Atyraýlyq otbasy shatyrsyz, edensiz baspanada turady

ATYRAÝ. Atyraý oblysynyń Shoqpartoǵaı aýylynda bir otbasynyń shatyrsyz, edensiz úıde turatyny anyqtaldy. Bul týraly azh.kz saıtyna silteme jasaǵan egemen.kz tilshisi habarlady. Jylyoı aýdanyndaǵy eldi mekenniń biri – Shoqpartoǵaıdyń turǵyny Gúljan Qojanova II toptaǵy múgedek qyzymen birge atasynan muraǵa qalǵan baspanada turady. Alaıda, 1944 jyly qabyrǵasy qalanǵan úıdiń ne shatyry, ne edeni joq. Bir sózben aıtqanda, lashyq tárizdes baspananyń tóbesine saban tóselipti. Úı ıesiniń aıtýynsha, buryn kúıeýi bul úıdi maılap, tóbesinen sý ótkizbeýdiń amalyn jasaǵan eken. Kúıeýi ómirden ótken tórt jyldan beri jóndeý jumystary júrgizilmegen. Gúljan Qojanova ákimdikke birneshe ret shaǵym aıtyp, bir jyl buryn Qulsary qalasyndaǵy kóp qabatty úıden ýaqytsha bir bólmeli páter alǵan. Biraq, onyń kommýnaldyq tólemaqylaryna tólenetin shyǵynnyń kóptiginen burynǵy baspanasyna qaıta oralǵan. Qyzynyń múgedektigine aı saıyn 35 myń teńge alady. Jańa baspana satyp alatyndaı qarjysy joqtyǵyna nalıdy. Osy otbasy meken etken Qaraarna okrýginiń ákimi Erbolat Eleýsinov te shatyrsyz, edensiz úıdiń turýǵa jaramsyz ekenin rastapty. Sol sebepten Qulsary qalasynan bir bólmeli páter ýaqytsha berilgen. Biraq múgedek qyzy bar Gúljan Qojanova óz aýylynan ketkisi kelmeıdi. Okrýg ákimi shaǵyn bolsa da úı turǵyzyp berý úshin kásipkerlerden kómek suralǵanymen, eshqaısysy kómek qolyn sozýǵa ynta tanyta qoımaǵanyn aıtty. Joldasbek Shópeǵul. Derek, sýret: azh.kz.