«Keshegi ketken Er Qorqyt, Keıingi janǵa boldy umyt», deıdi Shákárim Qudaıberdiuly. Qajylyqqa barǵan, musylmandyq jolyn tutqan Shákárim atamyzdyń osy týyndysyna den qoıǵan jan túpkilikti shyndyqtarǵa jol ashady. «Keıingi janǵa boldy umyt» dep sol zamanda aıtyp otyrǵanyn oqyǵandar jaqsy bilse kerek. Otarlyqtyń salqyny ǵana jatqan joq. Túrli aǵym men túsiniktiń qıǵashtyǵy qylań beredi sóz astarynan. Bul jerde qajynyń jazǵanyn tereńirek paıymdarǵa «Mutylǵannyń ómiri» atty shyǵarmasyna zeıin qoıǵan jón der edik. Árıne, ol – basqa áńgime.
Sóz basyndaǵy «Qorqyttyń saryny» atty shyǵarmasynda mynadaı joldar bar: «Baqsymyn jyrlap sarnaǵan,
Denem joq áser barmaǵan.
Mıdaǵy jynym‚ túgel kel,
Haqıqat iske arnaǵan!». Bizge ótkende ǵana ushyrasqan ataýly týyndy burynnan kókeıge túıgen joramaldy baılamymyzdy birjola bekitkendeı áser etti. Osy sumdyq taqyrypty Shákárimnen soń Oljas Súleımenov tipten jerine jetkize jyrlap, ǵaryshtyq ǵalamatqa ulastyryp jibergenin búkil qazaq, onyń syrtynda kúlli túrki halyqtary maqtanyshpen únemi aıtýǵa tıis edi ǵoı. Biraq bizdiń zattanǵan sanamyz oǵan jar bere me? Súleımenovteı adamzattyq aqyndy nege súıedi jurt? О́ıtkeni ol ulttyń baba tanymyna qanat bitirip, halyqtyń túpsanasyn jańǵyrtty. Ulttyq kodty ákeldi poezııaǵa. Maǵjannan, Shákárimnen keıin óz zamanynyń minberinen «Azııa alaýlary» dep jyrlady. Múmkin ol zamandy, ejelgi dáýirlerdegi rýhanııattyń asyl ózegin arqasymen ustap turǵan baqsylar bolsa, Oljas ta óz ýaqytynyń baqsysy emes pe? Júzjyldyqtar, myńjyldyqtar ótkende bir uǵymdardyń ornyn ekinshisi almastyrady, bir qundylyqtardy basqasy aýystyrady, qaıbir qasıetterdiń tek ataýy saqtalyp, qyzmetteri ózgerip ketýi bek múmkin. Baqsy túsinigi de tap sol sekildi, ultynyń baǵyna týǵan baqshylar (arqaly azamattar) halqynyń baq-juldyzyn jaqpaı qoımaıdy. Sol úshin mehnatty joldan ótip, azap keship, qalǵyǵan sanany oıatyp, uly rýhtardy tiriltedi. Ǵasyrlardyń betin búrkegen qoıý tumandy alapat rýhymen túredi. Qaıǵy ákelgen qara bulttardy kún nuryndaı tilgilep jaryq álemge jol ashady. Oljastaı arýaqty erdiń, arqaly aqynnyń aýzyna sonda Qudaı «Azııa alaýlaryn» saldy. Bul jyr oǵan deıin tunshyqtyrylyp kelgen uly rýhtyń ábden pisip- jetilip, aspanǵa tik shanshylýy edi. О́ıtkeni aqynnyń ózi jyrlaǵandaı, jer betinde shyn tulparlar báıgesine jol qalmaǵandaı, baqsylyq saryndarǵa da bul jaqta keńistik qaldyrmaǵan edi.
