Astanada Qazaq ulttyq horeografııa akademııasy ashylady.
Keshe óner ordasyna shákirtter qabyldaý bastaldy. Bul oqý orny kóp deńgeıli kásibı horeografııalyq bilim berýdiń tolyq sıklin qamtıtyn bolady. Horeografııa akademııasynda mektep jasyndaǵy balalar men jastar balet ónerin meńgeredi.
Astana qalasy ákimdiginiń habarlaýynsha, oqý ornynda bilim berýdiń kópsatyly formasy bastapqy, tehnıkalyq jáne kásiptik, sondaı-aq, joǵary (bakalvrıat) jáne joǵary oqý ornynan keıingi (magıstratýra, doktorantýra PhD) bilim berýden turady.
Akademııa «Balet ártisi», «Bı ansambliniń ártisi», «Rejıssýra», «Horeografııa», «О́nertaný» jáne «Art-menedjment» mamandyqtary boıynsha kadrlardy daıyndaıdy. Bilim ordasynyń maqsaty – horeografııa ónerin damytý, jastarǵa rýhanı jáne estetıkalyq tárbıe berý.
Horeografııa akademııasynda balet ártisteri negizgi jalpy nemese orta jalpy bilim bazasynda kásibı bilim alatyn bolady. Shákirtter balet ónerinen biregeı tájirıbe jınaý úshin shaǵyn jáne úlken sahnalarda óner kórsetedi.
Akademııa ǵımaraty Hýseın ben Talal kóshesi, 9 mekenjaıy boıynsha EKSPO kórmesine qarsy ornalasqan. Oqýshylarǵa 498 grant usynylady. Sondaı-aq, aqyly negizde de bilim alý múmkindigi qarastyrylǵan.
– Keıde balanyń áleýeti birden kórinbeıdi. Irikteý qatań túrde júrgiziledi. Sondyqtan aqyly negizde oqý múmkindigi berilip otyr. Odan ári oqýshy ózin jaqsy kórsetse, grantqa aýysýyna bolady, – dedi Qazaq ulttyq horeografııa akademııasynyń ókili Ásel Tanısheva.
Akademııa stýdentterge jataqhana beredi. Medısınalyq qyzmet te kórsetedi.
Dastan KENJALIN,
«Egemen Qazaqstan»