О́tken jyly Sh.Aımanov atyndaǵy «Qazaqfılm» AQ jaryqqa shyǵarǵan «Qunanbaı» fılmi kórermennen óziniń joǵary baǵasyn alǵany belgili. Endi bul otandyq fılm 5 – 11 qyrkúıek aralyǵynda Qazan qalasynda ótetin XII Qazan halyqaralyq musylman kınosy festıvaline qatyspaq.
Atalǵan konkýrsqa qatysýǵa álemniń 50 eliniń rejısserleri men prodıýserlerinen barlyǵy 700-den astam ótinish kelip túsipti. Alaıda, konkýrs baǵdarlamasyna 33 memlekettiń 60-qa tarta derekti, anımasııalyq jáne oıyn-saýyq sıpatyndaǵy fılmderi kirgen. Qazaqstandyq fılmmen Reseı, Iran, Qytaı, Serbııa, Birikken Arab Ámirlikteri, Bangladesh, Malaızııa sekildi elderdiń kıno týyndylary básekege túspek.
Bul kúnderi kórermenderdiń nazaryna konkýrstan tys keń aýqymdaǵy baǵdarlamalar da usynylady. Máselen, festıval aıasynda kınematografııa salasynyń maıtalmandarymen túrli sheberlik-saǵattar, baıqaýǵa qatysýshylarmen shyǵarmashylyq kezdesýler, kıno óneri salasynyń ózekti máselelerine arnalǵan dóńgelek ústelder men baspasóz máslıhattary uıymdastyrylady.
Konkýrstyq baǵdarlamany rejısser, ssenarıst, prodıýser Sıddık Barmak, rejısser, kınooperator Ýsman Saparov, rejısser, ssenarıst Iýsýp Razykov jáne kınooperator Valerıı Sevastıanov baǵalaıdy. Festıvalǵa tórelik etetin qazylar alqasynyń tóraǵasy – belgili kınorejısser, Reseıdiń halyq ártisi, KSRO Memlekettik syılyǵynyń laýreaty Aleksandr Proshkın.
Bul festıval – 2005 jyldan beri dástúrli túrde Tatarstan astanasynda uıymdastyrylyp kele jatqan eń aýqymdy kınokórsetilim. Festıvaldyń negizgi tujyrymdamasy «Únqatysý mádenıetinen – mádenıet únqatysýyna» urany arqyly anyq kórinis tapqan.
Jalpy, forýmnyń baǵdarlamasyna ultaralyq únqatysý ornatýdy ózek etken, beıbitsúıgishtik, ózge dinge qurmetpen qaraý, toleranttylyq sekildi ıdeıalardy basshylyqqa alǵan fılmder tańdap alynǵan.
Láıla EDILQYZY,
«Egemen Qazaqstan»