Onda: “Qazaqstan Respýblıkasy halqynyń atynan jáne jeke óz atymnan Sizdi Dúnıejúzilik Islam Lıgasynyń qurylǵanyna 50 jyl tolý mereıtoıymen shyn júrekten quttyqtaımyn. Qoǵamnyń rýhanı qundylyqtaryn, sondaı-aq konfessııaaralyq tatýlyq pen kelisimdi nyǵaıtýǵa baǵyttalǵan Sizdiń eńbegińiz ben kúsh-jigerińiz qazaqstandyq qoǵamda keńinen tanymal. Sizdiń basshylyǵyńyzdaǵy Dúnıejúzilik Islam Lıgasy kórsetken qoldaýdyń nátıjesinde Qazaqstan bastamasy – Álemdik jáne dástúrli dinder lıderleriniń sezi búgingi tańda dinaralyq kelisim úrdisin damytý máseleleri boıynsha syndarly pikir almasýǵa múmkindik beretin tuǵyrnama retinde qalyptasty jáne álemdegi túrli konfessııalar ókilderiniń basyn qosatyn tıimdi quraldardyń birine aınaldy. Osy múmkindikke oraı Sezdiń alǵa qoıǵan maqsattary men mindetterin júzege asyrý jolynda qosyp otyrǵan qomaqty úlesińiz úshin Sizge jáne Dúnıejúzilik Islam Lıgasyna shynaıy alǵysymdy bildirgim keledi.
2011 jyly Astanada “TMD elderindegi ıslam dininiń búgingi jaǵdaıy” taqyrybynda halyqaralyq ıslam konferensııasyn Sizdiń qoldaýyńyzben ótkizýdi mańyzdy dep sanaımyn. Jaratqan Iemizden Sizge uzaq ǵumyr, zor densaýlyq, ıslam jolyndaǵy ıgi isterińiz ben bastamalaryńyzǵa sáttilik bersin dep tileımin. Búkil musylman qaýymyna Alla taǵala nuryn jaýdyryp, bereke-birligin arttyra bersin” delingen. Konferensııaǵa Azııa, Afrıka, Eýropa, Latyn Amerıkasy, AQSh elderiniń memleket jáne din qaıratkerleri hám ǵalymdary da qatysty. Onyń jumysy eldiń Koroli Abdýlla bın Abd ál-Ázızdiń qoldap, quttyqtaýymen, premer-mınıstrdiń orynbasary, koroldiktiń ishki ister mınıstri Naıf bın Ábd ál-Ázızdiń qatysyp sóz sóıleýimen jalǵasty. Bas múftıdi arnaıy qabyldaý kezinde doktor Abdýlla bın Abd ál-Mýhsın at-Túrkı jahandyq bedeldi mekemeniń 50 jyldyq toıymen quttyqtaǵany úshin Qazaqstan Elbasyna rızashylyq bildirip, álemge áıgili úlken memleket qaıratkeriniń ýaqyt bólip, Lıgaǵa izgi tilek bildirgenine alǵys bildire kele, N.Á.Nazarbaevqa rahmet aıtyp arnaıy hat jiberetinin málimdedi.
Saýd eli Qazaqstannyń bıyl EQYU sekildi halyqaralyq bedeldi uıym jáne kelesi jyly IKU-ǵa tóraǵa bolatynyn, Qazaqstannyń N.Á.Nazarbaevtyń basshylyǵymen buryn bolmaǵan úlken jetistikterge jetip otyrǵanyna qýanyshty ekenin habarlady. Dinbasy sheıh Ábsattar qajy Derbisáli Qazaqstan musylmandarynyń dinı basqarmasy Elbasynyń ıgi saıasatyn din arqyly qoldap, Qazaqstan halqynyń yntymaǵy men birligin saqtaýda úlken jumys júrgizip otyrǵanyn, ol bas múftı bolǵaly ıslam dini bıik beleske kóterilgenine nazar aýdartty. Qazaqstanda Islam ýnıversıteti men ınstıtýty, 8 medrese ashylyp, olardyń ıslam dini kadrlaryn daıarlap jatqany Lıgaǵa málim ekeni, Qazaqstanda sońǵy 10 jylda 1000-ǵa jýyq meshitter salynǵany, dinı isterdiń durys júrgizilýi arqasynda Dinı basqarmanyń halyqtyń qoldaýyna ıe bolyp otyrǵany súısintetinine toqtaldy. Kezdesýden soń sheıh Ábsattar qajy Derbisáli buqaralyq aqparat quraldarymen baspasóz konferensııasyn ótkizdi.
“Egemen-aqparat”.
