Qazaqstan Prezıdenti Pákistan Islam Respýblıkasynyń Prezıdenti Mamnýn Hýseınge Kvetta qalasynda bolǵan terrorlyq aktige baılanysty kóńil aıtý jedelhatyn joldady.
Akorda.kz-tiń málimeti boıynsha, jedelhatta Memleket basshysynyń Kvetta qalasynda bolǵan terrorlyq akt saldarynan kóptegen jazyqsyz adamnyń qaza bolǵany týraly sýyt habardy zor kúızelispen qabyldaǵany atap ótilgen.
«Qazaqstan jahandyq qaýipsizdikke qater tóndiretin halyqaralyq ekstremızm men terrorızmniń áreketterin qatań aıyptaıdy. Álemdik qaýymdastyqtyń osy qaýip-qaterdiń taralýyna qarsy kúrestegi kúsh-jigerin tolyq qoldaımyz», – delingen jedelhatta.
Nursultan Nazarbaev qaıǵyǵa ortaqtasa otyryp, Qazaqstan halqynyń jáne jeke óziniń atynan qaza bolǵandardyń otbasylaryna jáne jaqyndaryna, sondaı-aq barsha dostas Pákistan halqyna kóńil aıtty.
Elbasy zardap shekkenderdiń tezirek saýyǵyp ketýine tilektestik bildirdi.
Aıdar О́RISBAEV