El qalaýy – elbasy ókilettigin uzartý

Elbasymen birgemiz!

Qazaqstandyqtar N.Nazarbaevtyń prezıdenttik ókilettigin uzartýdy qoldaıdy

El qalaýy – elbasy ókilettigin uzartý

Referendým ótkizý jónindegi bastamashy top jetekshisi, Shákárim atyndaǵy Semeı memlekettik ýnıversıtetiniń rektory Erlan Sydyqovpen  áńgime – Erlan Báttashuly,  qazir­de búkil respýblıka kóleminde bas­tamashy toptar qurylyp, El­basy ókilettigin jalpyh­a­lyq­­tyq referendým jolymen 2020 jylǵa deıin uzartý maq­sa­tymen qol jınaý jumysy óz máre­sine kelip jetti. Aıtpaq­shy, bul bas­tamanyń ózi eń al­dymen Shy­ǵystan bastaldy emes pe? – Iá, durys aıtasyz. Biraq, mun­daı bastama baıtaq Qazaq­stan­nyń qaı túkpirinen shyqsa da tańyrqap, tańdanýdyń reti joq. О́ıtkeni, Qazaqstan Respýblıka­sy­nyń Tuńǵysh Prezıdenti Nur­sultan Nazarbaevty búginde barsha qazaqstandyqtar Ult Kósh­bas­shysy retinde tanyp, moıyn­dap otyr. Bul endigi jerde dálel­deýdi kerek etpeıtin shyndyq. Solaı deı otyryp, osy ıgilikti  bastama nege aldymen elimizdiń shyǵysynan bastaldy degen su­raqqa jaýap berelik. Egerde ata tarıhymyzǵa úńil­sek, túrki halqynyń ata jurty bolyp tabylatyn qazaq eli úshin Altaı taýynyń orny men jóni bólek. Ataqty Bilge qaǵan da Altaıdaı ata qonysyn, ásirese myzǵymas el birligin dáripteı kelip, «Túrki halqy úshin túnde uıyqtamadym, kúndiz otyrma­dym. Jalańash halyqty kıimdi, jarly halyqty baı qyldym, az halyqty kóp qyldym» demeı me? Al endi keshegi Alash arystary she? Alǵash qazaq avtonomııasyn qurý máselesi osy shyǵysta kóterilip, Alashorda úkimeti Semeıde qyzmet atqardy emes pe? Bir sózben aıtqanda, Elbasymyz­dyń prezıdenttik ókilettigin 2020 jyl­ǵa deıin uzartý týraly máse­leniń aldymen shyǵystan basta­lýynda osyndaı ózindik bir tarıhı zań­dylyq bar sııaqty. Bul – bir. Ekinshiden, ótkendegi tarıhy­myzǵa taǵy da zer salalyq. Ju­myr jerdegi úlesin at tuıaǵyna baılaǵan túrki babamyzdan mura bolyp qalǵan saıyn qazaq saha­ra­synyń biraz bóligi jat qolyn­da ketkenin kesh bildik. Ata ta­rı­hymyzdy tasqa tańbalaǵan Kúl­tegin men Tonykók babalary­myzdyń eskertkishteri de mońǵol jerinde jel ótinde mújilýde. Eger Elbasy ózi kóterip, basta­mashy bolmasa osy tarıhı jádi­ger­lerimizdiń kóshirmesi Astana­daǵy Lev Gýmılev atyndaǵy Eýrazııa ulttyq ýnıversıtetine ákep qoıylmas ta edi. Elbasymyzdyń bul talaby óskeleń jas urpaq ata tarıhyn bilip júrsin degen ıgi tilekten týyndasa  kerek. Árige barmaı-aq keshegi táýel­siz­dik alǵan jyldardy eske túsi­reıikshi. Qıraǵan ekonomıkany qaıta qalpyna keltirip, ydyra­ǵan saıası júıeni jańadan quryp ornyqtyrý degeniń jeke óz