Qosarlanǵan tuńǵysh bolmaıdy. Ol – jalqy

Astanadaǵy L.N.Gýmılev atyn­daǵy Eýrazııa ulttyq ýnıversıtetinde Qazaqstannyń, Re­seıdiń, Japonııanyń, Germa­nııa­nyń, Fransııa men Qytaıdyń jetekshi ǵalymdary men ma­man­dary qatysqan «Ǵarysh adam­zattyń ıgiligi úshin – bo­lashaqqa kózqaras» degen ta­qy­rypta halyqaralyq konferensııa bolyp ótti. Bul Iýrıı Ga­garınniń ǵaryshqa ushqanynyń 50 jyldyǵy sheńberinde uıym­dastyrylatyn sharalardyń al­ǵash­qylary qatarynda kórinis tapty. Jáne onyń elimiz Ult­tyq ǵarysh agenttiginiń tóraǵa­sy Talǵat Musabaevtyń 60 jyl­dy­ǵyna oraılastyrylǵany da kó­ńil­ge qonǵanyn aıta ketkenimiz jón. Árıne, biz qasıetti qazaq jerinen adamzat balasy tuńǵysh ret ǵaryshqa ushqanyn, elimizde dúnıe júzindegi iri ǵarysh kesheni bolyp tabylatyn «Baıqońyr» kosmodromy ornalasqanyn zańdy maqtanysh etemiz. Tuńǵysh qazaq ǵaryshkeri Toqtar Áýbákirovtiń 1991 jyldyń 2 qazanyndaǵy, al kelesi qazaq ǵaryshkeri Talǵat Musabaevtyń 1994 jyldyń 1 shildesindegi ǵaryshqa saparlary da kópten kútken armanymyzǵa qol jetkizýimiz retinde oryndy baǵalandy. Sol ýaqyttan beri ǵarysh kóginde qazaq azamaty samǵamaǵany, 2003 jyldan beri 2 qandasymyz – Muhtar Aımahanov pen Aıdyn Aıymbetovtiń ǵaryshkerlikke úmitkerler retinde Reseıdegi ǵaryshkerler daıarlaıtyn ortalyqta arnaıy daıyndyqtan ótkenderi, biraq olardyń ǵaryshqa qashan ushary belgisiz bolǵandyqtan, bir úmitker qandasymyzdyń Reseı azamattyǵyn alýǵa nıet tany­typ otyrǵany bólek áńgime. Bul jerde bizdiń aıtpa­ǵymyz – ýnıversıtettegi halyq­aralyq konferensııa bary­syn­da T.Musabaevtyń: «Qazaq­stan­dyqtar bir nárseni jete tú­sinbeı júr. Toqtar Áýbákirov keńestik kezeńde ushqan tuńǵysh qazaq ǵaryshkeri, al men bolsam, táýelsiz eldiń tuńǵysh ǵarysh­ke­rimin», degen sózderiniń qısynǵa kelińkireı qoımaı­tyn­dyǵy. Qosarlanǵan tuńǵysh bol­maıdy. Tuńǵysh – qashanda jalqy. Samat MUSA.