq-demokratııalyq partııasy kóterdi. Bul bastamany sosyn Qazaqstan shaıbaly hokkeı federasııasy qoldap áketti. Al aqparattyq seriktestik mindetin “Nur-Medıa” medıaholdıngi ózine júktep aldy. Týrnır tamyzdyń 10-14 ara­lyǵynda ótedi. Munda komanda­lar kún saıyn bir-bir oıynnan oınaıdy. Osy jolǵy sııaqty aldaǵy jyldarda da Prezıdent kýbogy kezekti turaqty chempıo­­nattar aldyndaǵy klýbtardyń óz shama-sharyqtaryn baıqap kóre­tin syndarly synaǵyna aınal­maqshy. Bul bıyl KHL chem­pıonatyna qatysatyn joǵary­daǵy tórt klýb úshin aıryqsha paıdaly bolmaq. Týrnırge olardyń bári kúshti quramdarymen kelip otyr. – Men Prezıdent kýbogy oǵan qatysýshylar úshin óz kúshterin synap kórip, oıyn­shylardy turaqty chempıonat aldynda “terletip” alýdyń jap-jaqsy joly bolady dep oılaımyn, – deıdi osy oraıda Qazaqstan hokkeı federasııa­synyń vıse-prezıdenti Iýrıı Zverev. – Tarıhta tuńǵysh ótkeli turǵan týrnırge de kil saıdyń tasyndaı, kúshi bir deńgeıdegi komandalar jınalyp otyr. Bizdiń shaqyrýymyzdy dınamolyq klýbtar men “Atlant” komandasy qýana qabyldady. Bul týrnır, sóz joq, osy oıynnyń bizdiń elde bedeli bıikteı berýine áser etedi. “Barys” klýbynyń KHL chempıonatynda oınaýy bizdiń elimizde hokkeıdiń keńinen tarala bastaýyna birden-bir sebepker ekenin de batyl aıta alamyn. Sonymen, jankúıer qaýym kópten kútken týrnır de bastaldy. Endi sóz sońynda týrnırdiń kúntizbesin nazarlaryńyzǵa usynamyz. 10 tamyz, seısenbi. 15.00. “Dınamo” R. – “Dınamo” Mn. 19.00. “Barys” - “Atlant”. 11 tamyz, sársenbi. 15.00. “Atlant” - “Dınamo” Mn. 19.00. “Barys” - “Dınamo” R. 13 tamyz, juma. 15.00. “Atlant” - “Dınamo” R. 19.00. “Barys” -“Dınamo” Mn. 14 tamyz, senbi. 13.00. 3-4 oryndar úshin. 17.00. 1-2 oryndar úshin. Serik PIRNAZAR.