Atyraý oblysynyń Jangeldın aýylynda bir otbasynyń qatygezdikpen óltirilýine baılanysty is boıynsha kúdiktige taǵylǵan aıyptar tizimi keńeıtildi, dep habarlaıdy Egemen.kz
Ishki ister mınıstrliginiń málimetinshe, kúdikti Sultan Sársemalıevke qatysty Qylmystyq kodekstiń eki baby boıynsha tergeý júrgizilip jatyr:
99-baptyń 2-bóligi – «Eki nemese odan da kóp adamdy óltirý»;
188-baptyń 2-bóligi – «Aldyn ala sóz baılasý arqyly adamdar toby jasaǵan urlyq».
«Atyraý oblysy polısııa departamenti adam óltirý jáne olardyń múlkin urlaý faktileri boıynsha qylmystyq isti tergep jatyr. Kúdikti ustalyp, sottyń sanksııasymen qamaýǵa alyndy», dep habarlady IIM.
Vedomstvo ókilderi sotqa deıingi tergeý jalǵasyp jatqanyn málimdedi. Alaıda resmı jaýapta kúdiktiniń jubaıy Aqbaıan Muqanǵalıevanyń áreketine quqyqtyq baǵa beriletini týraly naqty aıtylmaǵan.
Eske sala keteıik, Atyraý oblysynda Jangeldın aýylynda turatyn otbasynyń ólimi boıynsha tergeý júrgizilip jatyr. 2025 jyldyń jeltoqsan aıynyń sońynda joǵalyp ketken zeınetkerlerdiń týystary zeınetker erli-zaıypty men olardyń eresek balalary joǵalyp ketkenin habarlaǵan.
Ol kezde otbasy belgisiz baǵytta úıden shyǵyp ketkeni aıtylyp, sodan beri olardyń qaıda ekeni belgisiz bolǵan. Izdeýde tórt adam boldy:
66 jastaǵy Maqsot Qarabalın;
64 jastaǵy Nasıp О́teshqalıeva;
35 jastaǵy qyzy Mıramgúl Qarabalına;
32 jastaǵy uly Naýryz Muqanǵalıev.
Keıin, 6 qańtarda Jangeldın aýylynda zeınetker erli-zaıyptylardyń máıitteri tabyldy. Quqyq qorǵaý organdary olardyń deneleri úı aýlasyndaǵy sharýashylyq qurylystyń astynan tabylǵanyn habarlady.
8 qańtarda polısııa is boıynsha negizgi kúdiktini jarııalady. Ol – otbasynyń 29 jastaǵy kúıeý balasy Sultan Sársemalıev. Belgili bolǵandaı, ol otbasynyń kenje qyzy Aqbaıan Muqanǵalıevamen birge elden qashyp ketken.
Kúdiktige halyqaralyq izdeý jarııalandy.
24 aqpanda Sársemalıev pen Muqanǵalıeva Indonezııanyń Senarý aýylyndaǵy qonaqúıde ustaldy.
25 aqpanda Ishki ister mınıstriniń orynbasary Sanjar Ádilov Aqbaıan Muqanǵalıeva da osy is boıynsha kúdikti retinde tanylǵanyn málimdedi.
9 naýryz keshke kúdikti erli-zaıyptylar Almatyǵa ekstradısııalanǵany belgili boldy. Sol jerde Sársemalıev Naýryz Muqanǵalıev pen Mıramgúl Qarabalınany óltirgenin moıyndap, olardyń jerlengen ornyn kórsetken.
Aǵaıyndynyń máıitteri Atyraý qalasynyń Geolog shaǵynaýdanynan tabyldy. Olar kúdikti buryn jalǵa alǵan úıdiń aýlasynan shyqqan.
11 naýryzda Qyzylqoǵa aýdany Jangeldın aýylynda aǵaly-qaryndastyń jerleý rásimi ótti.
Qazaqstanǵa qaıtarylǵannan keıin Aqbaıan Muqanǵalıeva sot-psıhıatrııalyq saraptama júrgizý úshin Atyraýdaǵy psıhıatrııalyq mekemege jiberildi. Bul týraly marqumdardyń týystary habarlady.
Keıin IIM onyń qylmysqa qatysy bar-joǵy tekserilip jatqanyn málimdedi. Qazirgi ýaqytta tergeý jalǵasyp jatyr jáne is erekshe baqylaýǵa alynǵan.
Atyraýdaǵy otbasynyń qazasy: Qylmysqa turmystyq janjal sebep bolýy múmkin