Reseıdiń Irkýtsk oblysy, Osa aýdanynyń ákimi Aleksandr Grıgorev bos ýaqytynda jergilikti aýrýhanada dáriger-hırýrg bolyp jumys istep, qosymsha aqsha tapqany úshin qyzmetinen bosatyldy. Bul týraly VSE42 aqparyna súıengen egemen.kz tilshisi habarlady.
Irkýtsk oblysy prokýratýrasynyń saıtynda jazylǵandaı, aýdan basshysy osy jumysy úshin aıyna qosymsha 13 myń rýbl alyp kelgen eken. Zań organynyń pikirinshe, osy arqyly ol antıkorrýpsııalyq zańnama talabyn buzǵan. Tekserý barysynda sondaı-aq dáriger-ákimniń 2013 jáne 2014 jyldarǵy tabystary týraly anyqtamaǵa tek aýdan ákimi retinde alyp turǵan jalaqysyn ǵana kórsetkeni anyqtalǵan.
Grıgorev 2013 jyly dáriger-hırýrg bolyp isteı júrip, aı saıyn 11 myń rýblden alyp tursa, 2014 jyly aqsha mólsheri 16 myń rýblge jetken.
Aýdandyq prokýratýranyń usynysy boıynsha Osa kentiniń dýmasy depýtattary Aleksandr Grıgorevti otstavkaǵa jibergen.
Aıan Ábdýálı.
Derek, foto: VSE42.