Elbasymen birgemiz!

Qazaqstandyqtar N.Nazarbaevtyń prezıdenttik ókilettigin uzartýdy qoldaıdy

PREZIDENT О́KILETTIGINIŃ UZARÝYN QALAIMYZ

Beısenbi kúni elimizdiń Parlamenti Qazaqstannyń Tuńǵysh Pre­zıdenti, Elbasy Nursultan Nazar­baev­tyń ókilettigin 2020 jylǵa deıin uzartý týraly referendým ótkizýdi qoldaǵan oń sheshim qa­byl­dady. Búgingi kúni bul bastamaǵa jan-jaqty qoldaý bildirip jatqan qalyń elmen birge biz, Qazaqstan­ Qajylary qaýymdastyǵy da Prezıdent ókilettiginiń uzarýyn qalaı­tyndyǵymyzdy bildiremiz. «Islam” degen sóz «beıbitshilik, tynyshtyq” degendi bildiredi. Sondyqtan, Prezıdentimiz Nur­sul­tan Nazarbaevtyń júrgizip otyr­ǵan saıasaty, sonyń arqa­syn­da elimizde qol jetkizilip otyr­ǵan ultaralyq tatýlyq pen din­aralyq kelisim Islamnyń usta­nym­dary­men úndes. On segiz myń ǵalamdy jaratqan Jaratýshy Iemiz qasıetti Quranda patshany Alla saılaıtynyn aıt­qan. Pat­sha­nyń nusqaýlaryn bul­jytpaı oryndaý musylmandar úshin ýá­jip. Hadıste patshanyń qo­ǵam­­daǵy orny asa joǵary baǵalan­ǵan. Patshaǵa boı­usyný týraly eń kúshti dálelder Quranda aıtyl­ǵan. Iаǵnı, «Nısa» súresiniń 59 aıatynda Táńir Taǵa­la: «Eı, ıman keltirgender (momyndar), Allaǵa boıusy­nyńdar! Jáne Rasýlge boı­usy­nyńdar! Sondaı-aq, óz ara­laryń­nan shyqqan ámir ıelerine (basshy­larǵa) boıusynyń­dar!» dep úkim bergen. Alla Taǵala halqymyzdyń darhan peıili men izgi nıetine qaraı Nursultan Na­zar­baevty basshymyz bolýǵa násip etti. Ol Rabbymyzdyń qa­laýymen táýelsizdigimizdiń tuǵy­ry bıik bolýyna bar kúsh-jigerin jumsap keledi. «Patsha – Alla­nyń jerdegi kóleńkesi”. Islam ǵalym­dary patsha týraly osyn­daı tujy­rymǵa kelgen. Sondyq­tan, búgingi­deı beıbit ómirge jetkizip otyrǵan bas­shynyń ómir-jasynyń uzaq bolyp, baıandy qyzmet etýi barsha jurttyń tilegi ekendigin referen­dýmdy qanshama adamnyń qol­daǵanynan-aq bile berýge bolady. Jurtymyzdaǵy barsha musylman qaýymynyń da nıeti osy. Búgingi kúni elimizdegi qajy­lyq paryzyn atqaryp kelgen mu­sylman baýyrlarymyzdyń sany 20 myńnan asypty. Qajy­lary­myzdyń arasynda professor da, bıznesmen de, ákim de, depýtat ta, mınıstr de bar. Elbasymyzdyń ózi úsh