Ishki ister qyzmetin jetildiretin keńes

Keshe Ortalyq kommýnıkasııalar qyzmetinde Qazaq gýmanıtarlyq zań ýnıversıtetiniń qylmystyq-prosestik zertteýler jáne sybaılas jemqorlyqqa qarsy is-qımyl ǴZI dırektory, IIM janyndaǵy qoǵamdyq keńes tóraǵasy, Prezıdent janyndaǵy quqyq qorǵaý organdaryndaǵy kadr saıasaty jónindegi memlekettik komıssııa múshesi Marat Qoǵamov arnaıy brıfıng ótkizdi. Atalǵan shara IIM janyndaǵy qoǵamdyq keńesi jáne aýmaqtyq IID-niń janyndaǵy konsýltatıvtik-keńesshi organdardyń jumysyna arnaldy. Negizinen bul jumys «100 naqty qadam» – Ult Josparynyń 31-shi qadamyn júzege asyrýdan týyndap otyrǵany belgili. Buǵan deıin qabyldanǵan «Qoǵamdyq keńester týraly» zańnyń talaptaryna sáıkes, Ishki ister mınıstrligi qoǵamdyq keńesti qurý jónindegi jumys tobynyń múshelerin saılaý týraly konkýrs jarııalaǵan edi. Sonymen birge, ústimizdegi jyldyń 12-21 aqpanynda atalǵan keńes múshelerin saılaý týraly konkýrs jarııalanyp, onyń erejesiniń jobasy da ázirlengen bolatyn. Qoǵamdyq keńes quramyna kirýge nıet bildirgen kandıdattardan 32 usynys túsip, jarııalanǵan konkýrs qorytyndysy boıynsha jumys tobynyń quramy jasaqtaldy. Onyń quramyna belgili qoǵam qaıratkerleri, halyqaralyq jáne respýblıkalyq qoǵamdyq uıymdar ókilderi, quqyq qorǵaýshylar (barlyǵy azamattyq qoǵamnan 12 múshe, IIM-nen 5 ókil) kirip otyr. Osyǵan oraı, aǵymdaǵy jylǵy 29 aqpanda Qoǵamdyq keńestiń birinshi uıymdastyrýshylyq otyrysy ótkizilip, onda tóraǵa, hatshy jáne keńes prezıdıýmynyń barlyq quramy saılandy. Qoǵamdyq keńestiń qazirgi tóraǵasy Marat Qoǵamov málim etkenindeı, ishki ister organdary júıesinde qoǵamdyq keńester 2007 jyldan beri jumys istep keledi eken. Sonyń barysynda osy ishki ister organdary júıesindegi qordalanǵan tájirıbeler jaqynda qabyldanǵan zańdyq qujatta kórinis taýypty. Tóraǵa, sondaı-aq, Qoǵamdyq keńeste eki komıssııa qurylǵandyǵynan da habardar ete ketti. Onyń birinshisi quqyqtyq-shyǵarmashylyq qyzmet máseleleri jónindegi komıssııa bolsa, ol IIM-de ázirlenetin azamattardyń quqyqtaryna, bostandyqtary men mindetterine qatysty normatıvtik-quqyqtyq aktiler jobalaryn qaraıtyny erekshe ataldy. Sondaı-aq, IIM-de azamattardyń aryzdaryn qaraýǵa jáne polısııa qyzmetiniń ashyqtyǵyn qamtamasyz etýge qatysty máseleler jónindegi komıssııa da qurylyp otyr. Negizinen jańadan qurylǵan Qoǵamdyq keńes jónindegi barlyq aqparatpen vedomstvolyq veb-portaldan tanysýǵa bolady. Onda Qoǵamdyq keńestiń jáne ony qurý jónindegi jumys tobynyń quramy, ereje, buıryqtar, keńes otyrysynyń hattamasy, azamattardy qabyldaý týraly habarlandyrý jáne ózge de aqparattar ornalastyrylǵan. Onyń ústine Qoǵamdyq keńes aıyna eki ret azamattardy jeke qabyldaýdy júzege asyratyn bolady. Sonymen qatar, azamattar Qoǵamdyq keńeske vedomstvolyq saıt nemese «Elektrondy úkimet» portaly arqyly júgine alady. Budan basqa, IIM-niń ortalyq ǵımaratynyń kireberisinde jeke poshta jáshigi ornatylǵan. Osynda túsetin barlyq hattar Qoǵamdyq keńestiń qaraýy úshin tikeleı beriletin bolady. Sondaı-aq, «Ishki ister organdary týraly» zańǵa sáıkes, barlyq óńirlik IID-de birinshi basshylardyń buıryqtarymen konsýltatıvtik-keńesshi organdar qurylyp, ádep normalaryn buzǵan polısııa qyzmetkerleriniń áreketterine qatysty azamattardyń aryzdaryn qaraý ókilettigi de berilgen. О́ńirlerdegi IID konsýltatıvtik-keńesshi organdarynyń jumys praktıkasy IIM-niń kadr jumysy departamentimen aı saıyn qaralady jáne taldanylady. IIM janyndaǵy qoǵamdyq keńes tóraǵasy bul rette óńirlerde tıimdi kezdesýler bolyp ótkendigin, sonyń nátıjesi boıynsha naqty qyzmettik jazbalar men usynymdar joldanǵanyn erekshe atap ketti. Bul usynymdar ishki ister organdary júıesin jetildirýge ózindik úlesin qosatyn bolady. Asqar TURAPBAIULY, «Egemen Qazaqstan».