Demalys kúnderi Almaty oblysy Jambyl aýdanyndaǵy mal bazaryndaǵy saýda-sattyqtan keıin úsh birdeı aǵaıyndy azamattyń iz-túzsiz joǵalýy halyqty qatty alańdatty. Sol sebepti búgin Uzynaǵashta halyq jınalyp, joǵalǵan azamattardyń deregin anyqtaýdy talap etken bolatyn.
О́kinishke qaraı, jurt amandyǵyn jabylyp tilegen arystaı jigitter kisi qolynan qaza tapqany anyq bolyp otyr.
Qaıǵyly habardy oblystyń Ishki ister departamenti rastady. «Almaty oblysynyń Jambyl aýdany aýmaǵynan óltirilgen adamdardyń máıiti tabyldy. Bul buǵan deıin Kóksý aýdandyq Ishki ister bólimine kelip túsken shaǵym boıynsha izdestirilip jatqan azamattardyń máıitteri ekeni anyqtaldy. Qazir qylmystyq is qozǵalyp, oqıǵaǵa qatysy bar degen kúdikpen Jambyl aýdanynyń eki turǵyny tutqyndaldy. Aýdan aýmaǵynda oblystyq Ishki ister departamenti basshysynyń orynbasary N. Másimov bastaǵan jedel izdestirý toby jumys jasap jatyr», – dedi atalǵan departamenttiń baspasóz qyzmetindegiler.
Dál osy sátterde bizder Jambyl aýdanyndaǵy quzyrly mekemelerdiń basshylaryna habarlasa otyryp, aqparattyń rastyǵyn anyqtaǵan edik.
«Qazirgi ýaqytta oblystyq, aýdandyq ákimshiliktiń basshylary, quzyrly organdardyń qyzmetkerleri bir kisideı jumylyp, osy máselemen aınalysýda. Tıisti mekemelerden bólek, «Nur Otan» partııasynyń oblystyq, aýdandyq jetekshileri, máslıhat depýtattary da Uzynaǵashtaǵy qylmystyq oqıǵanyń tolyq ashylýyna, jaýyzdardyń tıisti jazasyn alýyna múddelilik tanytyp otyr. Úsh birdeı azamatynan asa qaıǵyly jaǵdaıda aıyrylǵan otbasy múshelerine kóńil aıtyp, sóılesip, barlyq amal-sharalardyń qoldanylatynyn jetkizdik. Al Uzynaǵashta bul oqıǵaǵa alańdap, tolqyǵan halyqqa da túsindirý jumystary júrgizildi. Kópshilikke basý aıtyldy. Osy qaıǵyly jaǵdaıdy paıdalanyp, eldi odan ári dúrliktirip, úreı týǵyzǵysy keletinder de bar. О́zderi azaly, ashýly otbasyn da arandatqysy kelip otyrǵandar bar. Osyny da halyqqa jetkizdik. Qazir el tarady. Al qaıǵyly oqıǵaǵa baılanysty qylmystyq is qozǵaldy. Kúdiktilerge qatysty tergeý jumystary júrgizilip jatyr. Árbir aqparatty tekserip, jaǵdaıdy tolyq baqylap otyrmyz, – dedi aýdandyq quqyq qorǵaý organdarynyń jumysyna tikeleı jaýapty, Almaty oblysy Jambyl aýdany ákiminiń birinshi orynbasary Nurlan Ertasuly.
Eske sala keteıik, ótken jeksenbi kúni Almaty oblysy Kóksý aýdanynyń turǵyndary – Jarqynbek Doldanuly, Muqııat Zarlyhanuly jáne Qadylbek Álimhan atty aǵaıyndy jigitter 2 Kamaz kóligimen Almaty oblysy Jambyl aýdany Uzynaǵash aýylyndaǵy mal bazaryna mal satýǵa barǵan. Sodan izim-qaıym joǵalǵan azamattardyń máıiti búgin tabyldy.
Qalmahanbet Muqametqalı,
Aınash Esalı.