márte umra qajylyqqa baryp, eki márte qasıetti Qaǵbaǵa kirgeni bárimizge belgili. Qazaqstan Qajylary qaýym­dastyǵy – qajylyq paryzyn atqaryp kelip, ıslam dininiń barsha adamzatqa ortaq acyl qun­dy­lyqtarynyń jurtymyzda keńinen nasıhattalýyna, halqymyzdyń jú­reginde ımandylyq, adamgershilik, izgilik, meıirbandyq jáne otansúıgishtik qasıetterin qalyp­tas­tyrýdy maqsat etken musyl­mandardyń basyn biriktiretin dinı birlestik. Qazaqstan halqynyń 70%-dan as­tamy musylman bolǵandyqtan, qo­ǵamnyń damýyndaǵy ıslamnyń or­ny erekshe. Islam dininiń elimizde qanat jaıýy jolynda qa­jyrly eńbek etip otyrǵan Qazaq­stan mu­sy­lmandary dinı basqar­masynyń irgetasynyń qalanǵa­nyna da bıyl  20 jyl. Musyl­man jamaǵatynyń rýhanı uıt­qysy retinde tanylǵan Dinı bas­qarma dinı-rýhanı isterdi memle­ketimizdiń dinder, ulttar men ulystar arasyndaǵy dostyq pen ózara túsinistik, syılastyq pen rýhanı úndestigine súbeli úlesin qosýmen keledi. Jýyrdaǵy Táýelsizdik kúninde Astana qalasynda Qazaqstan mu­sylmandarynyń 5-shi Quryl­taıy ótip, kelesi merzimge professor Ábsattar qajy Derbisáli Bas múftı, Musylmandar Dinı basqarmasynyń Tóraǵasy bolyp saılandy. Sol jıynda barsha mu­sylmandarǵa úndeý qabyldandy. Biz, Qazaqstan Qajylary qaýym­­dastyǵy, 5-shi quryl­taıda búkil musylmandarǵa jol­da­nǵan úndeýge tolyq qosylyp, qol­daımyz! Allanyń bizderge násip etip, ózgelermen terezesi teń etip kó­tergen egemendiktiń arqasynda qoly­myz jetken ulan-ǵaıyr jerimizdi kózdiń qarashyǵyndaı saq­taý jolynda halqymyzdyń ynty­maǵyn, aýyzbirligi men tutas­ty­ǵyn tileıik! Biz árbir musylman úshin, olardy tozaq otynan qorǵaý úshin jaýapty ekendigimizdi sezinip, ony ózimizdiń ómirimizdiń máni etýimiz qajet. Bul joldaǵy bizdiń musylmandar úshin jasaǵan eń­begimizdi Alla hıdaıattyń (Allaǵa barar tike jol) sebebi etedi. Musylman qaýymyn árbir saǵat saıyn, árbir mınýt saıyn ýaıym­daý kerek, tek sol kezde ǵana Alla paıǵambarlardyń duǵasyndaı, bizdiń de duǵamyzdy qabyl etedi! Osy jolda aıanbaı eńbek etýge jumylaıyq! Laıym jaratqan Alla elimizdi aman, shańyraǵymyzdy bıik qyl­ǵaı! Jaman kózderden, túrli bálelerden saqtaǵaı! Ámın.

