Ákesin satqan qyz

Bul oqıǵanyń shet jaǵasyn Qaraǵandy qalalyq múgedekter qoǵamy basqarmasynyń tóraǵasy Mansur Trıgýlovtan estigen edik. Aıtýyn­sha ákeli-balaly Buzymovtar arasyn­daǵy kıkiljiń úshinshi jylǵa aınalyp barady eken. Áýelde qyzy ótinishine peıil tanytyp, kózi tirisinde aqyrǵy jaqsylyǵyn jasap qalýǵa nıettengen áke endi eriksizden sotqa júginýden júıkesi ábden juqarǵan kúıge túsipti. Onsyz da aýrý-syrqaýly adamǵa basqa-basqa, týǵan muń­lyǵynyń alaıaqtyq áreketi janǵa batyp, júrek talmasyna shaldyqqan. Buǵan deıin esik aldyna kirip-shyǵyp júretin, kórshilerimen áńgimege aralasatyn aqsaqal qazir kúrmelgen tilinen aıyq­paǵan qalpy ázer sóz qatady. Qyzy she?! Eki jyl buryn jalǵyzilikti ákesiniń páterine azamattyq nekedegi kúıeýi Nur­lan Sádenovti ertip kelip, “Bul páter satyl­ǵan. Erteńnen bastap bosatyńyz” dep dúrlik­tirip ketkennen beri qarttyń sol ámirdi esti­megen, yzǵarly júzderdi kórmegen kúni az. Al ózi kórinbeıdi. Áldebireýler arqyly úrkitip, úreılendirip maza bermeıdi. Sonymen bul ne jaı desek, joǵaryda atalǵandaı, qazirgi ýaqytta azamattar arasynda jıi ushyrasýǵa aınalǵan páter talasy. Talas bolǵanda bóten jandar emes, áke men qyz tartysy. Qaıyr Buzymov uzaq jyl shahtada eńbek etken kisi. Densaýlyǵyna baılanysty III toptaǵy múgedektikpen erte zeınetkerlikke shyqqan. Taǵdyr Qaırekeńdi az synamaı keledi. О́zin qoıshy, úsh balasyn tastap ketken áıeliniń satqyndyǵy birinshi soqqy boldy. Sheshe ornyna sheshe bolyp úsheýin jetildirdi. Solardyń kishisi Álııa edi. Erkelikpen erte eseıip, quda túsýsiz, uzatylý yrymynsyz, azamattyq neke degen jolmen bireýge jabysqan qyzy kúnderdiń kúninde ózi turatyn eki bólmeli páterdi ósıet etip qal­dyrý­ǵa qyńqyldaı bastaıdy. Qulaq eti jeline bergen soń aqyrynda ótinishine áke ózegi jibimeı qal­maıdy. Álııanyń kút­keni de sol eken. Buǵan deıin aralasyp-qura­lasyp kórmegen kúıeý balasy da sap etip, ekeýi mápe­lep máshınege min­gizip notarıýsqa ala jóne­ledi. Qalanyń Prıshahtınsk atala­tyn bóli­ginde turatyn qartty úıi irgesindegi nota­rıýs­tyq keńselerdiń birine aparýǵa da bolatyn. Biraq olar muny kerek qylmaı shahar­dyń qıyr sheti Ońtústik-Shyǵys aıma­ǵyna tarta­dy. Ánsheıinde kezek arylmaıtyn notarıýs aldy sol kúni bos bola qalady. Qyzy men kúıeý balasy dereý ishke enip ketip, áldende qaıta shyǵyp “Papa myna qaǵazdarǵa qol qoısańyz boldy. О́sıetińiz kepilden­dirildi” dep Álııasy kelip qushaqtaǵanda onda ne jazyl­ǵanyna kóz júgirtpeı qol qoıyp jiberýi túbinde pálege uryndyratynyn sonda qalaı oılasyn. Qyzynyń qýanyshty júzinen, “Papalaǵan” erke daýsynan artyq ákege qan­daı shattyq bar deseńshi. Oıynda eshteńe joq , qaǵaz betine qaramaı-aq qol qoıǵany esinde. Álııa Buzymova qýlyǵynyń beti endi ashylyp jatqandaı bul satyp alý sharty bolyp shyǵady. Ol boıynsha páter 3 mıllıon 610 myń teńgege satylypty-mys. Al odan keıingi jylmaqaılyq jyldam. Jıyrmany jańa ortalaǵan Álııanyń jylpostyqty qashan úırenip úlgergenin kim bilsin, páterdi ile-shala búgin bar, erteń joq kúıeýiniń sheshesi Dámetken Sádenovaǵa 1 mıllıon teńgege satyp jiberedi. Jańaarqa aýdanynyń Jeńis aýylyndaǵy mektepte sabaq beretin satyp alýshynyń kelini men ulynyń osynaý áreketterinen beıhabar deý qıyn. Naqty ıesi syrtynan qaqpaqylǵa salyn­ǵan páterdi budan soń D.Sádenova qaryzy qaı­tarymy úshin K.Nuryshev degen azamatqa aýys­tyrady. Búginde ol da daýǵa aralasyp jatyr. Qulaǵy ázer estıtin, kózi nashar kóretin, bir bassa eki entigetin qartqa sóıtip ákireń­deý­shiler kóp. Bar úmiti sotta. Áıtkenmen qyzy­nyń aldap qol qoıdyrǵanyna sot ılana ma, ılanbaı ma, sodan ımenedi. О́kinishke qaraı, aıǵaǵy ne dáleli joq. “Qyzym-aý, shyndyqty aıtsańshy. Tórimnen kórim jaqyn qalǵanda bul ne qorlyǵyń. Bárin keshireıin tek ıne ushyna tirelgen ómirime tynysh­tyq bershi” degisi kelse Álııasy taptyr­maıdy. Náreste kezinen baýyryna basqan ájesi qaıtys bolǵanda kóńil aıtýǵa kelip qalar degen oıy da úzildi. Aıtqandaıyn Álııa Buzymovanyń bul birinshi alaıaqtyǵy emes ekeni belgili bolýda. Ákesin aıamaǵan qyz ózgeni qaıtsin. Munyń al­dynda taǵy da bir týysqanyn san soqtyrypty. QARAǴANDY.