Sý tapshylyǵy qazirdiń ózinde álem jurtshylyǵyn tuıyqqa tireı bastady. Ol azdaı ǵalymdar jyl ótken saıyn ahýal ýshyǵa túsetinin aıtyp otyr. Jaǵdaıdan habardar Sý resýrstary jáne ırrıgasııa mınıstrligi Memleket basshysynyń tapsyrmalaryn oryndaý úshin múddeli memlekettik organdarmen birlesip, Sý resýrstaryn basqarý júıesin damytýdyń 2024-2030 jyldarǵa arnalǵan tujyrymdamasyn bekitken edi, dep jazady Egemen.kz.
Tujyrymdamaǵa sáıkes, elimizde 42 jańa sý qoımasy salynady. Sol sekildi 37 sý qoımasy jáne 110 qurylysjaı rekonstrýksııadan ótip, 14,5 myń shaqyrym kanal jańǵyrtylýy tıis. Osyǵan qosa, 557 gıdrotehnıkalyq qurylysty kópfaktorly zerttep-qaraýdy ótkizý josparlanǵan. Sý resýrstary jáne ırrıgasııa mınıstrligi 2025 jyly 147 ınfraqurylymdyq jobaǵa (onyń ishinde 53 joba byltyr aıaqtalypty) kirisken. Onyń ishinde 677 shaqyrym ırrıgasııalyq júıelerdi jańǵyrtý, 4 sý qoımasyn rekonstrýksııalaý, 15 toptyq sý qubyryn salý, jóndeý, 3 qurylysjaıdy rekonstrýksııalaý jumystary bar.
2026 jyly úsh oblysta jańa sý qoımalary boı kóteredi
Saladaǵy ózge de jumystardyń retin Sý resýrstary jáne ırrıgasııa vıse-mınıstri Erbolat Ibraıhanov baspasóz máslıhatynda baıandady.
«Búginde Túrkistan oblysynda jalpy syıymdylyǵy 69,1 mln m3 quraıtyn 2 sý qoımasynyń qurylysy bastalǵan. Ondaǵy qurylys-montaj jumystaryn bıyl aıaqtaý kózdelgen. Sondaı-aq 5 sý qoımasyn salý boıynsha jobalar ázirlenip jatyr. Naqtylasaq, Abaı oblysynda – Qarakól jáne Qarǵyba, Batys Qazaqstan oblysynda – Kishi О́zen, Qaraǵandy oblysynda – Sadovoe, Jetisý oblysynda – Pakatılovsk sý qoımalary salynady. Budan bólek, 5 sý qoımasy boıynsha jobalar ázirlenip qoıdy. Olar Aqmola oblysyndaǵy – Esil kontrrettegishi, Jambyl oblysy – Qalǵuty, Aqmola, Batys Qazaqstan oblysynda – Úlken О́zen, Qyzylorda oblysyndaǵy – Qaraózek sý qoımasy. Jumys qarqyny bıyl da báseńdemeıdi. Búginde 8 sý qoımasy boıynsha jobalardy ázirleý josparlandy. Onyń ishinde Abaı oblysynda – Keldimurat, Kishi-Býkon, Kókterek jáne Bazar, Shyǵys Qazaqstan oblysynda – Kendirlik, Qarabuta, Alıbastr sý qoımalary bar», dedi E. Ibraıhanov.
Búginde sý qoımalaryn rekonstrýksııalaý boıynsha 5 joba ázirlengen. Jambyl oblysynda – Teris-Ashybulaq, Qaraqońyz jáne Yntaly, Shyǵys Qazaqstan oblysynda – Qandysý jáne Úıdene sý qoımalary jóndeýden ótedi. Al 7 oblystaǵy 13 sý qoımasyn rekonstrýksııalaý boıynsha jobalardy ázirleý áli jalǵasyp jatqan kórinedi. Ol azdaı bıyl Batys Qazaqstan, Qyzylorda, Qostanaı, Túrkistan jáne Soltústik Qazaqstan oblystarynda 8 sý qoımasyn rekonstrýksııalaý jobalaryn ázirleý josparda bar eken. Qysqasy, Sý resýrstaryn basqarý júıesin damytýdyń 2030 jylǵa deıingi tujyrymdamasy merziminen keshikpeı oryndalsa, jaǵdaı birshama ońalatyny anyq.
Elimizdiń sý qoımalary tasqyn sýǵa daıyn ba?