Jer tósinen aspanǵa tik kóterilgen mundaı ǵalamat rýhtyń soıy Maǵjannyń «Paıǵambar» óleńinde kóringen. «Uzyn Oral – kún men tún shekarasy» jyrynda oıqastaǵan. Shákárimniń «Qorqyttyń saryny» jyrynda tóbe kórsetken. Sol alapat rýh tasqyny 1964 jyly Oljastyń qalamynan týǵanda, til jetkisiz, tek qana túısikpen sezinip biler mundaı gápti keńestik sanadaǵy adamdar túsinbeı ań-tań bolǵanyna kúmán joq. Bálkim soqyrdyń kúnge qaraǵanyndaı qubylys sonda ornaǵan shyǵar, kim bilipti? Gáp onda da emes, óleńniń tym alysty kórýinde. Oljasty oqysań, adamzat qaı jerden jaza basqany, kisi balasynyń kúmándi sapary, kúlli ıgilik úshin tuńǵysh ot jaqqan baqsylar men jaqsylardyń uly joryǵy eles beredi.
Aqyn baqsylar jaqqan otpen álemdi alastap, adamzat balasyn negizgi bastaý – izgilik jolyna túsirýdi kókseıdi. Uly Deshti qypshaq dalasynda bizdiń dáýirimizge deıin tańbalanyp qalǵan kúnbasty halyqtyń qadir-qasıeti sonda ǵana eptep-eptep eles berip, sanany túrtkileıdi. О́leń qudireti degenniń bir pushpaǵy osynda. Bireýler bar ómirin sarp ete júrip jetken ǵalamatty qııal áleminde somdap, kóz aldyna qoıa salady.
«...Baqsylardan – tabynǵanyń ot kúnge,
Baqsylardan – bıdaı, tary ektiń be?!
Baqsylardan – kúı men bı de ádemi,
Baqsylardan – dámi pisken ettiń de.
Sol baqsylar tas tapqandaı búırekten,
Almas izdep súldelerin súıretken.
Sol baqsylar qurbandyqqa shalynyp,
О́rt ishinde, basqalardy úıretken.
Sol baqsylar – oı-sezimdi túletken,
Sol baqsylar – elge ónerdi qul etken.
Kereńderden Bethovender týdyryp,
Gomerlerdi týdyrǵan da túnekten» (Qadyr Myrza Álıdiń aýdarmasy) dep ári qaraı jalǵasyp kete beredi. Árıne, bul óleńdi tarıhı sanasy kesilip, rýhanı tamyrynan ajyrap qalǵandarǵa túsindirýdiń qajeti joq. Kóne dáýirlerdiń rýhyn tula boıymen sezine almaǵan adam mundaı taqyrypqa qalam tarta almaıdy, arǵy túrikter týraly jaza almas edi ǵoı. Al baqsylar jaqqan otty Azııa alaýlaryna balap, álemdi alastaǵysy kelgen túısiktiń kúshine teń keler ne bar? Aqylǵa syıa bermeıtin qubylys. Jáne soǵan ılandyrý... Ol endi bizdiń túriksaryndy Oljas aqyn qolynan ǵana keldi.
Qazaq poezııasynda osy týyndynyń jalǵasyndaı taǵy bir týyndy Esenǵalı Raýshanovta bar. «Baqsy bılep júr. Janady jantaq qandaı qýrap turǵan, Sol otqa júgiredi ol zýlap qyrdan» dep bastalatyn óleńde de adam sengisiz qasıetter qylań urady. Oljekeń bolsa, sóz etip otyrǵan óleńdi ádemi túıindeıdi: «Olar bárin sizder úshin tutyndy, apıyndy kim ishse, sol tutyldy», dep baqsylar qasıet úshin jaqqan otty endi nasha retinde tutatyp lázzatqa bólengen jurt týraly sóz etedi. Aqyr sońynda: «Ot-alaýdy oılap tapqan baqsyny, tútin úshin órtedińder ózderiń», dep nasha tútini men saýdasyna tunshyqqandarǵa Azııasynyń kózimen alaryp qaraǵan aqynnyń oqty kózi áli kúnge álemge sol kúıi qadalyp turǵandaı.