Joǵary eńbek ónimdiligi – ádiletti qoǵamnyń tabysy

Keshe saılaýaldy úgit-nasıhat jumystaryn júrgizý sheńberinde Qazaqstannyń Kommýnıstik halyq partııa­synan (QKHP) úmitkerler tizimine engizilgender Almatydaǵy «Aqsaı nan» JShS jumysshylarymen kezdesti. «Aqsaı nan» JShS – elimizdegi nan ónim­derin shyǵaratyn eń úlken kásip­oryndardyń biri. Mundaǵy jumys­shylar arasynan QKHP baǵdarlamasyn qoldaýshylar sany basqa kásiporyndarǵa qaraǵanda birshama kóp. Partııalyq tizimge engizilgen depýtattyqtan úmit­ker kommýnıster atynan alǵashqy sózdi Magerram Magerramov alyp, kompartııanyń aldyna qoıyp otyrǵan saıası maqsattaryn, elimizdiń ekonomıkasyn kóterý jolynda qandaı usynystar jasaıtynyn jınalǵandarǵa jetkizdi. Ekonomıkanyń naqty sek­toryn­daǵy joǵary ónimdilik qana el ekono­mıkasynyń turaqty túrde ósýine negiz bola alady. Qazaqstanda ony ósirýge negiz bolatyn faktorlar jetkilikti. Sonymen qatar, halyqtyq kommýnıs­ter qazaqstandyqtardyń ál-aýqatynyń óskenin de qalaıdy. Elimizde ádiletti qoǵam ornap, eńbek adamdarynyń tókken terine oraı tıisti kólemde eńbekaqy tólense, sonymen qatar, halyqtyń rýhanı jáne mádenı damýyna jaǵdaı jasalsa, kommýnıster atqarýshy ókimetke árqashan da qoldaýshy bolary sózsiz. Bizdiń elimizdiń zańdary, qabyldanǵan normalar osyndaı jetistikterge aparatynyna men senimdimin, dedi sheshen. Kelesi kezekte sóz alǵan partııa belsendisi Irına Smırnova da QKHP-nyń tizimine engen úmitkerlerdiń biri. Ol aldymyzda bolatyn saılaýdyń mańyzdylyǵyna toqtalyp ótti. Elimizdiń eń joǵarǵy zań shyǵarýshy ókiletti organynda birneshe partııanyń ókilderi otyrsa, bul demokratııa qaǵıdattarynyń tolyq oryndalǵany dep sanaý kerek. О́tken saılanymda halyqtyq kommýnısterden tizimimen engen jeti depýtat ózderin jaqsy qyrynan tanyta bildi. Olar eńbek adamynyń, qarapaıym halyqtyń múddesin jaqtap ózderiniń halyqshyldyǵyn kórsetti. Aldymyzda bolatyn saılaýda da bizdiń partııamyz 7 paıyzdyq tabaldyryqty eńserýge tıis. Jumysshy tabynyń ókilderi kommýnısterge daýys beredi ǵoı degen senimdemiz, dedi ol. Is-shara barysynda kásiporynnyń birneshe jumysshysy sóılep, ózderiniń QKHP-ǵa daýys beretinderin jetkizdi. Kez­desý sońynan kommýnıster «Aqsaı nan» JShS-niń eńbek ujymyna tabystar tilep, bıik eńbek ónimdiligine jetýlerin tiledi. Jaqsybaı SAMRAT, «Egemen Qazaqstan». Almaty.