QOSTANAI. 31 naýryz. Qazaqstan Sýretshiler odaǵynyń múshesi Baıan Batalovanyń 55 jastyq mereıtoıyna arnalǵan «Týǵan jer – altyn besik» atty derbes kórmesi ashyldy. Onda qostanaılyqtar Baıannyń keskindeme, músin, grafıka jáne batıkte oryndalǵan 60-tan astam shyǵarmasyn tamashalady. Bul týraly egemen.kz tilshisi habarlady.
Monýmentaldy jáne stanokty músin óneri salasyndaǵy daryndy sýretshi-músinshi Baıan Batalovanyń esimi qostanaılyqtarǵa jaqsy tanys. Ol 1995 jyldan beri sýretshiler odaǵynyń múshesi. oblys ákiminiń jáne Qostanaı mesenattar klýby «Qazyna» syılyǵynyń ıegeri. Sondaı-aq, sýretshi KSRO kórkemsýret akademııasynyń I.E.Repın atyndaǵy Lenıngrad keskindeme, músin jáne sáýlet ınstıtýtynda jetekshi músinshilerden dáris alyp, tamasha kásibı daıyndyqtan ótken.
Baıan Batalovanyń Qostanaı men oblys aýdandaryndaǵy birqatar monýmentaldy jumystaryna jerlesteri súısine qaraıdy. HVIII ǵasyrdaǵy tarıhı tulǵa, orta júzdiń bıi Qaz daýysty Qazybektiń, Qarabalyq poselkesindegi M.Seralınniń eskertkishi, Qostanaı memlekettik ýnıversıtetindegi A. Baıtursynovtyń keýde músini jáne osyndaı jumystar Baıannyń qolynan shyqqan. Búkilodaqtyq, halyqaralyq, oblystyq jáne qalalyq kórmelerdiń qatysýshysy bolǵan onyń shyǵarmalary alýan túrliligi jáne ǵajaıyp úndestigimen erekshelenedi.
Baıan Batalovanyń týyndylary Qazaqstan Sýretshiler odaǵynyń 80 jyldyǵyna arnalǵan «Qazaq óneri» bes tomdyq kitabyna jáne «Músin. Monýmentaldy-sándik óner» kitabyna engen.
Kórmeniń ashylýynda onyń talantyn qurmetteıtin jurtshylyq pen qylqalam ustaǵan áriptesteri Baıan Joldybaıqyzynyń eńbegin joǵary baǵalady, ystyq tilekterin aıtty.
Sýretshi Nıkolaı Torshın: «Baıan úlken mektepten, belgili ustazdardan bilim alǵan talantty sýretshi. Ol ár baǵytta, ár janrda jumys isteıdi. Ekiniń biri olaı ete almaıdy. Maǵan onyń jıvopıstik jumystary erekshe unaıdy, olar ómirden oıyp alǵandaı áser etedi », – dedi.
Názıra Járimbetova.
Derek, foto: egemen.kz.
