QARAǴANDY. 23 mamyr. Qaraǵandyda ústel tennısinen jekeleı jáne komandalyq saıys boıynsha ótken el chempıonaty aıaqtaldy. Bul týraly oblystyq dene shynyqtyrý jáne sport basqarmasynyń baspasóz qyzmetine silteme jasaǵan egemen.kz tilshisi habarlady.
Áıelder arasyndaǵy komandalyq synda altyn júlde quramynda Natalıa Sladkova, Iýlııa Gas, Iýlııa Rıabova, Zaýresh Aqasheva jáne Margarıta Harechko bar qaraǵandylyq ujymǵa buıyrdy. Sonymen qatar, jekeleı synda Natalıa Sladkova men Iýlııa Gas sáıkesinshe, altyn jáne kúmis júldelerge ıe boldy. Sondaı-aq, Iýlııa Rıabova aralas jupta óner kórsetip, chempıon atandy.
Al erler arasyndaǵy jekeleı saıysta Erık Raıter kúmis medalge qol jetkizdi. Jarys qorytyndysynda qaraǵandylyq tennısshiler úsh altyn, úsh kúmis jáne bir qola medal jeńip alyp, el chempıonatynda úzdik atandy.
Qaırat Ábildınov.
Derek, foto: Qaraǵandy oblystyq dene shynyqtyrý jáne sport basqarmasynyń baspasóz qyzmeti.