Sharyndaǵy «Qyzyl sý» ábigeri

Jetisý jerinde de qys qa­hary erekshe sezilýde. Qań­tardyń alǵashqy aptasyndaǵy  sýyq jurtty qysyp, aıaz 30 gradýsqa deıin jetti. Aptanyń basynda kúnniń yzǵary synyp, ońtústik aımaqqa jyly aýa jetkendeı boldy. Sonyń áse­ri­nen be, Uıǵyr aýdanyndaǵy Sharyn eldi mekenindegi atal­ǵan ózendegi «qyzyl sý» ja­ǵalaýǵa jaqyn ornalasqan 50 úıdiń aýlasyna kirip, alań­datatyn oqıǵa oryn aldy. Máselege  oraı oblystyq tó­ten­she jaǵdaılar departamenti jáne apattyq qutqarý ju­mystary qyzmeti memlekettik mekemesi baspasóz qyzmetiniń bas mamany Aıdos Ońǵarovpen habarlasqanda ol tómendegi jaǵdaılardy jetkizdi. 10 qańtar kúni saǵat 18-den asqanda Shonjy aýy­lyn­daǵy №10 órt sóndirý bólimine shuǵyl habar túsken. Onda Sharyn ózenindegi muz ústine  kóterilgen sý 15-20 santımetr bıiktikte úılerdiń aýla­laryna jaıylǵany aıtyl­ǵan. Oqıǵa oryn alǵan jerge aýdan ákimi men jaýapty sala mamandary baryp, jaǵdaımen tanysyp, turǵyndardyń zardap shekpeýi úshin jumys júrgizdi. 200-ge jýyq turǵyn qaýipsiz jerge kóshirildi.     Seısenbi kúngi jaǵdaı boıynsha, 250 úıdiń aýlasyna sý jaıylyp, 350 adam osyndaǵy eki mektep pen týǵan-týystarynyń úılerine ornalas­tyryldy. Qutqarý jumys­ta­ryna tótenshe jaǵdaılar sala­synyń 36 adam men turǵyndar esebinen 250 adam tartylyp, olar úı múlikterin sý astynda qal­dyrmaýǵa baılanysty qut­qarý sha­ralarymen aınalysýda. Sha­ryn aýylyn 5950 halyq mekendeıdi. «Qyzyl sýdan» zardap shekkender tirkelmegen. Ob­lys­tyq tótenshe jaǵdaılar jó­nindegi departamenttiń málime­tin­she,  ózen arnasyn buryp, tosqaýyl qoıýǵa  tehnıka men adam kúshi jetkilikti jumyl­dyrylǵan. Kúmisjan BAIJAN, Almaty oblysy.