Alaıaqtarǵa aldanǵandarǵa arasha kerek

Depýtat dabyly

Osy jyldyń qarasha aıynda «Nur Otan» HDP Mańǵystaý oblystyq fı­lı­alynda qoǵamdyq qabyldaý ótkizý kezin­de maǵan kelgen Aqtaý qala­sy­nyń tur­ǵy­ny M.K.Mahanovanyń ary­zy tómen­degi jáıtke nazar aýdartýǵa negiz bolyp otyr. 2009 jyldyń naýryz aıynda M.K.Ma­hanova ózine jáne otbasynyń taǵy eki mú­shesine (ákesine jáne apasyna) «Kaspi Vank» aksıonerlik qoǵamynyń Aqtaý fılıalynyń qyzmetkerleri tarapynan ózderiniń syrty­nan jalpy somasy 3 mln. teńge kóleminde ne­sıe alý jónindegi zańsyz shart jasal­ǵa­nyn anyqtaıdy. Bul fakt jóninde M.K.Ma­hanova tıisti organ­darǵa aryzdanyp, onyń aryzy boıynsha Mańǵystaý oblysy boı­yn­sha Ekono­mı­ka­lyq jáne sybaılas jem­qor­lyq qyl­mys­qa qarsy kúres jónindegi departamenti (qarjy polısııasy) tergeý júr­gizip, onyń ba­rysynda bank qyzmetkerleri tarapy­nan osyndaı alaıaqtyq jolmen 40-qa jýyq adam ústinen jalǵan nesıelik shart jasalyp, qarjy alynǵanyn anyqtaıdy. Jasalǵan qoljazba saraptamasy (pocherkovedcheskaıa ekspertıza) nátıjesinde M.K.Ma­hanova men onyń otbasy múshe­leri atynan qujattarda qoıylǵan qol olardyń qoly emestigi de belgili bolady. Alaıaqtyqpen olardyń ústinen nesıe alǵan «Kaspi Vank» AQ AF «Hard Kollekshen» bóliminiń bas mamany N.­O.Ab­­dollaevanyń ústinen 25.05.2009 j. jáne 10.06.2009 j. Qazaqstan Respýblıkasy Qyl­mystyq kodeksiniń 177-baby 3-bó­li­gi­niń b) tarmaqshasy boıynsha qyl­mys­tyq is qoz­ǵalǵan. 29.07.2009 j. N.O.Ab­dollaeva Qyl­mystyq kodekstiń atalǵan baby boıynsha «Iri mólsherde jasaǵan alaıaqtyǵy» úshin aıyptalǵan jáne Aqtaý qalalyq soty sýdıasynyń sanksııasy boıynsha «qamaý» túrindegi bultartpaý sharasy alynǵan. Alaıda, belgisiz sebeptermen N.­O.Ab­­dollaevanyń qashyp ketýine baılanysty búgingi tańda oǵan izdeý salynyp, Qazaq­stan Res­pýblıkasy Qylmystyq is júr­gi­zý ko­deksi­niń 50-baby 1-bóliminiń 2-tar­ma­ǵy boı­ynsha qylmystyq is júrgizý toqtatylǵan. Al, alaıaqtyqtan zardap shekken M.K.Ma­hanovanyń jáne onyń otbasynyń múshe­lerine nesıe alý úshin jasalǵan zańsyz shart­tardyń kúshi áli kúnge deıin joıyl­maǵan. Shart boıynsha kórsetilgen nesıe somasyna aıyp­pul eseptelýde kórinedi jáne bank qyzmet­kerleri aı saıyn nesıeni tóleý jónindegi eskertpeler men hattaryn zardap shekken azamat­tarǵa joldaýyn doǵarar emes. Aryzdanýshy ózderiniń moraldyq, materıaldyq zardap shegip, kúndiz kúlki, túnde uıqysynan aıyrylǵanyn aıtyp, osy zańsyz nesıelerdi ózderiniń moı­ny­nan alyp tastaýdy suraıdy. Elimizdiń Bas prokýratýrasy osyndaı zardap shegýshilerdiń sanynyń kóp bo­lýy­na baılanysty Qazaqstan Respýb­lı­ka­sy zań­namasy aıasynda osy máselemen aına­ly­satyn tıisti memlekettik organdardyń jumysyna qadaǵalaý jasap, prokýrorlyq tekserý júrgizip, ádildiktiń ornaýyna yqpal etse, nur ústine nur bolar edi. Gúlnar SEIITMAǴANBETOVA, Májilis depýtaty.