Rojdestvo – súıispenshilik pen raqymshylyq merekesi

Keshe Elbasy Nursultan Nazarbaev Astananyń Ýspen kafedraldy soborynda bolyp, shirkeýge kelgenderdi jáne barlyq qazaqstandyq pravoslavıe dinin ustanýshy hrıstıandardy Rojdestvo merekesimen quttyqtady. Qańtardyń 6-nan 7-ne qaraǵan túni hrıstıan dininiń pra­voslavıe tarmaǵyn ustaný­shy­lar Aısa paıǵambardyń týǵan kúnin toılaıdy. Bul – hrıstıan jurtynyń basty merekeleriniń biri. Injildegi ańyzǵa qaraǵanda, dál osy kúni Palestınadaǵy Vıfleem qalasynda Aısa paı­ǵam­bar dúnıege kelgen. Hrıstıandar ony «Qudaıdyń uly» dep tanıdy. Al keshegi kúndi «Týǵan kún», ıaǵnı «Rojdestvo» merekesi dep toılap keledi. Osy kúnniń aldyndaǵy túndi kúzetip, hrıstıan hramdarynda «sochelnık» dep atalǵan qulshylyq rásimi jasa­la­dy. Al ertesine ol merekelik das­tar­qanǵa ulasady. Qazaqstan Pre­zıdenti Nursultan Nazar­baev­tyń Jarlyǵymen 2005 jyl­dan bastap bul kún bizdiń elimizde de resmı túrde atalyp, merekelik datalar­dyń birine aınalǵany belgili. Kafedralyq soborǵa kelgen Elbasy N.Nazarbaevty mıtropolıt okrýginiń is basqarýshysy epıskop Gennadıı qarsy aldy. Al Astana jáne Qazaqstan mıtropolıti Aleksandrdyń ózi tań­ǵy altydaǵy ushaqpen Máskeýden kelgen shuǵyl habar boıynsha qaı­tys bolǵan shirkeý ıerarh­tary­nyń birin jerleýge qatysý úshin sonda ushyp ketken eken. Elbasy Nursultan Nazarbaev óziniń sózinde pravoslavıeni us­tanýshy barlyq otandastary­myz­dy súıispenshilik pen beıbitshilik jáne raqymshylyqty ýaǵyz­daıtyn Rojdestvo merekesimen quttyqtap, densaýlyq, otbasy­lyq baqyt pen elge amandyq tiledi. Odan ári bıylǵy Rojdes­tvo­nyń Ýspen kafedraly sobory sııaqty óte kórikti, sáýletti jáne Ortalyq Azııadaǵy eń úlken hrıstıan soborynda qarsy aly­nyp otyrǵanyn atap ótti. – Bul hram bizdiń jas elor­damyzǵa óziniń arhıtektýralyq ásem sáýletimen jańa kórik berip tur, – dedi Elbasy. – О́tken jyl qazaqstandyq pravoslavıelikter úshin este qalarlyq oqıǵalarǵa toly boldy. Sonyń ishinde osy sobor ashylyp, onyń ashylýyna men Máskeý jáne Búkil Reseı patrıarhy Kırılldi shaqyrdym. Onyń sapary bizdiń elimizdegi eń úlken konfessııalar – ıslam men pravoslavıe dinderin ustanýshy­lar­dyń arasyndaǵy qarym-qa­ty­nasty nyǵaıtýda izgilikti qadamǵa aınaldy. Biz barlyq dástúrli jáne álemdik dinderdi tutyný­shy­lardy syılaý jáne ózara tó­zimdilik saqtaý saıasatyn júrgizý­demiz. Sonyń arqasynda bizdiń eli­mizde kelisim, dostyq, tynysh­tyq pen beıbitshilik saqtalýda. Al olar Qazaqstannyń kúnnen kúnge damyp, halqymyzdyń tur­mys dárejesiniń jyldan jylǵa jaqsarýyna septigin tıgizip otyr. Tipti osy saıasatymyzdyń ar­qasynda bizdi dúnıe júzi de syılap, qurmet kórsetýde. Biz osy qundylyqtarymyzdy kózdiń qarashyǵyndaı saqtaýymyz kerek jáne ony bolashaq urpaqqa amanattaýymyz kerek. Jaýap sózinde epıskop Gennadıı Nursultan Nazarbaevqa dindarlar atynan úlken alǵysyn bildirip, Elbasynyń isine ta­bystar tiledi. Siz Eýrazııa keńis­tiginde orystyń ozyq oıshyl­dary men fılosoftary arman­da­ǵan eń úzdik memleket qura bil­dińiz, biz árqashanda Sizdiń jo­lyńyzdyń bolýyn Qudaıdan tileıtin bolamyz, dedi epıskop Gennadıı. Jaqsybaı SAMRAT. ----------------------------------------- Sýretti túsirgender S.BONDARENKO, B.OTARBAEV.