Damý ústindegi «Daryn»

Keshe Ortalyq kommýnıkasııalar qyzmetinde Bilim jáne ǵylym mınıstrligi «Daryn» res­pýblıkalyq ǵylymı-praktıkalyq ortalyǵynyń dırek­tory Sholpan Qırabaevanyń, Mektepke deıingi jáne orta bilim departamenti dırektorynyń orynbasary Zeınep Maqsutovanyń jáne matematıka páni boıynsha 57-halyqaralyq olımpıadanyń jeńimpazy, Pavlodar qalasyndaǵy «Jas daryn» mamandandyrylǵan mektebiniń 9-synyp oqýshysy Mu­ham­med-Álı Ámirdiń qatysýy­men baspasóz máslıhaty bolyp ótti. Brıfıng «Daryn» respýb­lıkalyq ǵylymı-praktıkalyq ortalyǵynyń qyzmetine arnaldy. «1996 jyly Elbasy Nursultan Nazarbaevtyń elimizde bilim berý júıesin reformalaý maqsatynda «Daryndy balalarǵa arnalǵan mektepterdi memlekettik qoldaý jáne damytý týraly» Jarlyqqa qol qoıǵany belgili. Osy qujat­tyń negizinde 1998 jyly Asta­nada «Daryn» respýblıkalyq ǵy­lymı-praktıkalyq ortalyǵy óz jumysyn bastady. Búgingi tań­da Ortalyqtyń aýyz toltyryp aıtarlyq jetistikteri barshy­lyq. Irge tasy qalanyp, isin júr­gize bastaǵan kúnnen beri halyq­aralyq olımpıadalarda, ártúrli deńgeıdegi bilim báıgelerinde aldyńǵy oryndardy alyp úlgerdi. О́tken jyldyń ózinde qazaqstandyq oqýshylar halyqaralyq jarystardan 1309 medaldi oljalady. Onyń ishinde 276 altyn, 384 kúmis, 629 qola bar. «Daryn» ortalyǵynyń 2016-2017 oqý jylyna arnalǵan jos­parlarynda matematıka, fızıka, ınformatıka pánderi boıynsha halyqaralyq Jáýtikov olımpıadasyn ótkizý kózdelgen. Oǵan shamamen 15 memleketten 50-ge jýyq komanda keledi dep kútilýde», – dedi «Daryn» respýblıkalyq ǵylymı-praktıkalyq ortalyǵynyń dırektory Sholpan Qırabaeva. Bilim jáne ǵylym mınıstr­liginiń málimeti boıynsha qazirgi tańda «Daryn» jelisine 124 maman­dandyrylǵan bilim berý uıymy kiredi. Bul mekemelerde eńbek etetin 7 741 muǵalimniń jartysy­nan kóbi joǵary sanattaǵy ustazdar ekenin aıta ketkenimiz jón. Jıyn barysynda matematıka boıynsha Gonkongte ótken 57-halyqaralyq olımpıadanyń jeńimpazy, Muhamed-Álı Ámir de óziniń oıyn ortaǵa salyp, álemdik dodadan alǵan áserimen bólisti. Qorytyndy boıynsha qorjynymyzǵa 5 medal túsken. Olardyń ishinde, 1 altyn, 1 kúmis, 3 qola jáne 1 Qurmet gramotasy baryn maqtanyshpen aıtsaq artyq bolmas. Jarysqa 100-den astam memleket ókilderi qatysyp, jalpy esepte bizdiń komanda 28-orynǵa taban tiregen. Bunyń ózi úlken jetistik. Osydan-aq, «Daryn» ortalyǵynyń júıeli jumys júrgizip jatqanyn kórýge bolady. Raýan QAIDAR, «Egemen Qazaqstan»