– 2005 jyly el Prezıdenti «Jasyl el» qozǵalysynyń tusaýyn kesken bolatyn. Osy on jylda onyń qatarynda 250 myń jas jumys istedi, el aýmaǵynda 45 mıllıonnan astam aǵash kóshetteri otyrǵyzyldy. Munda aqtóbelik jastardyń úlesi zor.
Jalpy, aqtóbelik jastar Prezıdent bastamalaryn júzege asyrýda kóshbasshy bolyp keledi, dedi óńirge issaparmen kelgen Qazaqstan jastar kongresiniń atqarýshy dırektory Aıdyn Sábıtov. Bıyl «Jasyl el» eńbek otrıadynyń Aqtóbe óńirlik fılıaly 5 myńnan astam jasty jumyspen qamtamasyz etýdi kózdeýde. Bul – basqa óńirlerge qaraǵanda, óte joǵary kórsetkish. Bastama oblys basshylyǵynan keń qoldaý taýyp otyr. Bıylǵy jyly «Jasyl el» qozǵalysyna qatysýshylar úshin 300 mıllıon teńge bólindi.
Bul qarjy jasyleldikterdiń burynǵydan da uzaǵyraq eńbek etip, ónimdi jumys isteýlerine, sondaı-aq, eńbekaqylarynyń joǵary bolýyna jumsalatyn bolady. Olar qalany kógaldandyrý, aǵash kóshetterin otyrǵyzý, kútip-baptaý jáne qýraǵan aǵashtardy kesý jumystarymen aınalysady. Jastardyń eńbek etýlerine barlyq jaǵdaı týǵyzylǵan, jumys kıimderimen qamtamasyz etilgen. Qazirdiń ózinde olarǵa jumys isteıtin aýmaqtar belgilenip, bólindi.
Satybaldy SÁÝIRBAI, «Egemen Qazaqstan» Aqtóbe oblysy