Qazaqstan Qajylary qaýymdastyǵy.

* * *

TEREŃ TEBIRENIS ÚSTINDEMIZ

Qazaqstannyń shyǵysynan jet­ken aqjoltaı qýanyshty habar biz­diń mereıimizdi ósirdi. Qazaq eliniń Tuń­ǵysh Prezıdenti, Ult Kóshbas­shysy, álemge tanymal saıasatker, jerlesimiz Nursultan Ábishuly Na­zar­baev­tyń prezıdenttik ókilet­tigin 2020 jylǵy jeltoqsanǵa deıin uzartý jónindegi referen­dým­nyń bas­tama­shy tobyn qurýǵa ar­nalǵan jıynǵa qatysýshylardyń Qazaq­stan Respýb­lı­kasynyń aza­mat­ta­ry­na joldaǵan Úndeýin Qara­saı aý­danynyń jurt­shy­lyǵy tereń tebirenispen qarsy aldy. Buryn-sońdy bolyp kórmegen tyń qul­shynys pen bazarly bola­shaqqa degen zor senimnen qýat al­dyq. Osyn­daı shattyqqa bólenýimiz­diń ózindik syry da bar, ony aıtpasqa bolmaıdy. Nursultan Ábishuly aýdannyń Shamalǵan (qazirgi Úshqońyr) aýy­lynda sharýa otbasynda dúnıege kelgen sátinen-aq asqaq Alataý bókteriniń saf aýasymen tynystap ósken. Týǵan jeriniń qasıetti to­pyraǵy, bıik shyńdary onyń qııa­lyna qanat bitirip, asqaq arman­dar­ǵa qulshyndyrdy. Sol erkindikti, táýelsizdikti ańsaǵan asyl armany búginde iske asty. Týǵan eli – Qa­zaqstan Respýblıkasy búginde Eýrazııa kindigindegi qýatty memleketke aınaldy. Qazaqstan búginde irgesi berik, yntymaǵy jarasqan, eko­nomıkasy qýatty, saıası júıesi sa­ralanǵan, óz jolyn, óz bola­sha­ǵyn aıqyndaǵan, álemdik qaýym­dastyq aldyndaǵy bedeli bıik memleket. Qazaq eliniń aıbyndy elge aınalýy Nursultan Nazarbaev­tyń esimimen tyǵyz baılanysty ekenin búkil halyq biledi. О́z táýelsizdiginiń úshinshi on­jyl­dyǵynyń tabaldyryǵynda Qa­zaq­stan aldyna memleket damýy­nyń keleshektegi baǵytyn anyqtaıtyn ja­ńa mindetter qoıyp otyr. Bizde bola­shaq damýymyzdyń baǵyt-baǵ­dary naqty. Ol Qazaqstannyń 2030 jylǵa deıingi damý strategııasynda, 2020 jylǵa deıingi strategııalyq damý josparynda, elimizdiń údemeli ın­dýs­trııalyq-ınnovasııalyq damý baǵ­dar­lamasynda aıqyn kórinis tapqan­dyǵy. Naǵyz Elbasy – ol ózgelerdi de kóshbasshylyqqa jeteleıtin tulǵa jáne memlekettiń turaqty órleýiniń, ortaq úıimizdegi beıbitshilik pen kelisimniń kepili. О́skemen qalasynda 23 jeltoq­san­da ótken jınalysta biraýyz­dan qabyldanǵan Úndeýdegi osy­naý joldar bárimizdiń júregimizge shattyq sezimin quıdy. О́skemen qalasynda ótken jı­na­lysqa aýdannyń ókilderi – Al­maty oblystyq máslıhatynyń de­pýtaty, kásipker V.Matkava, Nur­sul­tan Ábishulynyń synyptas jol­dasy, Qarasaı aýdanynyń Qur­metti azamaty S.Qydyralıev, Qa­ra­­saı aýdandyq máslıhatynyń de­pýtaty S.Tuıaqbaev, eńbek ardageri M.Baımurzaev qatysyp, Qa­zaq­stan Respýblıkasynyń Prezıdenti – Elbasy N.Á.Nazarbaevtyń prezıdenttik ókilettigin uzartý jó­nin­degi referendýmnyń bas­tama­shy tobyn qurýǵa arnalǵan bas­qosýdan qýanyshty kóńil-kúıde oraldy. Qazir olar kópshilik oryndar­da, aýdanymyzdyń eldi mekenderinde jurtshylyq ókilderimen kez­desip, О́skemendegi tarıhı jı­na­lystan alǵan áserleri jaıly, Ult Kósh­basshysy, álem moıyn­da­ǵan sarabdal saıasatker Nursul­tan Nazarbaev týraly áńgimeler ótkizip, halyq­tyń yqylasyna bólenýde. Qara­saı­lyqtar «Bul durys sheshim, biz Elbasymen birgemiz» deıdi. Aıtylǵandardy tereń sezine otyryp, 265 myń halqy bar, 30-dan astam ulttardyń ókilderin biriktirip, tatý-tátti ómir keshken qasıetti babamyz Qarasaı batyr atyndaǵy aýdan azamattary Qa­zaq­stannyń Tuń­ǵysh Prezıdenti – Elbasy (Ult Kósh­basshysy) Nur­sultan Ábish­uly Na­zar­­baev­tyń pre­­zıdenttik ókilettigin 2020 jyl­­­dyń 6 jeltoq­sanyna deıin uzartý týraly res­pýblıkalyq referendým ótkizý jó­nin­degi usy­nysty shyn júrekten qoldap, Ún­deýge biraýyzdan ún qosýy zańdylyq. Úndeýde aıtylǵandaı, bul sheshim bizdiń bolashaqqa degen senimimizdi nyǵaıtyp, halqymyzdy biriktire túspek, qasıetti Ota­nymyz – Qazaqstan Respýb­lıka­syn jańa belesterge bastaýda bizge, Elbasynyń jerlesterine kúsh-qýat bereri sózsiz.

