Qaraǵandy haıýanattar baǵyndaǵy Mııa men Batyr esimdi Amýr jolbarystarynyń jubynan eki birdeı shónjik týdy. Biri – erkek, biri – urǵashy qos marǵaý búginde mamandardyń jiti qadaǵalaýymen kóz qýantyp ósip keledi.
Týǵan sátinde salmaǵy nebári 450 jáne 530 gramm ǵana bolǵan kishkentaı jyrtqyshtar búginde kózge kórinerdeı jetilip, 3 kıloǵa jýyqtaǵan. Jolbarys tuqymynyń tabıǵatynan jalǵyz júretin qasıetin eskersek, olardy juptastyrý, analyq jolbarystyń kúızelisin azaıtyp, saý urpaq alý – uzaq daıyndyq pen muqııat kútimdi talap etetin úlken eńbek.
Ásirese alǵashqy aılar eń jaýapty kezeń sanalady. Jańa týǵan shónjikterdiń ımmýnıteti álsiz, syrtqy dybys pen artyq qozǵalysqa tym sezimtal keletindikten, týsymen olar arnaıy oqshaýlanǵan, tynysh aımaqta qaraldy. Mundaı jaılylyq analyq jolbarys Mııanyń mazasyzdanbaýyna jáne marǵaýlardyń qalypty jetilýine múmkindik bergen.
«Shónjikterdiń hal-jaǵdaıy udaıy qadaǵalanyp otyr. Bizdiń zoobaqta Mııa atty jolbarys ekinshi ret kúshiktedi. Qan tazalyǵy men tuqym sapasyn saqtaý maqsatynda aldaǵy ýaqytta basqa haıýanattar baqtarymen jolbarys almasyp, popýlıasııany kóbeıtý josparda bar», deıdi haıýanattar baǵynyń jyrtqysh ańdar bóliminiń basshysy mindetin atqarýshy Aıtbek Bákibaıuly.
Amýr jolbarysy – álemdegi eń iri ári sırek kezdesetin jyrtqyshtardyń biri. Tabıǵatta onyń sany tym shekteýli bolǵandyqtan, árbir jańa týǵan shónjik – mańyzdy jańalyq.
Bul oqıǵanyń elimiz úshin mańyzy tipten bólek. Qazirgi ýaqytta kezinde joıylyp ketken Turan jolbarysynyń tarıhı mekenin qalpyna keltirý maqsatynda Ile – Balqash óńirinde Amýr jolbarysyn jersindirý jobasy júzege asyp jatyr. Ǵalymdar bul eki jolbarys popýlıasııasynyń tabıǵı-genetıkalyq turǵydan bir-birine óte jaqyn ekenin jıi alǵa tartady. Sondyqtan bir jaǵynan Ile – Balqash aımaǵynda tarıhı mekendi qaıta jańǵyrtý jumystary júrse, ekinshi jaǵynan, Qaraǵandyda Amýr jolbarysynyń jańa urpaǵynyń ósip jetilýi – eldegi bıoalýantúrlilikti saqtaý jolyndaǵy izgi qadamdardyń úndestigi ispetti.
Qaraǵandy oblysy