Maqsat – jerdi tıimdi paıdalaný

Jer halqymyzdyń basty baılyǵy. Sondyqtan, ony barynsha tıimdi paıdalaný qashanda kún tártibinen túsken emes. Ulttyq ekonomıka mınıstrliginiń oblys ákimdigimen birlese otyryp, «100 naqty qadam» Ult Josparyn júzege asyrý aıasynda ótkizgen keńesinde Jer kodeksine jáne basqa zańnamalyq aktilerge engizilgen ózgerister keńinen túsindirildi. Oblystyq basqarmalar men departamentter basshylary, aýdan ákimderiniń orynbasarlary jáne aýyl ákimderi, aýylsharýashylyq taýar óndirýshileri qatysqan alqaly jıynda aýyl sharýashylyǵy maqsatyndaǵy jerlerdi tıimdi paıdalaný, qurylys salasyndaǵy jańa engizilimder, sondaı-aq, salyq jáne keden zańnamalaryna engiziletin ózgerister syndy ózekti máseleler talqylandy. Keńesti qysqasha sóz sóılep ashqan oblys ákimi Berdibek Saparbaev jıynǵa qatysýshylarǵa bul máselege óte jaýapkershilikpen qaraý kerektigin qadap aıtty. Ol oblysta 25 mıllıon gektar aýyl sharýashylyǵy maqsatyndaǵy jer bar ekenin, sonyń 1 mıllıon gektarǵa jýyǵy eginshilikke jaramdy ekenin tilge tıek ete kelip, 112 myń gektar jerdiń paıdalanylmaı jatqanyn atap ótti. Bıyl aýksıon arqyly 184 myń gektar jer satylatynyn, osynshama alqapty satýǵa daıyndaý qujattaryn jasaýǵa 58 mıllıon teńge qarjy bólingenin jetkizdi. Keńeste sóz alǵan Ulttyq ekonomıka vıse-mınıstri Qaıyr­bek О́skenbaevtyń aıtýynsha, qazirgi kúnde elimizdegi aýyl sharýashylyǵy maqsatyndaǵy jerlerdiń 99,5 mıllıon gektary, ıaǵnı 99,7 paıyzy uzaq merzimdi jalǵa berilgen, tek 1,3 paıyzy jeke menshikte eken. «100 naqty qadam» Ult Josparynyń 35 jáne 36-qadamdaryn júzege asyrý aıasynda aýyl sharýashylyǵy maqsatyndaǵy jerlerdi jeke-menshikke berýdiń jańa tetigin engizý úshin 2015 jylǵy 2 qarashada «Jer kodeksine ózgerister men tolyqtyrýlar engizý týraly» zań qabyldandy, bul zań ústimizdegi jylǵy 1 shil­deden bastap kúshine enedi. Keńeste «100 naqty qa­dam» Ult Josparynyń 44 jáne 45-qadamdaryn, sondaı-aq, Memleket basshysynyń «Qazaqstan jańa jahandyq naqty ahýalda: ósý, reformalar, damý» atty Joldaýyn, Úkimet pen Ulttyq banktiń ekonomıkalyq jáne áleýmettik turaqtylyqty qamtamasyz etý jónindegi 2016-2018 jyldarǵa arnalǵan daǵ­darysqa qarsy is-qımyl josparyn júzege asyrý aıasynda salyq júıesin reformalaý kózdelgeni áńgime ózegine aınaldy.  Satybaldy SÁÝIRBAI, «Egemen Qazaqstan» Aqtóbe oblysy