Shyǵys Qazaqstan oblysynyń ortalyǵynda 1500-ge jýyq kásipkerdi, sarapshylardy jáne memlekettik organdar ókilderin biriktirgen «ALTAY BUSINESS» forýmy ótti. Aýqymdy is-shara óńirdiń ekonomıkalyq áleýetin arttyrýǵa baǵyttalǵan jańa bastamalar men naqty sheshimderdi talqylaýǵa arnaldy, dep habarlaıdy Egemen.kz.
Forýmdy ShQO ákimdiginiń kásipkerlik jáne ónerkásip basqarmasy uıymdastyrdy. Sharaǵa tek bıznes ókilderi ǵana emes, óz hobbıin kreatıvti ındýstrııaǵa aınaldyrǵan, basqa óńirlerden kelgen hedlaınerler de shaqyryldy. Bul forýmnyń mazmunyn keńeıtip, tájirıbe almasý alańyna aınalýyna múmkindik berdi.
Forým aıasynda Shyǵys Qazaqstan oblysynyń ákimi Nurymbet Saqtaǵanov óńirlik kásiporyndardyń ónimderi usynylǵan kórmemen tanysty. Aımaq basshysy óńirdiń ekonomıkalyq kórsetkishterine toqtalyp, ShQO-nyń el damýyndaǵy mańyzdy ornyn atap ótti.
«Shyǵys Qazaqstan – áleýeti joǵary óńir. Búginde munda eldegi ónerkásip óndirisiniń shamamen 6% qalyptasty, ınvestısııa kólemi 838 mlrd teńgeden asady, al shaǵyn jáne orta bıznestiń ekonomıkadaǵy úlesi 24,4%-dy quraıdy. Oblysta 58 myńnan astam shaǵyn jáne orta bıznes sýbektisi jumys isteıdi, onda 157 myńnan astam adam eńbek etedi. Bul – ekonomıkalyq jáne áleýmettik turaqtylyqtyń negizi», dedi oblys ákimi.
О́ńir basshysy qazirgi kezeńde tek pikir almasý jetkiliksiz ekenin, naqty sheshimder qabyldap, birlesken áreketke kóshý qajet ekenin atap ótti. Onyń aıtýynsha, mundaı forýmdardyń basty maqsaty – jańa ıdeıalardy qoldaý jáne olardy iske asyrýǵa jaǵdaı jasaý.
ShQO-da depýtat qarjy jymqyrdy degen kúdikpen tergelip jatyr
Forým barysynda kásipkerlikti damytýdyń negizgi baǵyttary keńinen talqylandy. Atap aıtqanda, shaǵyn jáne orta bıznesti qoldaý, kompanııalardyń ósýi, agrobıznes, akvamádenıet, ara sharýashylyǵy, kreatıvti ındýstrııa, IT salasy, týrızmdi damytý, eksportty ulǵaıtý jáne jańa naryqtarǵa shyǵý máseleleri qaraldy.
Sonymen qatar qatysýshylar ákimshilik kedergilerdi azaıtý, jobalardy iske qosý rásimderin jedeldetý jáne bıznesti óńir ishinde de, syrtynda da keńeıtý joldaryn talqylady. Bul rette negizgi basymdyqtardyń biri retinde «bir tereze» qaǵıdatyn engizý máselesi kóterildi. Atalǵan júıe kásipkerlerge memlekettik qoldaý men qyzmetterdi bir ortalyqtan, artyq bıýrokratııasyz jáne ýaqyt joǵaltpaı alýyna múmkindik beredi.
Forým qorytyndysynda oblys ákimi sóz sóılep, óńirdegi kásipkerlikti damytýǵa baǵyttalǵan naqty is-qımyl tetikteri aıqyndalǵanyn atap ótti. «ALTAY BUSINESS» alańy Shyǵys Qazaqstan úshin jańa ekonomıkalyq serpin beretin mańyzdy dıalog platformasy retinde baǵalandy.
ShQO-da úsh jumysshy káriz qudyǵynda gazben ýlanyp qalǵan