aldyna, eń bastysy, bul qazaq jeriniń biryńǵaı tutastyǵyn, ıaǵnı Qazaqstan memlekettiliginiń túp negizin saqtap qalýdyń taǵy bir tarazyǵa tartylǵan sáti edi. Mysalǵa, qazirgi oblys orta­lyǵy О́skemendegi sonaý toqsanynshy jyldardaǵy ekonomıkalyq qıyn­dyqtan týyndaǵan áleýmettik qıynshylyqtardy qaıtip umy­tarsyń! Keıbireýler osy «ári-sári» kóńil kúıdi paıdalanyp, О́s­kemendi bólip almaqqa umtyl­ǵany da shyndyq. Mine, osyndaı syn saǵatta elimizdiń birligi men jerimizdiń tutastyǵy Nursultan Ábishulynyń sarabdal saıasaty­nyń arqasynda saqtalyp qaldy. Bireýge bilektiń kúshimen, ekin­shilerge qantógispen kelip jatqan táýelsizdik qazaqqa Elbasynyń sarabdal saıasatynyń arqasynda beıbit jolmen keldi. Biraq, táýel­sizdiktiń bul joly beıbit bolǵanmen, quny asa qymbat bol­dy. El tozyp, jer kúızelip, ult­tyq sana joǵala jazdap baryp jettik bul kúnge. Alyptardy dú­nıege ákelgen Semeı óńirine, mamyrajaı tirlik keship, beıqam otyrǵan qamkóńil qalyń qazaq­tyń ortasynda atom qarýy syna bolyp qaǵyldy. Al osy qyryq jylǵy qyr­ǵynǵa tosqaýyl qoı­ǵan da elimiz­diń Tuńǵysh Prezıdenti N.Á.Na­zarbaev bolatyn. Sóz basynda aıtqandaı, Elba­sy ókilettigi elimizdiń qaı jerinde kóterilse de oryndy deı oty­ryp, elimizdiń shyǵysyndaǵy bu­ryn-sońǵy tarıhı jaıttardyń da bizdiń bastamashy topqa qoz­ǵaý salǵanyn aıtpasqa bolmaıdy. – Bastamashy top qalaı qurylǵanyn aıtyp jatyrsyz, al oǵan jetekshilik etýde tań­daý nelikten sizge tústi? Bas­tamashy top quramy týra­ly aıta ketseńiz? – Aı júzdi aq baltasymen jaýyn qashyryp, azýly aq óleńi­men el birligin tolǵaýyna qosqan Aqtamberdi jyraý, ataly eldiń balasy, bataly sózdiń baǵbany Aqtaılaq bı, zamanym dep zar qaqqan Dýlat aqyn, adamzat oıy­nyń alyby sanalǵan, el bolýdyń qamyn oılaǵan hakim Abaı, iri oıshyl Shákárim, sýretker Áýe­zov­ter – shyraıly shyǵystyń perzentteri. Elimizdiń Tuńǵysh Prezıdentine aq batasyn bergen de osy eldiń danagóı abyz aq­saqaly Shákir Ábenov bolatyn. Másele tańdaý kimge túske­nin­de emes, másele osyndaı ıgi bas­ta­manyń ulylar elinde kóteril­ge­ninde der edim. Bolmasa bas­tamashy top quramyndaǵy jeti adamnyń qaı-qaısysy bolsyn, top tóraǵasy bolýǵa laıyq jandar. Osy oraıda, olardyń túrli ult ókilderi, túrli mamandyq ıeleri ekendigin aıta ketsem deımin. – Al sol ortaq maqsat túıini nede dep bilesiz? – Iá, qazir ejelden ańsaǵan egemendigine qol jetkizgen qazaq eli damý men qaryshtaýdyń joly­na túsip, álemdik órkenıetke umtylýda. Dalasyndaı darhan­dyq, asqar taýlaryndaı asqaqtyq  qazaqtyń alpys eki tamyryn ıdirgen qanynda bar qasıet. My­saly, eńsesi ezilip, jany jan­shyl­ǵanmen saǵy syna