AIаZ
Kári qudań qys keldi degenshe, Altaı turǵyndary úshin mazasyz kúnder men túnderdiń jalǵasatyny belgili jáıt deı berińiz. Mine, bir aptaǵa jaqyndady, munda arqyraǵan aıaz kúshine enip, oblys kóleminde kúrdeli jaǵdaılar oryn ala bastady. Sońǵy eki-úsh kúnde Shyǵys Qazaqstan oblystyq tótenshe jaǵdaılar jónindegi departamentiniń qutqarýshylary 32 qutqarý jumystaryn atqardy. Úsh kúnnen beri óńirdegi aýdandar men qalalardy jalǵastyryp turǵan kúre joldar keshke jaqynnan tańerteńge deıin jabyq. Sebebi, kún qatty sýyq. Sársenbi kúni tańerteń aýa temperatýrasy О́skemende -42, -43, qala irgesindegi Ahmer aýylynda -45, Kúrshim jáne Katonqaraǵaı aýdandarynyń keı jerlerinde tipti -45-ten asyp túsken. 2 qańtarda Kúrshim aýdanynyń Jańaaýyl aýylynda kún kúrt sýytyp, túnde aýanyń temperatýrasy -43, -45 gradýsqa jetip, Qaljyr ózenindegi Alqym ıininiń 300 metr jerinde ózen sýy qatyp, ol joǵary shyǵyp ketken. Al keshe sý kóterilip, onshaqty úıdiń qora-jaılaryna qaýip tóndirgen. Qazir ózendegi qatyp qalǵan muzdy jarý jumysy júrip jatyr. Kúrshim aýdandyq ákimdigi jaǵdaıdy qatań baqylaýda ustap otyr. Sóıtip, qoıan jyly qaharly qys belgisin bildirip, adamdar saq bolyńdar degendeı ıshara tanytýda. Iá, kúndelikti ómirde sergek bolaıyq, aǵaıyn. Jemshópti únemdep jumsap, eń bastysy, tirshiligimizdiń tinin buzyp almaıyq. Aıazdy kúnderi jolǵa shyǵýdy shektegen de jón...Ońdasyn ELÝBAI.
Shyǵys Qazaqstan oblysy.* * *
QAR
Byltyrǵydaı bıyl da, mine, soltústiktiń qysy údep tur. Yzǵarly. Sýyq. Qar qalyń. Aıazdyń beti qaıtar túri kórinbeıdi. Desek te, qystyń óz ásemdigi, ǵajap kórki bar ǵoı. Jazýshy-aqyndarymyz sýrettep jazatyndaı-aq búginde Kereký óńiri aınala appaq qarǵa bókken. Dala tym-tyrys. Keremet ǵajap qys bolyp tur! Sońǵy aptadaǵy aýa raıyn boljaýshylardyń málimetteri boıynsha oblys ortalyǵynda 30-33 gradýs, al alystaǵy Ertis, Jelezınka, Aqtoǵaı, Baıanaýyl aýdandarynda 37-38 gradýsqa deıin sýyq boldy. Qańtardyń 6-7-si kúnderi aıazdyń kúsheıetini, jolaýshylarǵa alys jolǵa shyqpaýlary eskertildi, tipti, alystaǵy aýyldarda 39-40 gradýsqa deıin jetetini aldyn ala teledıdardaǵy júgirtpe joldar, oblystyq radıo arqyly birneshe ret habarlandy da. Ákimdikterge habarlasyp hal-jaǵdaılaryn bilip edik: «E, bizge qys túskeli qaı zaman, aýyldar tynysh, mal-jan barlyǵy da baqylaýda», degen jaýaptar aldyq. Aýyldyqtar alańdaıtyn emes. Olarǵa qosyla mundaı qys bıyl ǵana bolyp pa táıiri degendeı, qalyń tondarǵa oranǵan, jumsaq pımalar kıgen qala halqy da, mine, jumystaryna da, qonaǵyna da, qudalyǵyna da baryp, oblys ortalyǵynda tramvaılar da, qalaaralyq avtobýstar da toqtaýsyz júrip jatyr. Oqys oqıǵalar oryn alǵan joq. Qala páterleri de jyly. Tótenshe jaǵdaılar basqarmasynyń málimetterinshe, oblys aýmaǵynyń qalalarynda, basqa da eldi mekenderde barlyq jedel qyzmet oryndary, jol, tártip saqshylary kúni-túni kezekshilikte. Qatal qysqa ábden úırenip alǵan soltústiktiń halqy, áı, bálkim keler jyly qys bolmaıdy eken dese, qalyń qar, sary aıazym-aı dep jylaıtyn da shyǵar-aý!..Farıda BYQAI.
Pavlodar oblysy.
