Astana irgesindegi Qajymuqan aýylynda qazaqtyń dańqty balýany Qajymuqan Muńaıtpasovtyń 145 jyldyq mereıtoıy atap ótildi. Táýelsizdiktiń 25 jyldyǵymen qatar kelgen toı merekeli sharalarǵa jalǵasyp, sport saıystarmen órnekteldi.
Aldymen Selınograd aýdanynyń ákimi Malǵajar Tátkeev balýan babamyz jaıly estelikter aıtyp, sharanyń mańyzdylyǵyn atap ótti.
«Qajymuqan Muńaıtpasovtyń týǵanyna 145 jyl tolýy Táýelsizdiktiń 25 jyldyq merekesimen qatar kelip otyr. Men aýyl turǵyndaryn jáne qonaqtardy osy qos merekemen quttyqtaımyn. Búginde Qajymuqan aýyly gúldenip, ósip-órkendep keledi. Biz 2014 jyly babamyzdyń eskertkishin ornattyq. Aınalasyn qorshap, abattandyrdyq. Mektepte oǵan arnalǵan shaǵyn murajaı ashtyq. Osy arqyly óskeleń urpaqqa batyr baba erligin, Otanǵa degen súıispenshiligin, boz kilemdegi jarqyn jeńisterin aıtyp, nasıhattaýdy qolǵa aldyq. Taǵy bir aıta keterligi, Qajymuqan atamyzǵa arnalǵan osy sharanyń ótýine aýdan, aýyl kásipkerleri qol ushyn sozyp, aqsaqaldar alqasy muryndyq boldy. Barshańyzǵa zor alǵys bildiremin», – dedi aýdan ákimi.
Sonymen qatar, Malǵajar Tátkeev toıdyń ótýine atsalysqan bir top azamattardy marapattap, alǵys hat tabys etti.
Munan soń sahna tórine osy aýdannyń týmasy, kúsh synasýdan álemdik saıystardyń birneshe dúrkin jeńimpazy Sergeı Syrkýlnıkov kóterilip, úlken shege maıystyryp, shynjyr úzip, shegelerdi aǵashqa qolymen qaǵyp halyqty tańǵaldyrdy. Eń bastysy, ol úlken-úlken 12 shegeni 1 mınýt 41 sekýndta maıystyryp, álemdik rekordty jańartty. Buǵan deıin 6 shegeni 2 mınýt 35 sekýndta reseılik balýan burap tastap álem rekordyn ózgertken eken.
Shara barysynda kúres, kir tasyn kóterý sekildi sporttyq oıyndar oınalyp, kúshti jigitter temir tehnıkany súıredi.
Talǵat RAIYMBEK