Shynymen de óz shyny zaýytymyz salynbaq

Aımaqtyń ǵana emes, tutas respýblıkanyń ekonomıkasyna edáýir serpin ákeletin shyny zaýytynyń qurylysy bastaldy. Bul joba Qyzylorda oblysynda iske asýy da birshama kesheýildedi. Onyń da túrli sebepteri bar. Al qurylys bastalǵannan keıin de túrli tosqaýyl qoımaqshy bolǵandar tabyldy. Degenmen, búginde eshteńege qaramaı, joba qarqyndy túrde júrip jatyr. Bul ne joba? Qandaı paıdasy bar? Endi az-kem osy jaıyna toqtala ketelik. Zaýyt iske qosylǵanda tabaqsha shynylar shyǵara bastaıdy. Onyń ónimi ártúrli bolmaq. Tipti, uıaly telefonnyń betine qoıylatyn shynyǵa deıin shyǵara alady. Nemis tehnologııasymen salynatyn zaýyt barlyq zamanaýı qural-jabdyqtarmen qamtylmaq. Zaýyttyń bir kúndik qýattylyǵy 600 tonna shyny shyǵarýǵa jetedi. Iаǵnı, bul jylyna 197 100 tonna tabaqsha shyny shyǵady degen sóz. Zaýyt qurylysyna «Báıterek» holdıngi de belsendi túrde atsalysyp jatyr. Sonymen qatar, qurylystyń strategııalyq ınves­tory retinde AQSh-tyń «Steward Engineers» kompanııasy tańdap alynǵan. Atalǵan kompanııa Qazaqstannyń ınvestısııalyq qorymen birigip qurylystyń 20 paıyzyn qarjylandyryp otyr. Al qalǵan qarajatty «Qazaqstannyń Damý banki» AQ óteıdi. Jobanyń jalpy quny 52,1 mıllıard teńgeni quraıdy. Osy arada «Steward Engineers» kompanııasy zaýyt tolyq qýatynda jumys istegenge deıin qazaqstandyq mamandardy AQSh-qa jiberip, arnaıy taǵylymdamadan ótkizýdi uı­ǵaryp otyr. Munyń ózi jer­gilikti kadrlarǵa basymdyq berýge úlken kómek bolmaq. Zaýytqa qajetti shıkizattyń 95 paıyzy Qyzylorda oblysynda óndiriledi. Atap aıtqanda, kvars qumy, dolomıt, ák tasyn óndiretin oryndar daıyn. Al kalsılendirilgen sodany óndirý úshin «Araltuz» AQ-pen birlesken jumystar jasalyp jatyr. Shyny zaýytynyń qurylysy úshin Qyzylorda qalasyndaǵy ındýstrııaly aımaqtan 50 gektar jer bólindi. Oblys bıýdjetinen onda ınfraqurylymdyq ju­mystar júrgizildi. Aıtalyq, gaz, sý jelisi, telefon symdary, avtomobıl joldary men káriz júıeleri tolyqtaı jasaldy. Tehnıkalyq-ekonomıkalyq negizdemesi men jobalyq-smetalyq qujattary tolyq daıyndalǵan. Memlekettik saraptama jasalyp, qajetti kelisimderge qol qoıylǵan. Zaýyt­tyń jobasy maquldandy. Búginde qurylys jumystary bas­talyp ketti. Kásiporyn iske qosylǵanda 300 adam jumyspen qamtylady. Al qurylys jumystary kezinde 200 adam jumysqa tartylady. Eń bastysy, qazirdiń ózinde Shyny zaýyty óndirgen ónimdi satatyn naryq anyqtalyp jatyr. Solaısha, zaýyt quyrlysy aıaqtalǵanǵa deıin ónimniń qaıda, qalaı satylatyny da belgili bolmaq. Erjan BAITILES, «Egemen Qazaqstan». QYZYLORDA.