qoımaǵan qazaq elin táýelsizdik jyldary Ult Kóshbasshysy birden qııaǵa jeteledi. Týǵan eldiń tuǵyryn bıiktetip, memlekettik til márte­besin bekitip, qoldanys aıasyn keńeıtý, ózge el kapıtaldaryn tıimdi ınvestısııalaý, ulttyq eko­­nomıkany aıaǵynan tik turǵyzyp, ony álemdik básekege qabiletti qylý, bilim berý reformasyn álem­dik standarttarǵa saı qurý, asqaq kelbetti Astanany turǵyzý, dinbasylarynyń álemdik dıalo­gyn qurý – bári-bári tikeleı El­basymyzdyń kóregen saıasaty men qajyrly eńbeginiń nátıje­sinde júzege asyp otyrǵany sózsiz. Ertegi áleminiń qaharmanyndaı qa­zaq jurtynyń saǵat sanap emes, sát sanap kórkeıýiniń, jeti qat kókke zymyraǵan samuryqtaı jyldamdyǵynyń qupııasy nede, kilti qaıda? Bul eń aldymen eli­mizdiń baq-talaıyna, peshenesine buıyryp, ult áleýetin kúsheıtýdi kózdegen Elbasyndaı tulǵa bitkendiginde bolyp otyr. Tarıhı múmkindikti paıdalanyp, ulttyq memlekettiń negizin qalaǵan El­ba­sy tańdaýy – eldigimiz, egemendigimiz bolǵanda, ultymyzdyń da óz tańdaýyn jasaıtyn ýaqyty áldeqashan jetti. Olaı bolsa, ulylar mekeni sanalatyn Semeı halqynyń eldikti nyǵaıtyp, egemendikti aspandatý jolynda taǵy bir kezekti qadamyn tańdap, jańa­shyl ıdeıasyn usynatyn sát tý­ǵan-dy. Ol – kópshiliktiń kó­keıinde, jurtshylyqtyń júre­gin­de júrgen ımandaı aq nıeti. Bir jaǵadan bas, bir jeńnen qol shyǵaryp, birlik pen yntymaq­tyń uıytqysy bolǵan Ult Kósh­bas­shysy N.Á.Nazarbaevtyń 2020 jylǵa deıin ókilettigin uzartý tý­raly jalpyhalyqtyq referendým ótkizý dál qazir, osy ýaqytta qajet. Nege deseńiz Nursultan Ábishulynyń ókilettigin uzartý arqyly aldaǵy kúnge degen úmi­timiz ornyǵyp, senimimiz bekı túspek. Al ıdeıanyń aıtylýy bar da, onyń júzege asýy bir basqa. «Elbasy-2020» jalpyhalyqtyq aksııasy barsha kózi ashyq, kóki­regi oıaý jandy beıjaı qaldyr­maı, búginde  búkil qazaqstan­dyq­tardyń osy ıdeıa tóńireginde tutastaı uıysyp, ony jalpyha­lyqtyq referendým deńgeıine kóte­rýge qoldaý kórsetip jatqa­ny memlekettik damý men dáýir­leýdiń jańa kezeńine kóterilgeni­mizdi kórsetse kerek. Mine, Elba­sy ókilettigin uzartý týraly má­se­lesiniń dál qazir kóterilýine negizinen osyndaı ómirlik mańy­zy zor oı-tujyrymdar túrtki bol­ǵan edi. Salıqaly Sammıttiń sońyn ala kóterilgen bul bastama jer-jerden údere kóterilip qoldaý taýyp jatsa, bul bizdiń kóregendigimiz emes, bul eń aldy­men Elbasynyń óz halqy aldyn­daǵy kemeńger kisilik kelbeti, bıik bedel-abyroıy. Biz osy bir halyqtyń kókeıinde júrgen búr­shikke nár berdik. Halyq kóńili­niń búri ashylyp, kókeıdegisi gúl jaryp jatsa, bizdiń maqsattyń oryndalǵany. О́ıtkeni, biz halyq pen