kásiporyn 4 mıllıard 56 mıllıon teńge ótemaqy tóleıdi
Bir aı buryn «Qazsınk» kompanııasyna qarasty Talov qaldyq qoımasynda apat oryn alǵany belgili. Shyǵys Qazaqstan oblystyq tabıǵat qorǵaý prokýratýrasy qazir Rıdder ken-baıytý kombınaty qyzmetindegi ekologııalyq zań talaptarynyń saqtalýyn tekserýde.
Eske sala keteıik, qaldyq qoımasynda 22 mamyrda aınalymdaǵy sýdy shyǵarý júıesi qurylǵysynyń bir jaǵy opyrylyp, nátıjesinde qoımadan aqqan tógindi sý Fılıppovka ózenine quıylǵan bolatyn. Sýdyń tógilýi 22 mamyrdaǵy saǵat 09:30-dan 25 mamyrdaǵy saǵat 14.00-ge deıin oryn alǵan. Rıdder ken-baıytý kombınaty marksheıder bóliminiń esebine sáıkes, qoımadan aqqan sýdyń kólemi 394 452 tekshe metrdi qurady.
Apat bolǵan kúnderi oblystyq ekologııa departamentiniń mamandary ózennen birneshe synaq aldy. Alynǵan synaqty taldaý nátıjesinde sý quramynda birqatar lastaný zat tekteriniń bar ekeni anyqtaldy. Osyǵan oraı tabıǵat qorǵaý prokýratýrasy departamentke «Qazsınk» JShS-ten qorshaǵan ortaǵa keltirilgen zalaldy óndirý jáne apattyń sebebin anyqtaý, zań buzýshylyqtardy joıý týraly usynys engizdi. Departament qorshaǵan ortaǵa keltirilgen shyǵyndy eseptep, onyń somasy 4 056 237 772 teńge quraǵanyn anyqtady.
Oblystyq tabıǵat qorǵaý prokýrory Baqytjan Izǵutdınovtiń aıtýynsha, kompanııa atalǵan qarjyny bir aıdyń ishinde bıýdjetke erikti túrde quıýy qajet.
Dýman ANASh,
«Egemen Qazaqstan»
О́SKEMEN