Barymyzdy baǵalaı bileıik

Qoı jylyna ókpemiz joq. Qıyndyqtarynan góri bıik asý-belesterimen kóbirek este qaldy. Shúkirshilik, elimiz bo­ıynsha aýyz toltyryp aıtatyn jetistikterimiz barshylyq. Endi, mine, Meshin jylynyń araıly tańy atyp, qaryshty qadamdarǵa jetýdi belgilep otyrmyz. Elbasy jańajyldyq quttyqtaýynda Táýelsizdigimizdi baıandy etý, memlekettiligimizdi odan ári nyǵaıtý jolyndaǵy qazaqstandyqtardyń ólsheýsiz eńbegin atap ótip, alda ókpegi kóp buralań joldardyń kútip turǵanyn, biraq bul ótkelden de qınalmaı shyǵatynymyzǵa sendirdi. «Eń jaqsy jospar – ýaqyt talabyna beıimdele alatyn jos­par» degen edi Prezıdentimiz «Qazaqstan jańa jahandyq naqty ahýalda: ósim, reformalar, damý» Joldaýynda. Ondaǵy maqsat–qazaq ulty men júzdegen etnostar mekendeıtin ortaq Otanymyzdy álemdegi damyǵan eldiń qataryna qosý, Qazaqstandy «Máńgilik El» etý. Jańa jahandyq syn-qaterlerge qarsy Memleket basshysy belgilep bergen birtutas is-qımyl strategııasyn qarsy qoıa otyryp, jurtshylyq bolyp eseli eńbek etetin bolsaq, tuǵyrymyzdyń bıik bolary anyq. Urys kirgen úıden yrys qashatyny belgili. Onyń tala­ıyn aýdandyq partııa komıtetiniń birinshi hatshysy, oblys ákiminiń birinshi orynbasary qyzmetterin atqaryp júrgende keziktirdik. 90-jyldardyń basynda jetpis jyldan astam ýaqyt dáýirlegen Keńes Odaǵynyń memlekettik jáne qoǵamdyq qurylymdarynyń irgetasy sógilip, qabyrǵalarynyń te­mir qursaýlary kúırep, jan-jaqty bytyrap ketýiniń sebebi, «toqyraý» dep aıdar taǵylǵan kúızeliske ushyraý, «qaıta qurý» baǵdarlamasynyń júzege aspaýy, ákimshil-ámirshil basqarý júıesiniń syr berýinen edi. Nursultan Ábishuly dúnıejúzi memleketteriniń barlyǵy der­lik erteden beıimdelip, atqa­ratyn erkin ekonomıka­lyq sharýashylyq júıesine aýysý, totalıtarlyq basqarýmen, buı­ryqpen atqary­latyn isterdi lıberaldy saıasat jolymen sheshý joldaryn tereń uǵynyp, táýelsiz damý baǵyttaryn tynymsyz izdestirýmen boldy. Eńsesi túsken halyqtyń sanasyn oıatý, rýhyn kóterý, bolashaqqa senimin bekitý, hal-ahýaldyń jaqsaratynyna sendirý, jasampaz isterge bastaý uzaqqa sozylǵan syn ýaqyty bolsa da, eldigimizdi shyńdaıtyn óliara tustan aman-esen óttik. Endigi mindet, ortaq shańyraǵymyzdyń ıgiligi úshin «birimiz – bárimiz úshin, bárimiz – birimiz úshin» qaǵıdasyn berik ustana otyryp, jınaqtaǵan tájirıbelerimizdi, ulttyq qundylyqtarymyzdy óskeleń urpaq boıyna sińirý bolyp tabylady. Táýelsizdik alǵannan beri 1300-den asa densaýlyq nysany men 1700-den astam bilim berý oshaǵy boı kóteripti. Aldaǵy baqýatty turmysymyzdy jaqsartatyn áleýmettik mindettemelerdi bar­lyq salalar boıynsha ushyratýǵa bolady. Endigi másele, árkimniń jeke basynyń iskerliginde, jaýap­kershiliginde, basshylardyń qaramaǵyndaǵy qyzmetkerlerdi ortaq maqsatqa jumyldyra bilýinde, halyqtyń senimin aqtaı bilýinde. «Úkimet bar, asyraıdy» degen psıhologııadan arylyp, elimizdiń aldynda turǵan tarıhı jaýapkershilikti tereń túsiný arqyly bıik talaptar údesinen shyǵa bilsek, Meshin jyly da mereıli belesterge toly bolary anyq.  Qudaıbergen QALIEV, «Qurmet» ordeniniń ıegeri, oblystyń qurmetti azamaty. Soltústik Qazaqstan oblysy.