Prezıdent arasyndaǵy al­tyn arqaýdy jalǵaýshylardyń biri ǵanamyz. Qashanda sol joldan taımaımyz. – Sóz sońynda respýblıka­lyq referendým ótkizý jónin­degi bastamaǵa oraı qol jınaý qorytyndysyna qysqasha toqtala ketseńiz... – Búginde respýblıka halqy­nyń jalpy sany 16 mıllıon tó­ńi­reginde bolsa, al saılaýshylar sany sonyń teń jarymyn quraı­dy eken. Al sol barlyq saılaý­shynyń teń jarymynan, naqty­lap aıtqanda, 4 mıllıonnan asta­my referendým ótkizýdi qoldap otyr. Muny biz otandas­ta­ry­myz­dyń Elbasyna degen qur­meti men senimi dep túsinemiz. Al Elbasy tarapynan refe­ren­dýmdy ótkizý­ge Jarlyq shyqqan jaǵdaıda elimizdiń jer-jerinde qurylǵan bastamashy top óz ju­mysymyzdy odan ári jal­ǵas­ty­ratyn bolamyz. Halyq tilegi orta jolda qal­maıdy dep senemiz! Áńgimeńizge rahmet. Áńgimelesken Dáýlet SEISENULY.

Er jigittiń bir jurty – naǵashysy Semeıde bastamashy top Elbasy Nursultan Nazarbaevtyń prezıdenttik ókilettigin 2020 jyl­dyń 6 jeltoqsanyna deıin uzartý týraly bastama kóterdi. Memleket basshysynyń naǵashy jurty atynan men de bul bastamany qoldaı­tyndy­ǵymdy bildirsem deımin. Jalpy, «Egemen Qazaqstan» gazetiniń betinen qazaqstandyqtardyń, olardyń ishinde eldegi tanymal azamattardyń, sondaı-aq sheteldik belgili memleket basshylary men saıasatkerlerdiń Nursultan Ábishuly týraly aıtqan jaqsy pikirlerin oqyp, tóbem kókke jetkendeı qýanamyn. Biz soǵys kezinde býyny bekip, buǵanasy qat_paǵan balamyz. Soǵan qaramastan, aýyldaǵy úl­ken kisilermen, áıeldermen birge qyrmanda eńbek­tendik. Sonda kelimsekterdiń bizderdi «qazaq» demeı, «qyrǵyz» dep kemsitetinderi áli kúnge esimnen ketpeıdi. Al qazirgi kezde qazaq atyn álem tanyǵanyna Allaǵa shúkirshilik etemin. Jáne de muny birinshi kezekte Qazaqstannyń Tuńǵysh Prezıdenti Nursultan Nazarbaevtyń eren eńbeginiń arqasy dep bilemin. Jańylmasam, Nursultan 7-synyptyń jarty jylyn Qasyq aýylynda naǵashysy Aıdapkeldiń úıinde jatyp oqydy. Synyptastary Qasyqbaı Asaýbaev, Sultan Qoshqarbaev sabaqtan qınalǵan kezderinde Nursultannyń kómektesip turǵanyn ámse esterinen shyǵarǵan emes. Aıdapkel aqsaqal Uly Otan soǵysynan bir aıaǵynan jambasynan tómen aıyrylyp kelgen ardager edi. Nursultan atqaryp júrgen jumysynyń jaýapkershiligi men aýyrlyǵyna qaramastan, ýaqyt taýyp naǵashy­syna sálem berip qaıtýdy árkez esinde ustaıtyn. Muny Elbasynyń ózine ǵana tán qarapaıymdy­lyǵynan, adamgershiliginen, baýyrmaldyǵynan dep túsinemin. Al Nursultandy 1992 jyly naǵashysy Aıdapkel aqsaqaldyń jyldyǵyna kelgende taǵy kórdim. Myna sýret Prezıdenttiń sol joly naǵashyla­rynyń ortasynda túsken sýreti bolyp