Jaqynda Qazaqstannyń Mysyrdaǵy elshisi Berik Aryn Egıpet Arab Respýblıkasy Joǵarǵy konstıtýsııalyq sotynyń tóraǵasy Ábdel Ýahab Hasanmen kezdesti.
Kezdesýde elshi Á.Hasanǵa Qazaqstan Respýblıkasy Joǵarǵy Sotynyń tóraǵasy Qaırat Mámıdiń mansapqa taǵaıyndalýyna oraı quttyqtaýyn jetkizip, Qazaqstan men Mysyr arasyndaǵy sot-quqyqtyq jáne basqa da salalardaǵy yntymaqtastyqty odan ári damytýdyń joldary jóninde pikir almasty. Mysyr Prezıdenti Ábdel Fattah As-Sısıdiń ústimizdegi jylǵy aqpan aıyndaǵy Astanaǵa resmı sapary ekijaqty qarym-qatynastardyń barlyq salalarynyń damýyna jańa serpin bergeni atap ótildi.
B.Aryn suhbattasyn elimizdiń mańyzdy ishki saıası oqıǵalarymen tanystyra kelip, Qazaqstan Prezıdenti Nursultan Nazarbaevtyń tapsyrmasymen Qazaqstanda júzege asyrylýdaǵy 5 ınstıtýttyq reformalar sheńberinde atqarylyp jatqan quqyqtyq reformalar, sonyń ishinde ishki tájirıbe men ozyq halyqaralyq standarttar negizinde sot tóreligi júıesin jetildirý baǵytyndaǵy sharalar týraly habardar etti.
Syrtqy saıası bastamalarymyzǵa toqtala otyryp, elshi Qazaqstannyń 2017-2018 jyldarǵa BUU Qaýipsizdik Keńesiniń turaqty emes múshesi retinde saılanǵanyn habarlady. Buǵan qosa, ol EKSPO-2017 kórmesine daıyndyq barysymen tanystyryp, keıin onyń ınfraqurylymy negizinde «Astana» halyqaralyq qarjy ortalyǵynyń qurylatynyn jáne daýlardy sheshý úshin arnaıy sottyń jumys isteıtinin atap ótti.
Mysyrdyń Joǵarǵy konstıtýsııalyq soty eń joǵary sot bıligi retinde memlekettiń ishki saıası ómirinde mańyzdy oryn alatyndyǵyn aıta ketken jón. Atap aıtqanda, Konstıtýsııalyq sot basshysy 2013-2014 jyldar aralyǵyndaǵy Mysyrdyń qıyn ótpeli kezeńinde memleketti basqardy, al atalmysh ınstıtýt eldi saıası daǵdarystan shyǵarý boıynsha «Jol kartasyn» tabysty júzege asyrýda, sonyń ishinde eldiń jańa Konstıtýsııasy da bar.
«Egemen-aqparat»