AQSh prezıdenti Donald Tramp NATO elderiniń Iranǵa qarsy amerıkalyq áskerı operasııaǵa qosylýdan bas tartýyna emosıonaldy túrde jaýap berdi. Truth Social áleýmettik jelisinde ol endi NATO elderiniń kómegine muqtaj emes ekenin málimdedi, dep habarlaıdy Egemen.kz.
Tramptyń aıtýynsha, NATO-daǵy kóptegen odaqtastar AQSh-qa Taıaý Shyǵystaǵy «Irannyń terrorıstik rejımine» qarsy áskerı operasııaǵa aralasqysy kelmeıtinin jetkizgen. Onyń sózinshe, kóptegen memleketter AQSh áreketterin qoldaıtynyn aıtqanymen, áskerı koalısııaǵa qosylýǵa daıyn emes.
«Bul meni tańǵaldyrmaıdy. Men árdaıym NATO-ny birjaqty qozǵalysy bar uıym dep sanadym. Biz jyl saıyn júzdegen mıllıard dollar jumsap, osy elderdi qorǵaımyz, al olar qıyn sátte bizge eshteńe istemeıdi», dep jazdy Tramp.
AQSh prezıdenti amerıkalyq kúshter Iran armııasyn jáne onyń basshylaryn tolyq joıǵanyn da málimdedi.
«Bizdiń áskerı jetistikterimizdi eskere otyryp, bizge endi NATO elderiniń kómegi qajet emes jáne ony qalamaımyz da. Shynynda, biz oǵan eshqashan muqtaj bolǵan emespiz», dedi ol.
Tramp bul málimdeme Japonııa, Aýstralııa jáne Ońtústik Koreıa elderine de qatysty ekenin aıtty.
О́tken aptada Tramp NATO elderin Ormuz buǵazyndaǵy qaýipsizdikti qamtamasyz etýge kómektesýge jáne sol aımaqqa áskerı kemeler jiberýge shaqyrǵan edi. Alaıda Eýropa memleketteri, Parsy shyǵanaǵy elderi, sondaı-aq Japonııa men Ońtústik Koreıa bul koalısııaǵa qosylýǵa daıyn emes ekenin bildirgen.
Aıta keteıik, buǵan deıin Iran Ormuz buǵazy arqyly keme qatynasyn qaıta jandandyrýǵa daıyn ekenin málimdedi.
Ormuz buǵazynyń buǵattalýy álemde qandaı táýekelder týdyrady?