tabylady. Sózimniń sońynda Nursultan Ábishulynyń Qazaq eli men Qazaqstan halqynyń ósip-órkendeýi úshin atqaryp júrgen qyzmetine sáttilik tileımin. Nábı ERMEKBAI, eńbek ardageri, halyq aǵartý isiniń ozyq qyzmetkeri. Jambyl oblysy, Qordaı aýdany, Qordaı aýyly. Maqsaty – qazaqstandyqtardy baqytty etý Tilshiler qosynynyń telefony shyldyr­lap qoıa berdi. Onyń qulaǵyn kótergen kezde arǵy jaqtan bul «Egemen Qazaqstannyń» Oraldaǵy tilshisi me?» degen egde er adamnyń daýsy estildi. Iá, sonyń dál ózi. Qulaǵym sizde. Sharýańyzdy aıta berińiz, dedim men. Qaraǵym, meniń aty-jónim Uzaqbaı Habıev. Qyryq jyldan astam ýaqyt  halyq aǵartý salasynda qyzmet etken zeınetker ustazbyn. Sharýam bireý ǵana. Elbasymyzdyń ókilet­tigin referendým ótkizý jolymen 2020 jylǵa deıin uzartý jónindegi usynysty qoldaımyn. Kempirim Márııa da osyndaı pikirde. Ekeý­mizdiń soǵan baılanysty aıtatyn birqatar oı-pikirlerimiz bar. Sony «Egemenge» qalaı jetkize alamyz? Qyzmet ornyńyz qaı jerde edi? Biz baryp shyǵaıyq. Uzaqbaı aǵa, maǵan kelmeı-aq qoıyńyzdar. Úıińizge ózim ba­raıyn. Meken-jaıyńyzdy aıtsańyz jetedi. Osy áńgimeden soń kóp keshikpeı erli-zaıypty Uzaqbaı aǵa men Márııa jeńgeıdiń úıine jettim. Amandyq saýlyqtan soń Uzekeń Elbasy jónindegi áńgimesin bastap ketti. – Men zeınet jasyndaǵy qarapaıym aýyl adamymyn. Elbasymyz jóninde aıtaıyn degen oı-pikirlerim kóptiń kóńilinen shyǵyp, oılarymen úndesip jatsa, maqsatymnyń oryn­dalǵany. Osy zamanǵa deıin halqy­myz­dyń kórmegen qıyndyǵy kemde-kem. Ámir­shildik-ákimshilik júıeniń san túrli ozbyr­lyqtaryn bastarynan keshirdi. Kolbındeı «qańǵyp kelgen shúregeıdiń» Qazaqstandy basqarǵan kezin de basymyzdan ótkerdik. О́z elin basqara alatyn birde-bir ult azamaty joq degenge qatty arlandyq, namystandyq. Bári de ótti, ketti ǵoı. Qazaqstannyń búgingi jetken jetistikteri arqyly el basqarýdyń tamasha úlgisin kórsetip, dáleldegen Nursul­tan Nazarbaev boldy. Ol qazaq ultynyń ishinde el basqarýǵa laıyqty azamattardyń bar ekendigin kúlli dúnıege tanyta aldy. Men, árıne, Nursultan Ábishulynyń óz halqy úshin tyndyrǵan isterine qatysty burynnan belgili jáıtterdi qaıtalaǵym kelmeıdi. Tek Ult Kóshbasshysynyń eń názik másele – memlekettik tilge qatysty usta­nymy jóninde aıta ketkendi jón kóremin. N.