PAVLODAR. 1 qańtar. Pavlodar oblysynda qatty soqqan jeldiń saldarynan birneshe áleýmettik nysandardyń shatyrlary ushyp ketti. Bul týraly oblystyq tótenshe jaǵdaılar departamentiniń baspasóz qyzmeti habarlady
Jeltoqsannyń sońǵy kúnderi soqqan qatty jelden Baıanaýyldyń Uzynbulaq aýylynda mekteptiń, Aqsýdyń Aqjol aýylyndaǵy orta mekteptiń, Ekibastuzdaǵy №7 orta mekteptiń,«Aıgólek» balabaqshasynyń, «Naryq» bazarynyń, Maı aýdany Saty aýylyndaǵy mádenıet úıiniń birneshe myń sharshy metrdi quraıtyn shatyrlary ushyp ketken. Qazirgi kúnder oqıǵa oryndarynda keltirilgen zardapty anyqtaý boıynsha komıssııa jumys istep jatyr. Japa shekkender men adam shyǵyny oryn alǵan joq. Derek kózderge súıensek, qaıta jóndeýden ótken shatyrlar jelge tótep bere almaǵan. Aıta keteıik, ótken jyly sáýirdiń sońynda soqqan daýyldan oblystaǵy 8 mektep, Ertis aýdanynda kolledj jataqhanasy, mádenıet úıiniń tóbesi, Qashyr aýdanynda mádenıet úıiniń tóbesi, Aqtoǵaı aýylyndaǵy aýdandyq agrotehnıkalyq kolledj ǵımaratynyń shatyrlary ushyp ketken-di. Al mamyr aıynda Ekibastuz, Aqsý qalalary, Lebıaji, Maı aýdandarynda jalpy aýmaǵy 4 myń sharshy metrdi alatyn 20 ǵımarattyń shatyrlary qatty jeldiń saldarynan opyrylyp túsken bolatyn.
Farıda Byqaı.
Derek, sýret: Oblystyq tótenshe jaǵdaılar departamentiniń baspasóz qyzmeti.