Lázzat TURLAShOV, Qarasaı aýdanynyń ákimi.

Almaty oblysy.

* * *

EL ERTEŃI ÚShIN

2010 jyldyń 23 jeltoq­sa­nynda О́skemen qalasynda ót­ken bastamashy toptyń jıy­nyna qa­tys­qandardyń Qazaqstan Respýb­lı­kasynyń Tuńǵysh Prezıdenti Nursultan Ábishuly Nazarbaev­tyń prezıdenttik merzimin 2020 jyldyń 6 jeltoqsanyna deıin uza­rtý jóninen respýblıkalyq re­ferendým ótkizý týraly ún­deýin tolyq qoldaımyz. Muny bizdiń aýyldyń ardagerleriniń, qalyń jurtshylyǵynyń pikiri degim keledi. Bizdiń Otanymyzdyń táýelsiz­di­giniń 19 jylyn oı eleginen ót­kiz­sek, bul kezeńniń bizdiń halqy­myz­dyń taǵdyryn túbirimen jaq­sy jaqqa ózgertkenin, Elbasynyń qajymas qaıraty men sarabdal saıasatynyń, eren eńbeginiń nátı­je­sinde elimizdiń erteńi aıqynda­lyp, táýelsizdigimizdiń tuǵyry bekigenin kóremiz. Táýelsizdigi­mizdiń osy kezeńi izdenisti ilgerileý men tarıhı oqıǵalarǵa toly bolǵanyn barshamyz moıyndaı­myz. Osy jyldar bizdiń halqy­myz­dyń san ǵasyrlyq tarıhyna al­tyn árippen jazylatyny sózsiz. Tarlan tarıh úshin az ǵana ýaqyt aralyǵynda Qazaqstan bútindeı alyp ımperııanyń kishkentaı bir bólsheginen qýatty elge, ekonomıkalyq jáne saıası lıderge aınaldy. Bizdiń Prezı­denti­­mizdiń ynta-jigeri, kúsh-qýa­ty ar­qa­synda kóptegen elder­diń kóke­ıin tesken, birneshe jyl­dar boıy sheshilmeı kele jatqan aýmaqtyq másele sheshildi. Qazaq­stan óz ta­rıhynda tuńǵysh ret óziniń mem­lekettik shekarasyn zańdy túrde resimdedi. Endi óz urpa­ǵymyzdy kórshi eldermen jerge talasý, jer úshin janjaldasý sııaqty keleńsiz jaǵdaılar alańdatpaıtyn boldy. Bizdiń elimiz qoǵamdy demo­kra­tııa­landyrý máselesi boıynsha da kóp elderden ozyq bolyp búkil álemge keńinen tanyldy. Elba­synyń elimizdiń saıası júıesin qurýdaǵy strategııalyq kóregen­digi arqasynda halqymyz turaq­syz­dyq kórinisterden aýlaq boldy. Osy jyldarda ótkizilgen eko­no­mı­kalyq jańǵyrtýlar elimizdi álemniń qarqyndy damyp kele jatqan memleketteri qataryna qosty. Qazaqstan óz úlgisimen halyq sany az memlekettiń búkil álemniń damýyna áser ete alatyndyǵyn dáleldedi. Iаdrolyq qarýdan bas tartý, ıntegrasııalyq bastamalar, ásirese, EQYU tór­aǵa­lary úshtiginiń quramyna kirý – munyń bári álemdik qoǵamdas­tyqtyń joǵary baǵasyna ıe