Á.Nazarbaev kóp ultty Qazaqstannyń etnıkalyq ereksheligin eskere otyryp, memlekettik tildi revolıýsııalyq jolmen emes, evolıýsııalyq jolmen damytý jolyn tańdady dep túsinemin. Bul – ulttyq ıdeologııanyń altyn qazyǵy. Menińshe, ana tilimizdiń mártebesin osylaısha baıyppen kóterý saıasaty birden-bir durys jol boldy ǵoı dep esepteımin. Onyń sebebi de túsinikti emes pe? Sol kezde el ekonomıkasyna barynsha kúsh berip turǵan, naryqtyq ekonomıkany engizýde sheshýshi ról atqarǵan respýblıka halqynyń elý paıyzyn quraıtyn orystildi qazaqstan­dyqtar bolǵany jasyryn emes. Osyndaı tujyrymdy ǵylym men bilim, densaýlyq saqtaý salalaryna qatysty jasaýǵa da ábden bolady. Árıne mundaı jaǵdaıda Elbasynyń til máselesine óte sergek qarap, baıyppen sheshkeni óte quptarlyq is. Bir sózben aıtqanda, memlekettik tilimiz­diń qadir-qasıeti tómendese, bul túptep kelgende ulttyǵymyzdan aıyrylyp qalýǵa ákelip soqtyratynyn Elbasymyz bilmeıdi emes, óte jaqsy biledi dep túsinýimiz kerek. Mine, sondyqtan da Elbasymyz memlekettik tildi damytýǵa qatysty óziniń prezıdenttik ókilettigi sheńberinde tıisti sharalar belgilep, iske asyryp keledi. Vengr halqynyń belgili ǵalymy Bolıaı: «Jer betinde jalǵyz baqytsyz bar kezde jaıbaraqat baqytty ómir súrý múmkin emes. О́mir muraty kúlli adamzatty alańsyz baqytty etý» degen eken. Sol sekildi Elbasymyzdyń 16 mıllıon qazaqstandyqty qalaı baqytty etemin dep sharq uryp, tynym tappaı júrgenine kýá bolyp otyrmyz. Memleket basshysy munyń basty joly ǵylym men bilimdi damytý dep sanaıdy. Qazaqstandyqtar Nursultan Ábishulynyń álem tanyǵan bedeli men abyroıyn, saıası salmaǵyn paıdalana otyryp, ózi jasaǵan strategııalyq baǵdarlamasyn iske asyrýǵa múmkindik týǵyzsa, odan esh utylmas edi. Munyń basty joly Prezıdent ókilettigin referendým ótkizý jolymen 2020 jylǵa deıin uzartý bolmaq. Bizder Márııa ekeýmiz Nursultan Ábish­ulyn halyqty ózine tabyndyra bilgen tulǵa dep tanımyz. Tek biz ǵana emes, qazaqstan­dyqtardyń kópshiligi osyndaı oıda ekenine shek keltire almaımyz. Al halyqty ózine tabyndyra bilý degenniń ózi – mańdaı termen keletin kól-kósir eńbek, ári onyń nátıjesi men jemisi dep túsinemiz. Sol sekildi elimizdegi ár basshy men qarapaıym adamdar ózderi ómir súrip, eńbek etip júrgen oblystary men aýdandarynda, aýyldarynda jaqsy isterimen adamdardyń júreginen oryn ala bilse, sodan artyq mereı, baqyt joq shyǵar. Jaqsy qashan da isimen jaqsy bolyp qala bermek. Sol jaqsylardyń bastaýynda elimizdiń Tuńǵysh Prezıdenti Nursultan Nazarbaev tur. Uzaqbaı aqsaqal áńgimesin osylaı aıaqtady. Temir QUSAIYN, Batys Qazaqstan oblysy. «Referendým ótkizý zańǵa qaıshy kelmeıdi» Keshe Almatydaǵy D.Qonaev atyndaǵy ýnıversıtette elimizdiń bilikti zańgerleri jınalyp, Qazaqstan Respýblıkasy Tuńǵysh Prezıdentiniń ókilettigin 2020 jylǵa deıin uzartýǵa qatysty refendým ótkizýdiń zańdylyǵyn talqylady. – Quqyqtyq jaǵynan alǵanda referendým ótkizý eshqandaı zań­ǵa qaıshy kelmeıdi, – deıdi «Zań­gerler – ádiletti saılaý úshin» respýb­lı­kalyq qoǵamdyq birles­ti­giniń ókil­deri. Qoǵamdyq birles­tiktiń keńeı­tilgen otyrysynda respýblıkalyq referendým ótki­zý zańdyq turǵyda zańdy ma degen suraqqa kásibı turǵyda jan-jaq­ty túsinik berildi. Jalpy, Konstıtýsııaǵa jáne «Respýblıkalyq referendým tý­raly», «Qazaqstan Respýblı­ka­syn­daǵy saılaý týraly» zańdarǵa sáı­kes, memleket óziniń qoǵam­dyq-saıa­sı ómirindegi kez-kelgen má­selege qatysty referendým ótkize alady. Eger Prezıdenttiń ózi referendým ótkizýge kelispegen jaǵdaıda, Parlament depý­tat­tarynyń basym daýsymen de referendým ótkizýge bolady, – deıdi zańgerler. Zańgerlerdiń basyn biriktiretin qoǵamdyq birlestiktiń teń tór­aǵasy Dáýlet Baıdildınov referendým ót­kizýge barlyq qa­jetti quqyqtyq talaptardyń bar ekendigin joǵa­ry­daǵy zańdarǵa sáıkes dáıekteı kele, memleket qurýdyń mysaldaryn kásibı tur­ǵyda alǵa tartty. Quqyqtanýshy ǵalymdar referendým ótkizýdiń álemdik jáne otan­dyq tájirıbelerin saraptaı kele, Parlament depýtattary kóp­shilik da­ýyspen «Qazaqstan Res­pýblıkasy Konstı­týsııa­sy­nyń 42-babyna óz­ger­týler men to­lyqtyrýlar engizý týraly» Zań­dy qabyldaýǵa tolyq qu­qyqtary bar degen qorytyndyǵa kelip otyr. Jáne qazirdiń ózinde referendým ótkizýge 4 mıllıon qa­zaq­standyq daýys berip úlgergen úde­risti jal­ǵastyrý da eshbir zań­dy belinen basýshylyq bolyp tabyl­maıdy. Elimizdegi eń bedeldi joǵary oqý oryndarynyń zańger oqymys­ty­lary Qazaqstan halqy memlekettik bıliktiń biregeı qaınar kózi retinde referendým ótkizý týraly bastamaǵa muryndyq bolýǵa qu­qyqtary bar ekendigin alǵa tar­tady. Táýel­siz­di­gimizdiń 20 jyl­dyǵy qarsańynda hal­qymyz dál osyndaı qadamǵa ba­rýy tarıhı tur­ǵydan da ádiletti sheshim bo­lyp tabylatyndyǵyn Shaı­mardan Sháripov, Uzaqbaı Qu­daı­bergenov, Ivan Zenkevıch syndy tanymal zańgerler atap ótti. Jáne ǵalym­dar bul ıdeıany barlyq tur­ǵyda qoldap, júzege asyrý, jan-jaqty kómek berý memlekettik tu­tas­tyǵymyzǵa qyzmet etetindigin naq­ty mysaldarmen atady. Memleket basshysynyń strategııalyq us­tanymyn úzdiksiz, ret-retimen jal­ǵastyrý respýblıkamyzdyń saıası turǵydaǵy jáne ekono­mı­kalyq ba­ǵyttaǵy turaqtylyǵyna qyzmet etetinin el zańgerleri biraýyzdan qýattap otyr. Iаǵnı, qajettilikten týyndaǵan osynaý qadamnyń qanshalyqty zańǵa sáıkes bolyp tabyla­tyn­dy­ǵyn kásibı turǵyda saralap ótken zańgerler dúnıe júzindegi referendýmdar tarıhyna sholý ja­sady. Osy ýaqytqa deıin dúnıeniń tórt shalǵaıynda mundaı referendým 449 ret ótkizilgen eken. – Biz respýblıkalyq referen­dým­nyń ótkizilýin qoldap qana qoı­maımyz jáne