Sońǵy jyldary túrli ataýly kúnder paıda bolýda. Árqaısysynyń óz erekshelikteri, mańyzdylyǵy bar. Pavlodarlyqtar da «Ertis kúnin» bıyl úshinshi ret atap ótti.
Árıne, «Pavlodar geografııa úıi» qoǵamdyq birlestigi oblys ákimdiginiń qoldaýymen, «Qazhrom» AQ TUK (Eýrazııa toby quramynda (ERG) birlesip ótkizgen bul kún – Ertis ózeni jaǵasynda ornalasqan oblys ortalyǵy, ásem qalamyz úshin atyna zaty saı laıyqty mereke. Bir ýaqytta ózende 100 úlken, 2 myń kishi kemeler júrip ótip, sý betiniń sánin keltirdi. Qaıyqtarmen júzý jarysynyń ózi 4 kúnge sozyldy. Olımpıadalyq sport túriniń biri – eskek esýden endi óńiraralyq jarystar ótkizý de josparlanýda.
Jalpy, bul kúnniń maqsaty – Ertis ózeninde sport, sý týrızmin jasaý, Otanǵa, elge, jerge degen súıispenshilik, ótkenniń izderin izdeý, salamatty ómir saltyn nasıhattaý. Jaǵalaýda «Týrızm PVL-2016» kórmesi de uıymdastyryldy. Bizdiń oblys pen Reseıdiń jaǵalaýda qurylǵan shatyrlarynda sheberler, sýretshiler, qolónershiler «Ertistiń túrli-tústi tamshylary» atty kórkemóner kartınalarynyń, «Adam jáne sý» atty sý ónimderiniń, «Ertis daryndylary» shyǵarmashylyq jumystarynyń kórmesin, keme úlgileriniń ekspozısııalaryn kórsetse, týrıstik sala ókilderi de óz jumystaryn pash etti. Kórmege shyǵarylǵan týyndylardyń arasynda qaladaǵy kórkemóner, sýret mektebiniń oqýshylary jasaǵan kemeler erekshe kózge tústi. Bir kemeni jasaý úshin jarty jyldan eki jylǵa deıin ýaqyt ketken kórinedi.
Al osy ataýly kúndi ótkizýge bastama jasaǵan uıymdastyrýshy, oblys ortalyǵyndaǵy «Geografııa úıiniń» dırektory Aleksandr Vervekınniń aıtýynsha, jalpy, shara barysynda turǵyndar, jastar, balalar, birinshiden, Ertis óńiriniń tarıhy jáne geografııasymen tanysýǵa múmkindik aldy. Orys geografııa qoǵamynyń Omby óńirlik bólimshesiniń Omby-Iаmyshevo-Omby «Dorogamı Býholsa» halyqaralyq ekspedısııasy ókilderimen kezdesti. Ekspedısııa Omby qalasynyń 300 jyldyǵyna arnalypty.
Sońǵy ýaqytta transshekaralyq Ertis ózeni jaıly jıi aıtylady. Sýy azaıyp barady dep muńaıdyq. Qalyń zaýyttar ornalasqan óz óńirimizde aǵyp jatqan ózenniń, árıne, ekologııalyq ahýaly da oılantady. О́zen arnasy bıyl shúpildep erneýinen asyp-tógildi. Bıylǵy Ertistiń bulaı minez kórsetip tasýy da ǵajap kórinis edi.
– Sondyqtan, «Ertis kúni» dep atap ótkimiz kelgeni – el nazaryn aýdarý. Bizdiń maqsatymyz – úsh eldiń ortasynda aǵyp jatqan ózendi qorǵaý, saqtaý, qazirgi ósip kele jatqan balalarǵa onyń mańyzdylyǵyn, qajettiligin jetkizý, – deıdi Aleksandr Vervekın.
Aıtsa aıtqandaı, ósip kele jatqan ul-qyzdar birinshi kezekte óz jeriniń, eliniń tarıhyn, ótkenin bilýleri kerek degendi jıi aıtamyz. Geografııa, tarıh arqyly elimizdiń qaı jerinde qandaı tarıhı oryndar, ózender, kólder, obalar, qorǵandar, taýlar turǵan jer syryn bilý úshin «Ertis kúni» sııaqty tanymdyq sharalar ótkizý ábden qajet.
Farıda BYQAI,
«Egemen Qazaqstan»
PAVLODAR