Soltústik Qazaqstan oblysynda Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri, Konstıtýsııalyq reforma jónindegi komıssııa tóraǵasynyń orynbasary Aıda Balaevanyń jetekshiligimen «Ádiletti jáne Progressıvti Qazaqstannyń Halyqtyq Konstıtýsııasy úshin!» jalpyulttyq koalısııasy músheleriniń «Zelenyı Sever» jylyjaı kesheniniń eńbek ujymymen kezdesý ótti, dep habarlaıdy Egemen.kz.
Jıynǵa Parlament ókilderi, qoǵamdyq ınstıtýttar men jastar uıymdarynyń músheleri, sarapshylar, mádenıet salasynyń ókilderi, sondaı-aq kásiporyn basshylyǵy men qyzmetkerleri qatysty.
Otyrysta Aıda Balaeva jańa Konstıtýsııanyń eńbek ujymdary úshin tikeleı praktıkalyq mańyzy bar negizgi erejelerine toqtaldy. Premer-mınıstrdiń orynbasary qujatta turaqty ári ekologııaǵa jaýapkershilikpen qaraýǵa baǵyttalǵan áleýmettik kepildikter men jaýapkershilik máselesi aıqyn bekitilgenin atap ótti.
«Eńbek ujymy úshin Konstıtýsııanyń máni naqty ári túsinikti. Jobada ár azamattyń eńbek etýge, qaýipsizdik pen gıgıena talaptaryna saı eńbek jaǵdaıyn talap etýge jáne eńbekaqy alýǵa quqyǵy bekitilgen. Bul – óte mańyzdy kepildikter. Sebebi eńbek adamyna degen qurmet jaı ǵana uran emes, qoǵam ómiriniń ajyramas qaǵıdasyna aınalýy kerek. Agrarlyq jáne jylyjaı óndirisi úshin aıryqsha mánge ıe taǵy bir másele bar. Konstıtýsııada tabıǵatqa janashyrlyqpen qaraý, ekologııalyq mádenıetti qalyptastyrý jáne keleshek aldyndaǵy jaýapkershilik sekildi qundylyqtar kórinis tabady. Demek, damý jaýapkershilikpen qatar júrýi qajet. Adamǵa, zań men tártipke qurmetpen qarap, bolashaqqa qamqorlyq jasaý – basty ustanym bolýy tıis», dedi Aıda Balaeva.
Jańa Konstıtýsııa jobasynyń negizgi erejelerin talqylaýdy jalǵastyra otyryp, «M. Qozybaev atyndaǵy Soltústik Qazaqstan ýnıversıteti» Dırektorlar keńesiniń tóraǵasy Ǵalym Baıtýk áleýmettik sala boıynsha oı qozǵady. Onyń aıtýynsha, Qazaqstannyń áleýmettik memleket retindegi mártebesin saqtaý, sondaı-aq otbasy, ana men bala jáne muqtaj azamattardy qoldaý qaǵıdattaryn bekitý – jańartylǵan Konstıtýsııanyń basty baǵdarlarynyń biri bolyp qala beredi.
«Konstıtýsııa jobasynda Qazaqstannyń áleýmettik memleket retindegi sıpaty naqty aıqyndalǵan, áleýmettik baǵyt tolyq saqtalǵan. Bul – otbasylardy, balalardy, kópbalaly analardy jáne kómekke zárý jandardy qoldaýǵa qatysty memlekettiń mindettemeleri ózgerissiz qalady degen sóz. Qarjy kólemi jóninde pikirtalas bolýy múmkin, alaıda áleýmettik saıasat – memlekettiliktiń ózegi ári adamgershilik qaǵıdat. Prezıdent Qasym-Jomart Toqaev áleýmettik máselelerde halyqty árdaıym qoldaý qajet ekenin únemi aıtyp keledi», dedi Ǵalym Baıtýk.
Saýalnama: Respondentterdiń 86,5%-y jańa Konstıtýsııa jobasyn qoldaıdy
Kezdesý sońynda qatysýshylar Konstıtýsııa jobasyndaǵy negizgi erejelerdiń tájirıbelik mánine toqtalyp, ár azamattyń jańa Konstıtýsııamen jeke tanysýynyń mańyzyn sóz etti. Koalısııa ókilderi sońǵy sheshimdi azamattar qabyldaıtynyn jetkizip, al 15 naýryz kúni ótetin respýblıkalyq referendýmda árkim óz ustanymyn bildiretinin atap ótti.
Konstıtýsııalyq reforma: Parlamenttiń jańa saıası salmaǵy