onyń sátti ótýi­ne múddeli azamat retinde atsaly­satyn bolamyz, – deıdi Ál-Fa­rabı atyndaǵy Qazaq Ulttyq ýnıversıteti zań fakýltetiniń kons­tı­­tý­sııalyq-quqyqtyq kafe­dra­sy­nyń do­senti Aqylbek Isabekov. «О́zimiz kórip otyrǵandaı, Prezıdent Nursultan Nazarbaevtyń kons­­tıtýsıonalızm ıdealdaryn us­tan­ǵandyǵynyń jáne onyń qyzme­ti­niń kórnekti kópqyrlylyǵynyń arqa­syn­da Memleket pen Azamat­tyń ara­syndaǵy senimdi qarym-qatynas barynsha qalyptasýda; adam­­dardyń sanasy men kúndelikti ómirine kons­tıtýsııalyq qundy­lyq­tar sińisti bola bastady; turǵyn­dardyń quqyq­tyq mádenıeti men onyń bılikke degen seniminiń deń­geıi ósti; jalpy zańdyq tetikter men sottardyń, quqyq qorǵaý or­gandary qyzmetiniń tıimdiligi men kásipqoılyǵy jo­ǵa­rylady» delingen úndeýde. Zańgerlerimiz elimizdiń saıası-qoǵamdyq ómirindegi ilkimdi isterdi ilgeriletý úshin Elbasynyń óki­let­tigin uzartýdyń kókeıkestiligin qu­qyq­tyq turǵyda qýattap otyr. Aınash ESALI, Almaty. Metallýrgter quptaýy Qazaqstannyń elektrolız za­ýy­tynda Prezıdent Nursultan Nazarbaevtyń ókilettigin uzartý týraly referendým ótkizýdi qoldaýǵa oraı mıtıngi bolyp ótti. Oǵan «Qazaqstan elektrolız zaýyty» AQ jáne «Qazaqstan alıýmınııi» AQ prezıdenti Almaz Ibragımov, qos kásiporyn­nyń óndiristik eńbek ujymdary qatysty. Halyqaralyq deńgeıde laıyq­ty orynǵa shyǵyp, qurmetke ıe bola bastaǵan elimizdiń búgingi jetistikteri Elbasynyń esimimen tikeleı baılanysty. Elimizdi talaı qıyndyqtan alyp shyǵyp, qazirgi damyǵan qoǵamdy qalyp­tas­tyrýǵa eńbek etti. Bul mem­lekettiń keleshek ósý baǵyttaryn da belgilep berdi. «Qazaq­stan-2030» Strategııasyndaǵy maqsattar qa­zir de  oryndalýda. Memleket bas­shysy halyqqa bergen ýáde­lerin oryndap, talaı márte senim údesinen shyqty. Eldegi áleý­mettik-ekonomıkalyq jaǵ­daı­dyń kóterilýine yqpal etti. «Aldy­men ekonomıka» degen qaǵıdany berik ustaǵan Elbasynyń bergen tapsyrmalary men oılary, ıdeıa­lary dittegen jerin dóp basyp, nátıjeli boldy. Almaz Ibragımov qos zaýyttyń ujymy Memleket basshysy atyna úndeý ázirlep, Prezıdent ókilettigin uzartýdy biraýyzdan quptaıty­nyn atap ótti. «Qanatty metall» óndiretin irgeli kásiporynnyń alǵashqy jáne ekinshi kezegin iske qosýǵa mártebeli Elbasy arnaıy qatysyp, tusaýyn kesken. Tipti, zaýyttyń bastan-aıaq quryly­syna Memleket basshysynyń ózi tikeleı qoldaý jasady. Elimizde metallýrgııa salasyn damytýǵa aıryqsha nazar bólinýde, bul salada jyl sanap iri óndiris nysandary ashylýda. Mıtıngi sońynda Elbasy aty­na joldanatyn úndeýge jı­yn­­ǵa qatysqan zaýyt jumys­kerleriniń barlyǵy qol qoıdy. Farıda BYQAI, Pavlodar.