boldy. Álemdegi eń iri, eń bedeldi uıymnyń sammıtiniń Astanada ótýi bizdiń elimiz úshin de, bizdiń Prezıdentimiz úshin de baǵa jetpes zor jetistik. Búgingi tańda qazaqstandyqtar elimizdiń jetistikterin Elbasy esimimen tyǵyz baılanystyrady. Bul zańdy da. Halyqaralyq bedeldi sarapshy­lar­dyń aıtqanyndaı, Qazaqstan­nyń tańqalarlyq jetistigi «Nazarbaev fenomenimen» baılanys­ty. Prezıdentimizdiń halyq al­dyn­daǵy jeke jaýapkershiligi ǵa­na birlik, turaqtylyq, qarqyn­dy damý sııaqty mańyzdy jetistikterge ákeldi. Elimizdiń táýelsizdiginiń 20 jyl­dyǵy qarsańynda alda kóp­tegen jańa maqsattar, memle­keti­mizdiń uzaq merzimdi damý baǵdar­lamasyn oryndaý mindeti, Qazaq­stannyń 2030 jylǵa deıingi damý strategııasynyń kezekti satysy – 2020 jylǵa deıingi damý jospary tur. Mine, osy mindetterdiń bárin iske asyrý tek naǵyz lıderdiń qolynan keledi, al bizdiń elimizde Ult Kóshbasshysy – bizdiń Tuń­ǵysh Prezıdentimiz Nursultan Na­z­ar­baev. Ol – bizdiń jospar­larymyzdyń iske asýynyń, mem­leketimizdiń nyǵaıýynyń, turaq­ty­ly­ǵynyń, beıbit ómirimizdiń, otbasymyzdyń beıbitshiliginiń ke­pi­li, elimizdiń damýynyń basty ıdeıalyq demeýshisi. Sondyqtan biz, Qazaqstan halqy ózimizdiń Pre­zıdentimizdiń aınalasyna jı­na­lyp, birigip, ony qoldap, búkil álemge óz bolashaǵymyz úshin óz jaýapkershiligimizdi jáne beıbit ómirge, elimizdi kórkeıte, gúlden­dire túsýge umtylatyn­dyǵymyz­dy dáleldeýimiz kerek. Jalpy, saılaý bola qalǵanda da Nursultan Ábishulynyń dodadan qara úzip keletinine daý joq. Sondaı-aq, bul saılaýaldy ábi­gerden, oǵan ketetin qarjy shyǵy­nynan qutqarady. Mine, ótkendi oısha saralaı kelip, táýelsizdik aıasyndaǵy Pre­zıdentimizdiń orasan zor eńbegine kóz jetkize otyryp, shy­ǵysqa­zaqstandyqtardyń Qazaq­stan Res­pýblıkasynyń Tuńǵysh Prezıdenti Nursultan Ábishuly Nazar­baevtyń prezıdenttik merzimin uzartý jónindegi respýblıkalyq referendýmdy ótkizý týraly usynysyn qoldaımyn jáne barsha qazaqstandyqtardyń da osy údeden kórinetinine senimdimin. Osyndaı tarıhı sátte biz birlik pen biraýyzdylyqtyń burynnan qalyptasqan dástúrin jalǵas­tyramyz degen oıdamyn.

Mars ShYNTASOV, Shámshi Qaldaıaqov atyndaǵy aýyl ardagerleri keńesiniń tóraǵasy.

Aqtóbe oblysy, Qarǵaly aýdany.

