Táýelsizdik tuǵyry bekı bersin!

– Búginde tynyshtyq pen turaqtylyqtyń besigine aınalǵan elimiz esen-aman taǵy bir jyldy qarsy aldy. Elbasymyz Nursultan Nazarbaev zor kúsh-­jigermen memleketimizdi ja­han­dyq daǵdarys jaǵdaıyna qar­sy amal-sharǵyǵa jumyl­dyr­dy. Jýyrdaǵy Joldaýynda bıýdjettik qyzmetkerlerdiń, dárigerler men muǵalimderdiń eńbekaqysyn, qarııalarymyzdyń zeınetaqysyn kóteretinin aıtty. Bul – osyndaı qıyn kezeńde halyqtyń áleýmettik jaǵdaıyna jasalǵan úlken qoldaý. Dúnıe dúrbeleńge toly. Qaı jaqqa qarasańyz da jarylys, soǵys, qaqtyǵys, janyn shúberekke túıgen bosqyn jurt syndy janyńdy aýyrtatyn jaıttardy kóresiz. Fransııadaǵy terakt, Sırııadaǵy soǵys sonyń dáleli. Otty oshaqtar azaımaı tur. Qudaı qosqan kórshimiz Reseı men túbi bir baýyrymyz Túrkııanyń arasyndaǵy salqyndyq ta geosaıasattyń zilmaýyr salmaǵyn tarazylaı túskendeı. Prezıdentimiz parasatty paıymymen eki eldiń arasynda dáneker bolyp júr. Bitimgershilik mıssııasynyń elimizge júkteletini de beker emes. Biz beıbitsúıgish elge, bitistirýshi elge aınaldyq! Sondyqtan, qarjylyq daǵdarys, ekonomıkalyq qıyndyqtar bola beredi. Eń bastysy, el irgesi bútin bolsyn degim keledi. Eski jylǵa ókpe joq. Bizdiń Semeı qalasyndaǵy Abaı atyn­daǵy teatrymyz úshin tabys­ty jyl boldy. О́ner óńirimizben birge óristep, órkendep keledi. Mysaly, bıyl Abaıdyń 170 jyldyq mereıtoıyna arnap Muhtar Áýezovtiń «Abaı» tragedııalyq dramasyn qoıdyq. Bul spektakl 30 jyldan keıin qaıta oralyp otyr. 1975 jyly qoıylǵan spektakl sahnada on jyl júrgen edi. Men osy qoıylymda basty obrazdy 40 jyl buryn oınaǵan ekenmin. 40 jyldan soń taǵy da Abaı beınesin somdadym. Eń basty jańalyq, Memleket basshysynyń qoldaýymen shyǵys óńirinde úlken teatr ǵımaraty salyndy. Onyń saltanatty ashylýyna Elbasynyń ózi qatysyp, shyǵarmashylyq ujymǵa shabyt tiledi. Qazaq handyǵynyń 550 jyldyǵyna oraı jergilikti avtorymyz Aıbek Tóleýhannyń «Kereı han-han Jánibek» atty shyǵarmasyn sahnaladyq. Bul qoıylym bıyl qyrkúıek aıynda О́skemendegi jańa oblystyq drama teatrynda ótken elimizdiń teatrlar festıvalinde bas júldeni jeńip aldy. Teatrymyz elimizben birge erteńgi kúnge senimmen qarap, alǵa qaraı nyq qadam basyp keledi. 2016 jyly Táýelsizdigimizdiń 25 jyldyq mereıtoıy atalyp ótedi. Táýelsizdik – eń uly baı­lyǵymyz. Men úshin de bul jyl­dyń mańyzy bar. Alla buıyrtsa, seksenniń seńgirine aıaq basamyn. Sondyqtan, Táýel­sizdigimizdi ulyqtaıtyn uly dú­nıelerdi usynýda teatr sala­synyń da tyǵyz ári jemisti jumys isteıtin jyly bolady dep senemin. Táýelsizdigimiz baıandy bolsyn! Beken IMAHANOV, akter, Qazaqstannyń halyq ártisi.