Jánibek ÁLIMAN«Egemen Qazaqstan»
Egemen Qazaqstan • 13 Jeltoqsan, 2024
Gazet toıy qarsańynda ne nársege mán bermedik. Zerdeli oqyrmandar ózderi-aq habarlasyp, bas basylym týraly jazyp jiberip jatyr. Burynǵy basshylardyń joldap jatqan jazbalary óz aldyna. Basylymnyń arǵy-bergi ómiri, atqarǵan qyzmetteri, áýeli gazet betinde kórinip baryp sheshimin tapqan máselelerdi hatqa túsirip jibergen janashyr eldiń lebizin oqyǵanda, árıne, ujymdaǵylardyń mereıi ósip qalady. «Toıdyń bolǵanynan boladysy qyzyq» degendeı, bári-bári qamtylyp jatqan sııaqty. Túpsananyń tusbaǵdaryn bir silkip qarasaq, bári jazylyp jatqandaı kóringenimen, gazet óndirisi, «Egemen Qazaqstan»-nyń búgingi tynys-tirshiligin, beınelep aıtqanda, siz kórmegen «ot pen sýdyń» ortasyn umytyp barady ekenbiz-aý destik.