* * *

BALA TILEGI

Búgingi tańda tek ata-ananyń balaǵa bergen tárbıesinen, ne bolmasa balabaqshadaǵy tár­bıeshi men mektep qabyrǵasyndaǵy ustazdar­dyń beretin tálimderinen bólek, balalardy ómir jolyna daıyndap jatqan taǵy bir erekshe qural bar. Ol úıimizdiń tórinde turatyn teledıdar. Balanyń aqylyna aqyl qosatyn da, bilim kókjıegin damytýǵa jaǵdaı jasaıtyn da, jaqsy men jamanǵa úıretetin de osy teledıdar desek eshkimniń talasy bola qoımas. Endi teledı­dardyń bir týysqan aǵamyzdyń úıine ákelgen kishigirim qýanyshyn baıandap bersem dep edim. Týysqan aǵamyzdyń aty – Arshyn, tegi – Ahmet. Sol aǵam osydan segiz jyl buryn úılengen edi. Búginde «Qazaqstan» ulttyq teleradıokorporasııasynda montaj jasaýshy qyzmetin atqarady. Al jeńgemiz bolsa, ózinen 5-6 jas kishi, qazaqy kelbetti qalanyń kádimgi aqsary kelinshegi. Ol da memlekettik qyz­mette. Bul jas otbasynyń Allanyń bergen perzenti, qazir 1-synypta oqıtyn Altynaı esimdi kishkentaı qyzy bar. Osy jas otba­synda qalyptasqan óte bir salıqaly dástúr bar. Kún saıyn keshkilik «Qazaqstan» ulttyq telearnasynyń qorytyndy jańalyqtaryn úzbeı kóredi. Anasy kishkentaı qyzy es bile bastaǵannan beri dál osy telearna jańalyq­taryn kórýdi mindettedi. Anasy úshin elde bolyp jatqan jańalyqtar, árıne, óte mańyz­dy, al kishkentaı áli mektepke bara qoımaǵan búldirshin úshin jańalyq kórýdiń nesi qyzyq dersiz. Biraq, «Qazaqstan» telearnasyn jaqsy biletin kórermender osydan eki-úsh jyl buryn jańalyqtar aıaqtalǵannan keıin oǵan qatysqan barlyq shyǵarmashylyq qyzmet­kerlerdiń aty-jónderi jazylǵan tıtr ketetinin jaqsy biledi. Sol kezde jeńgemiz «Áne, qyzym, áne, ákeńniń aty shyqty ǵoı Arshyn Ahmet degen» dep árdaıym «Jańa­lyqtar» sońynda tıtrdy qyzyna kórsetetin. Búginde sol Altynaı esimdi sińlim 1-synypta oqıdy. Anasynyń úıretken daǵdysymen «Qa­zaqstan» ulttyq telearnasynyń kúndelikti qorytyndy jańalyqtaryn úzbeı kóredi. Jaqynda sińlimniń naǵashy ájesi qońyraý shaldy maǵan. Sondaǵy buıymtaıy hat jiberý kerek eken. Sońǵy ýaqytta buqaralyq aqparat quraldarynda Elbasy Nursultan Nazar­baevtyń ókilettigin uzartý týraly referen­dýmdy qoldaý jóninde kóptegen usy­nys-pikirler jarııalanýda. Kúndelikti jańa­lyqty qalt jibermeıtin Altynaı sińlim elde bolyp jatqan mańyzdy saıası oqıǵanyń mánin óz betinshe túsinip, Elbasy Nursultan Nazarbaevqa hat jazypty. Naǵashy ájesi sóz sońynda: «Bala degen perishte ǵoı! Qazir Prezıdentimizdiń ókilettigin uzartý týraly naýqan bastaldy. Hat jaz dep eshqaısysy Altynaıǵa kelip aıtqan da joq, bir kúni tańerteń ózinen-ózi kelip «Áje myna hatty Nursultan atama jibereıikshi. Qoly tıgen kezde múmkin oqyp ta qalar» dedi. Balanyń tileýin perishteler tez qabyl etedi deýshi edi ǵoı. Láıim solaı bolsa qazaǵymyzdyń aıy taǵy da ońynan týdy degen sóz. Shyraǵym, Altynaıdyń hatyn Prezıdentke joldap berseń jaqsy bolar edi» – degen bolatyn. Sóıtsem №64 orta mekteptiń 1-synyp oqýshysy Altynaı Ahmetova El­basy­na bylaı dep jazypty: «Sálemetsiz be Nursultan Ata! Kele jatqan Jańa jylyńyzben! Sizge zor densaýlyq tileımin! Men byltyr daıyndyq synybynda oqy­ǵam. Sizdiń jetpis jyldyq mereı­toıy­ńyzǵa bir tórttik, jetpis bes bestik baǵa alǵanmyn. Bıyl 1-synypta oqımyn. Nursultan Ata, meniń armanym – on birinshi synypty bitirgenshe siz Patsha bola berseńiz eken. Men qaıtsem de on birinshi synypty «Altyn belgige» bitiremin. Sony sizdiń seksen jyldy­ǵyńyzǵa arnaımyn. Apam da bıyl qajylyqqa barǵanda meniń armandaǵanymdaı tilepti. Ámın! Sálemmen, Astana qalasyndaǵy №64 mekteptiń 1 «Á» synyp oqýshysy Ahmetova Altynaı».

