Batys Qazaqstan oblysyndaǵy Shyńǵyrlaý aýdandyq ákimdiginiń qyzmetkeri, kámeletke tolmaǵan qyzǵa qatysty zorlyq jasady degen kúdikke ilingen er adam Oral qalasyndaǵy aýrýhanada kóz jumdy. Bul týraly óńirlik polısııa departamenti habarlady, dep jazady Egemen.kz.
Polısııanyń málimetinshe, 11 naýryz kúni qamaýda bolǵan kúdikti densaýlyǵynyń kúrt nasharlaýyna baılanysty Oral qalasyndaǵy oblystyq kópsalaly aýrýhananyń jansaqtaý bólimine jatqyzylǵan.
«Dárigerler oǵan baýyrdyń toksıkalyq zaqymdanýy, baýyr nekrozy, ınsýlınge táýelsiz qant dıabeti jáne ketoasıdoz dıagnozyn qoıǵan. 16 naýryz kúni saǵat 18:10-da esin jımastan er adam qaıtys boldy», dep habarlady polısııa.
Oqıǵa boıynsha sotqa deıingi tergeý bastaldy. Tergeý múddesine baılanysty ózge málimetter jarııalanbaıdy.
Aıta keteıik, alǵashqy málimet boıynsha, polısııaǵa jábirlenýshi qyzdyń ákesi júgingen. Onyń aıtýynsha, 2 qańtar kúni er adam onyń kámeletke tolmaǵan qyzyn aldap úıine shaqyryp, zorlaǵan.
Sol kezde BQO polısııa departamenti baspasóz qyzmeti bul aqparatty rastap, atalǵan derek boıynsha QR QK 120-baby «Kámeletke tolmaǵandy zorlaý» boıynsha qylmystyq is qozǵalǵanyn habarlaǵan.
Keıin quqyq qorǵaý organdary tergeý barysynda hat almasýlar men basqa da materıaldardy zerttep, kámeletke tolmaǵanǵa qatysty zorlyq faktisi anyqtalmaǵanyn málimdedi. Al 16 jastaǵy qyz ben onyń anasy kúdiktige eshqandaı shaǵymdary joq ekenin aıtyp, qarym-qatynas ózara kelisimmen bolǵanyn jetkizgen.
Almatyda 13 jastaǵy qyzdy zorlady degen kúdikti qamaýǵa alyndy
Alaıda qyzdyń ákesi bul aqparattyń shyndyqqa sáıkes kelmeıtinin málimdedi. Polısııada qylmystyq is boıynsha tergeý jalǵasyp jatqany habarlandy. 27 aqpanda BQO prokýratýrasy kúdiktiniń ustalyp, ýaqytsha ustaý ızolıatoryna qamalǵanyn málimdegen. Aıta keteıik, kúdikti Shyńǵyrlaý aýdany ákimdiginiń bólimderiniń birinde jumys istegen. Aryz túskennen keıin ol qyzmetinen bosatylǵan.