Ulylardyń týǵan kúni bar, ólgen kúni joq

«Qadirin bilmeppiz ǵoı tiri kezde», Dep jylar qalyń qazaq men ólgende. Seksen men júzdigimdi urpaq atar, Tarıhtyń túkpirinen sóz kelgende, – dep elýge de kelmeı turǵanda áýlıelikpen jazyp ketken Baý­yr­jan Momyshuly keshe, juma kúni 100-ge toldy. Batyrdyń me­reıtoıy jyl boıy toı­lan­dy, jyl boıy esimi eldiń aýzy­nan túsken joq. Kózi tirisinde-aq tý­ǵan halqynyń súıis­pen­shi­ligine bó­lengen batyrdyń týǵan kúni eli­mizdiń túkpir-túkpirinde túrli sharalarmen atalyp jat­ty. So­nyń biri Semeı memlekettik pe­da­gogıka­lyq ınstıtý­ty­nyń qol­ǵa alýymen Baýyr­jan Momysh­uly­nyń «Soǵys psıhologııasy» atty kitaby qaıta jaryq kórdi. «Ulylardyń týǵan kúnderi bar, biraq ólgen kún­deri joq» degendi Ázirbaıjan jazýshysy Anar Rzanyń aýzynan estip edik. Bıyl Baýyrjan ba­ba­myz­dyń laıyqty túrde eli atap ót­ken ǵa­syr­lyq toıy  osy sózdi jıi eske túsirýmen boldy. Semeı óńirinen arnaıy kelgen azamattar Astana jáne Al­maty zııalylarymen  Ortalyq memlekettik murajaıdyń Baý­yr­jan Momyshulyna arnalǵan ekspozısııa zalynda qazaq hal­qy­nyń ardaqty perzenti, qol­bas­shy, kórnekti jazýshy­nyń tý­ǵanyna 100 jyl tolý qurme­tine arnaıy jańa nusqada shy­ǵa­rylǵan «Soǵys psı­ho­lo­gııa­sy» kitabynyń tusaýkeserin ót­kizdi. Baýyrjan Momyshulynyń artynda qaldyr­ǵan baı mura­syn, Otanyn, ultyn súıýdegi ónege­sin elimizdiń bolashaǵy – jastarǵa taǵylym jasaý maq­sa­tynda, onyń 1944 jyly KSRO Ǵylym akademııasynyń Qazaq­stan­daǵy fılıalynda, sol kezdegi res­pýb­lıkanyń kórnekti qaı­ratkerle­ri­niń, jazýshy­la­ry­nyń, ǵalym­da­ry­nyń aldynda oqy­­ǵan, jurt­shylyqqa «Soǵys psıhologııasy» de­gen jalpy atpen belgili dáris­terinen tura­tyn eń­beginiń qaıta basylýyna Bilim jáne ǵylym mı­nıstri Ba­qytjan Jumaǵulov tikeleı  yqpal etken. Osy bir asa qundy eńbek tek taza áskerı máselelerge ǵana arnalmaǵan, odan adam boı­­yn­daǵy otandy súıý, taban­dylyq, adaldyq, qıyn­nan alyp shyǵar tapqyrlyq, kókeıge qo­nym­dy sózdermen jurtshy­lyq­qa áser ete bilý sııaqty jáne t.b. adamı qasıetterdi kórýge bolady. Kitaptyń basty ereksheli­gi­niń biri, onyń eki tilde birtutas kitap bolyp shyǵarylýy. Sol sııaq­­ty, bul eńbek oqý oryn­dary­nyń jáne eli­mizdiń negizgi kitaphanalarynyń kitap qor­laryn tolyqtyrmaq. Tusaýkeserge elimizdiń kór­nek­ti memleket qaıratkerleri, Uly Otan soǵysynyń ardagerleri, jazýshylar, ǵalymdar, qa­la jurt­­shylyǵy jáne jastar qatysty. Aınash ESALI. Almaty. ----------------------------------------- Sýretti túsirgen Bersinbek SÁRSENOV.