Araı ÚIRENIShBEKQYZY.

* * *

BIRAÝYZDAN QOLDADY

Astanadaǵy «Qazaqstan» or­ta­lyq konsert zalynda «Qazaq­stan-2020: jańa onjyldyqtaǵy – jańa Qazaqstan» atty konferensııa ótip, onda sóılegender N.Nazar­baev­tyń prezıdenttik óki­lettigin 2020 jylǵa deıin uzartý týraly referendým ótkizýdi bir­aýyzdan qoldady. Búgingi kúni Nursultan Nazar­baev­tyń prezıdenttik ókilettigin uzartý týraly referendým ótkizýdi qoldap 2 mln.-nan astam qazaqstandyq qol qoı­ǵany belgili bolyp otyr. Qoldardyń bári de aımaqtyq saılaý ýchaskelerinde qajetti tekserý prose­dýra­larynan ótken. Qol jınaý 2011 jyldyń 10 qańtaryna deıin jalǵasady. Konferensııa jumysy osy úderis týraly jınalǵandarǵa aqparat berýden bastaldy. Odan ári shyǵyp sóıleý­shi­lerdiń bári de Tuńǵysh Prezıdentimiz N.Nazar­baevtyń ókilettigin uzartýdyń qajettigi týraly oı tolǵady. Olardyń arasynda Memleket tarıhy ınstıtýty­nyń dıre­k­tory, professor Búrkitbaı Aıaǵan, Parlament Senatynyń depý­taty, akademık Ǵa­rı­folla Esim, Parlament Májilisiniń de­pý­taty Aldan Smaıyl, Qazaqstan Jazý­shylar odaǵy Astana qalalyq fılıaly­nyń tóraǵasy Ákim Tarazı, aqyn Serik Turǵynbek, Qazaqstan halqy Assambleıasy Tóraǵa­synyń orynbasary, «Rada» ýkraın ult­tyq odaǵynyń prezıdenti Iýrıı Tımoshenko, Astana qalasy bilim berý salasy ardagerleri keńesiniń tóraıymy Raısa Dembıskaıa jáne t.b. boldy. Konferensııaǵa qatysýshylar О́ske­men qalasynda qoǵam músheleri kótergen El­basy Nursultan Nazarbaev­tyń prezıdenttik ókilettigin 2020 jyl­ǵa deıin uzartý jóninde búkilhalyqtyq bastamany qol­daı­tyndyqtary týraly úndeý qabyldady.

«Egemen-aqparat».

