Almatyda Aıgúl Medeýlova esimdi dáriger týabitti sańyraý balalarǵa kúrdeli ota jasaý arqyly estý qabiletin qalpyna keltirip júr. 1000-nan asa ota jasaǵan ol: «Ár operasııaǵa alǵash ret jasaıtyndaı úlken jaýapkershilikpen, tereń sezimmen kiremin», deıdi.
Medısınasy damyǵan birqatar elderde biliktiligin arttyryp kelgen Aıgúl Rahmanqyzy – týabitti sańyraýy bar balalarǵa kohlearly ımplantant qoıý operasııasyn elimizde birinshi bolyp júzege asyrǵan maman.
Kómeı papıllomasyn alý operasııasy respýblıka boıynsha osy ýaqytqa deıin qulaq-kómeı aýrýlaryna 1000-nan asa operasııa jasaǵan Aıgúl Medeýlovanyń tikeleı ózi qatysýymen ótkiziledi. Jas ta bolsa, otandyq medısınada 15 jyl jemisti eńbek etken talantty dárigerdiń biliktiligin baıqatsa kerek.
– Bala kezimnen oılaǵan maqsatymnyń bári tek qana dáriger bolý ǵana eken. Búginde súıikti jumysyma ómirimniń 65 paıyz ýaqytyn arnaımyn. Biraq men oǵan ókinbeımin. О́zimniń jeke ómirimnen 10 paıyz bolsa da joǵary dep aıtatynym, Qudaıǵa shúkir, balalarym eresek, otbasym ózimdi qoldap otyrady. Osynyń arqasynda bolar, ózim kóbine jumysqa ynta-yqylasymmen berilemin. Aldyńa álsiz úmitpen kelgen naýqas balanyń tilin tabý, onyń ata-anasymen jyly qarym-qatynas ornatý dárigerdiń paryzy ǵana emes, qabilet-deńgeıi de bolsa kerek, ózim aldyma kelgen syrqatqa bar peıilimdi arnaımyn, – deıdi dáriger.
Aıgúl Medeýlova – medısına salasynyń úzdigi, «Aqsaı» respýblıkalyq klınıkalyq aýrýhanasy dırektorynyń orynbasary, meıirban ana, ónerli áriptes. Onyń Táńirdiń ózi shıpa darytqan altyn qoldarymen jylyna 100 balaǵa asa mańyzdy ota jasalyp, jylyna 100 sábı myna dúnıeniń san alýan únine qanyǵyp jatady.
Qanat ESKENDIR,
«Egemen Qazaqstan»
ALMATY