Kelesi kezeń kerýeniniń kóshi

Fýtboldan Fransııada ótip jatqan Eýropa chempıonatynda keshe túnde toptyq kezeń oıyndary tolyq aıaqtalyp, kelesi kezeńge joldama alǵan komandalar tolyq belgili boldy. Sol ýaqytqa deıin osy kerýen kóshine ilesken quramalardyń negizgi sulbasy aıqyndalyp qoıdy. Biraq burnaǵy kúni oınalǵan matchtar birqatar kútpegen nátıjeler ákelip, dop dodasynyń dúrmegin burynǵydan beter kótere tústi. Sonyń ishinde biz horvattardyń qurlyqtyń qazirgi chempıony – ıspandardy utýlaryn, al túrikterdiń madıarlardy tize búktirýlerin osy qatarǵa qosar edik. Sol kúngi saıystar shymyl­dyǵyn S tobyndaǵy Soltústik Irlandııa – Germanııa, Ýkraına – Polsha aralaryndaǵy kezdesýler ashty. Bul eki oıyn 1:0 degen eseppen aıaqtalyp, nemister men polıaktardyń jeńisterin jarııa etti. Parıjde oınaǵan álem chempıondary Marıo Gomestiń goly arqyly brıtanııalyq ırlandtardan basym tústi. Bul oıynǵa Germanııa quramasy sonyń al­dyndaǵy polıaktarmen kezdesýge qaraǵanda, azdaǵan ózgertýlermen keldi. Osylaısha starttyq qu­ramnan tabylǵan Gomes óziniń golyn 30-mınýtta Tomas Mıýllerdiń pasynan keıin saldy. Biraq onda soǵan deıin de esep ashýdyń jaqsy múmkindigi bolǵan. Jalpy, nemister birinshi taımnyń ózinde qolaıly múmkindikteriniń bárin tıimdi paıdalana bilgende, esep keminde 5:0-ge jeter edi. Olardyń shabýylshylaryna bir mezet­teri sáttilik jetispeı jatsa, taǵy bir­de qaqpashy Maıkl Makgovern qaýiptiń bultyn tez serpip tas­tap turdy. Germanııa quramasy úzilisten keıin de osy oıynynan jańylǵan joq. О́te joǵary tártipke qurylǵan syzba oqtyn-oqtyn onyń oıynshylaryn qar­sy qaqpa aldynan shyǵarýmen bol­dy. Alaıda, aldyńǵy kez­degideı Soltústik Irlandııa ja­maǵatynyń qaqpasy quddy bir sıqyrlanyp qoıylǵandaı alynbady. Sondyqtan nemisterdiń qarqyny birtindep basyla berdi. Soǵan qaramastan, Makgovern darbazasyna qaýip tóndirilýi toqtatylmady. Tek Gomestiń ózi osy kezderi eki ret gol soǵatyn tusty múlt jiberdi. Tutas alǵanda, Ioahım Lıovtiń shákirtteri qaqpaǵa týralap 13 soqqy jasaı aldy. Sonyń bireýi ǵana qaqpaǵa darydy. Degenmen, jeńiske jetý úshin osynyń ózi jetip jatty. Sońǵy týrdan keıin 7 upaı jınaǵan nemister týrnır kes­tesinde birinshi oryn aldy. Osyn­shama upaıy bar Polsha bir dopty kem soǵýy saldarynan ekin­shi orynǵa jaıǵasty. Sóı­tip, eki qurama da 1/8 fınalǵa shyqty. Al 3 upaıy bar Soltústik Irlandııa sońǵy eki toptaǵy oıyndar qo­rytyndysyn kútedi. Marselde kezdesken Ýk­raına jáne Polsha komandalary kez­desýi taǵdyryn Kýba Blashıkovskı 54-mınýtta soqqan jalǵyz gol sheship ketti. Shyntýaıtynda, bul matchtyń týrnırdegi ahýal tur­ǵysynda pálendeı