Astananyń temirjol vokzalyna «Tulpar-Talgo» poıyzynyń mıllıonynshy jolaýshysy kelip tústi. Ol Aqtóbe qalasynan úsh birdeı nemeresimen elordasyna jol shekken Qanymaı Bekbaýova ájeı edi. О́ziniń baq qonǵan bıletpen kele jatqanynan múlde beıhabar ájeı gúl shoqtaryn usynyp, quttyqtap júrgen qaýymǵa qaıta-qaıta alǵys aıtýmen boldy.
Jaı ǵana syrǵyp kele jatqan ásem vagondardyń jaqtaýyna eriksiz kóz túsip, jan-júregińdi qýanysh kerneıdi. Sebebi, bul júrdek poıyzdyń kórkem vagondarynyń bári «Qazaqstanda jasalǵan» degen tańbalarmen ádiptelgen. Táýelsizdiktiń shırek ǵasyrdaǵy jetistigi jóninde áldekim suraı qalsa, marqaıǵan kóńilmen kórsetýge bolatyn otandyq týyndynyń biri, osy «Tulpar-Talgo» vagondary ekenin aıtýǵa aýyz barady.
Abyr-sabyrda qýanyshty habardy áreń uqqan ájeı birden kóńildenip, aǵyl-tegil qýanyshyn jasyra almaı qaldy. Resmı mekeme qyzmetkerleri bárin de aldyn ala biletin bolyp shyqty. Tek ony elden jasyrǵan. Ájeıdiń úsh nemeresine arnaıy alǵan baǵaly syılyqtary da bar eken. Sonymen birge, mıllıonynshy jolaýshyǵa el aýmaǵyndaǵy kez-kelgen baǵytqa «Tulpar-Talgo» júrdek poıyzymen 10 ret tegin júrý sertıfıkaty tabys etildi. «Qudaıdyń bereri kóp! Mıllıonynshy jolaýshy bolyp, myń-myń qýanyshqa tap bolǵanymdy qarańdarshy!», – deıdi aq jarma kóńili aǵytylǵan ájeı.
Otaǵasymen bes bala tárbıelep ósirgen ana búginde toǵyz nemeresiniń arasynda jol jalǵap júrgen kórinedi. «Bes balamnyń ekeýi osy Astanada turady. Kóz dárigeri bolyp jumys isteıtin Janar atty kelinimniń kózi nurly boldy ǵoı, alyp bergen bıleti meni mıllıonynshy jolaýshy atandyrdy», – degen ájeı tópelegen kóp suraqqa jópeldemede jaýap berip jatyr.
Osy jerde biz «Jolaýshylar tasymaly» AQ qyzmetkerin sózge tartyp, poıyzdyń jón-josyǵy jóninde surap bildik. Jalpy, jyl basynan beri otandyq poıyzdar 10 mıllıon adam tasymaldapty. Al «Tulpar-Talgo» poıyzdaryn paıdalanǵan adamdardyń sany bıyl kúrt ósip, 1 mıllıonnan asypty. Bul 2015 jylmen salystyrǵanda, 2,1 ese artyq.
Qazir «Tulpar-Talgo» poıyzdarynda kóp balaly analarǵa, soǵys ardagerlerine, múmkindigi shekteýli jandarǵa, stýdent jastarǵa jeńildik beretin dıskonttyq kartalar bar. Demek, júrdek poıyzdar ártúrli áleýmettik toptar úshin qoljetimdi bolyp otyr.
Nurbaı ELMURATOV
Sýret: Erlan OMAROV