* * *

KELEShEKTI OILAÝ BARShAMYZǴA PARYZ

Búginde álem halyqtary úshin Qazaqstan adamzat ıgiligi jolyn­daǵy asa mańyzdy  ıdeıalar orta­ly­ǵy bolyp tanylýda. Bul rette El­ba­sy eńbeginiń orasan zor ekeni aıt­pasa da túsinikti. Keshegi álem­di aýzyna qaratqan Astana Sam­mıti­niń ózi qazaq halqy­nyń uly ister­diń jarshysy bola alatyn jasampaz el ekenin tórt­kúl dú­nıege dá­lel­dep berdi. Prezıdentimiz N.Nazarbaev mem­lekettik bılikti jetildirý men ja­ńartýda kórshiles elderge qaraǵanda oza qımyldap keledi. Memlekettik qyzmet, sybaılas jemqorlyqpen kú­res, ulttyq qaýipsizdik pen qorǵa­nys, parlamenttik júıe, aımaqtyq bılik júıelerin úılestirýdiń qu­qyq­­tyq júıesin jasaýda da Qazaq­stan óz kórshilerine ónege kórsetýde. Nursultan Nazarbaevtyń ishki, syrtqy saıasattaǵy bastamalary jurt­­shylyq kóńilinen shyǵyp keledi. El keleshegin oılaý – bári­mizge paryz. Halqymyzdyń tarıhı taǵ­dyry­nyń eń bir tar jol, taı­ǵaq keshý, taýqymetti tusynda, tipti birjolata quryp ketý qaýpi tóngende, ósip-órkendeýge múm­kin­dik alatyn eń sońǵy maıdanǵa ju­mylǵan tusta, júreginiń túgi, ta­banynyń búri, kó­ńi­liniń nury bar Kóshbasshy tap bol­ǵanyna táýbe degenimiz jón. Áıt­pese keshegi jıyr­ma jyl bu­ryn­ǵy Qa­zaq­stan­ǵa bir mezet kóz tastap kó­rińizshi. Qandaı zamandardan óttik? TMD elderindegi búgingi bo­lyp jatqan saıası jaǵ­daılardyń, ha­lyq­tyq dúmpýlerdiń barlyǵy, árı­ne, el basqarýshynyń biliktiligine tikeleı baılanysty jaǵ­daılar. Qazirgi tańda Qazaq eli úshin asa mańyzdy jaǵdaı – ol tynyshtyq, turaqty­lyq. Qandaı jaǵdaı bolmasyn biz elimizdiń ishki saıası turaqtylyǵy men ha­lyqaralyq qatynastardaǵy tu­raq­ty­lyǵyna múddelimiz. Qazaq­stan­da ǵumyr keship jatqan halyq úshin baǵa jetpes qazyna el tynyshtyǵy ekeni aqıqat. Osy sebepti jalpy ishki kemshilikterdi kórgende irikpeı, synap-mineı berýge bolatyn shyǵar, al el na­my­sy, halyqtyń abyroıy, mem­le­ket­tiń mereıi synǵa túsip tur­ǵan tus­ta bolmashydan ilik izdep el­diktiń berekesin ketirmeýimiz kerek. Osy rette men Elbasy Nur­sul­tan Nazarbaevtyń ókilettigin 2020 jylǵa deıin uzartý maq­sa­tynda búkilhalyqtyq referendým ótkizý jónindegi bastamany quptaımyn jáne de halyqty osy ıdeıa jolynda birge bolýǵa sha­qyramyn. Al Elba­symyzdyń óz halqynyń usynysyn qabyl ala­tynyna senemin.

Taljan RAIYMBERDIEV, Q.A.Iаsaýı atyndaǵy Halyqaralyq qazaq-túrik ýnıversıtetiniń vıse-prezıdenti,  Bekzat Sattarhanov atyndaǵy «NAMYS» jastar qoǵamdyq birlestiginiń tóraǵasy.