máni bolǵan joq. Qandaı eseppen jeńse de, úshinshi oryn ala almaıtyny aıdaı anyq bolyp qoıǵan ýkraındarǵa sondyqtan tas-tal­qan bolyp jeńilip, bar abyroıdan aıyrylmasa jetip jatty. Al polıaktar top basyna talasatyn basty básekelesi – Germanııa­nyń Soltústik Irlandııadan je­ńi­le qoıa­­tynyna senimdi emes edi. Mine, kezdesý de sol sebepti saqtyqqa kó­bi­rek kóńil bólgen qalypta júrip jatty. Polıaktar matchtyń bastapqy bóliginde-aq mergendikterimen kózge túser kezdi ońtaıly paıdalana almady. Keremet mezetterdi Arkadıýsh Mılık pen Robert Levandovskı bos ketirdi. Sodan keıin tizgindi ýkraındar qolǵa alyp, Lýkash Fabıanskı qaqpasy aldynda birneshe qaýipti sátterdi jasady. Ekinshi taımnyń basynda Adam Navalka alańǵa komanda lıderleriniń biri – jartylaı qorǵaýshy Iаkýb Blashıkovskıdi shyǵardy. Aınalyp kelgende, komandany jeńiske jetelegen de osy oıynshy bolyp shyqty. Budan keıin oınalǵan eki oıyn da jurtty eleń etkizgen nátıje alyp keldi. Sonyń ishinde horvattar qalaı bolǵanda pleı-off aımaǵyna túsip turǵandaryn match aldynda-aq bilgenderine qa­ra­mastan, ózderiniń myńdaǵan tileýlesteriniń kóńilderinen shyǵýdy kózdep, kezdesýge baryn sala kiristi. Bas jattyqtyrýshy Ante Chachıch osynyń aldynda chehtarmen ótken oıynǵa qaraǵanda, start­tyq quramǵa alty birdeı jańa oıynshyny engizip, burynǵy taktıkasy ózgeretinin baıqatty. Bulardyń birqatary amal joq­tyqtan jasaldy. Mysaly, komanda lıderleri Lýka Modrıch pen Marıo Mandjýkıch jaraqat alyp qalýlaryna baılanysty máj­búrlikten oıynǵa qosyla almady. Eýropanyń is basyndaǵy chempıony bolsa, qatarynan úshinshi ret bir qurammen alańǵa shyqty. Ol kezdesýdiń 7-mınýtynda-aq Alvaro Moratonyń oń qanattan Sesk Fabregas jibergen dopty qaqpaǵa qaraı buryp jiberýimen esep ashty. Biraq osydan keıin ıspandar bosańsyp sala berdi. Sosyn tizgindi qolǵa alǵan horvattar olardy barynsha qyspaqqa saldy. Aqyrynda úziliske deıin Nıkola Kalınıchtiń kúsh salýymen tarazy basyn teńestirip te úlgerdi. Olar ekinshi taımda da qarqynynan tanbady. Al 72-mınýtta Serhıo Ramos urǵan penaltıdi Danıel Sýbashıch qaıtarǵannan keıin shabýyldy údetti. Sonyń nátıjesinde oıyn sońynda Ivan Perıshıch komandasyn alǵa shyǵardy – 2:1! Al kópshilik týrnırdiń sátsiz komandalarynyń birine sanap qoıǵan túrikterdiń chehtardy 2:0 etip utyp ketýi shyn jańalyq boldy. Osy jeńistiń arqasynda eki komanda bir-birimen oryn almasyp, Anadoly jigitteri úshinshi orynǵa jyljydy. Keshe túnde Islandııa – Avs­trııa, Vengrııa – Portýgalııa, Shve­sııa – Belgııa, Italııa – Irlandııa kezdesýlerimen toptyq oıyndar tolyq aıaqtaldy. Serik PIRNAZAR, «Egemen Qazaqstan»