Endi QR Premer-mınıstriniń qaraýyna ekonomıkalyq, qarjy, fıskaldyq jáne kedendik saıasat, memlekettik bıýdjetke qatysty strategııalyq máseleler, memleketaralyq qarym-qatynas máseleleri jáne halyqaralyq yntymaqtastyq, sheteldik ınvestısııalardy tartý jáne ınvestısııalyq ahýaldy jetildirý jáne basqalary kiredi.
Premer-mınıstrdiń birinshi orynbasary Asqar Mamınniń mindetterine ekonomıkany jáne aımaqtyq saıasatty jedel basqarý, qorshaǵan ortany qorǵaý, tabıǵı resýrstardy paıdalaný, qurylysty damytý jáne turǵyn úı-kommýnaldyq sharýashylyǵyn jańǵyrtý, kólik ınfraqurylymyn jáne logıstıkany damytý, energııa únemdeý jáne energııa tıimdiligin arttyrý, energııanyń jańartylatyn kózderi, kómir, atom ónerkásibi jáne ıadrolyq energetıkany damytý máseleleri bekitildi.
Sonymen qatar, ol tótenshe jaǵdaılarǵa jáne jumyldyrý jumystaryna, áskerı-ónerkásiptik keshendi, shaǵyn jáne orta bıznesti damytý, jylý berý maýsymdaryna daıyndyq jáne ony ótkizý, EKSPO-2017 halyqaralyq mamandandyrylǵan kórmesi máselelerine jáne basqalaryna jaýapty.
Premer-mınıstrdiń birinshi orynbasarynyń quzyretine sondaı-aq memleket-jekemenshik áriptestigin damytý, tabıǵı monopolııalardy retteý, básekelestikti damytý jáne tutynýshylardyń quqyqtaryn qorǵaý, uıymdar men memlekettik organdardyń taýarlardy, jumystar men kórsetiletin qyzmetterdi satyp alý kezinde qazaqstandyq qamtý úlesin ulǵaıtý boıynsha memlekettik saıasatty iske asyrý, ónerkásipti, ınnovasııalardy, tehnıkalyq retteý, elektr energetıkasy, geologııa jáne jer qoınaýyn paıdalaný, munaı hımııasy, aqparattyq tehnologııalar, týrızm, eksporttyq baqylaý jáne basqa máseleler kirdi.
Premer-mınıstrdiń orynbasary Imanǵalı Tasmaǵambetov bilim berý, ǵylym, densaýlyq saqtaý, áleýmettik jańǵyrtý, áleýmettik saıasat, jumyspen qamtý, din, sport, mádenıet, demografııa jáne kóshi-qon saıasaty, memlekettik aqparattyq saıasatty iske asyrýdy úılestirý jáne basqa máselelerdi qaraıtyn boldy.
Premer-mınıstrdiń orynbasary – QR aýyl sharýashylyǵy mınıstri Asqar Myrzahmetov agroónerkásiptik keshen, jer qatynastary, sý resýrstary, orman sharýashylyǵy, janýarlar álemi jáne basqa máselelerge jetekshilik etedi.
Al Premer-mınıstr keńsesiniń basshysy Erlan Qoshanov Premer-mınıstrdi jáne Úkimet basshylyǵyn aqparattyq-taldaý, quqyqtyq-uıymdastyrýshylyq, hattamalyq, qujattamalyq, materıaldyq-tehnıkalyq qamtamasyz etýdi júzege asyrady.
Premer-mınıstr Baqytjan Saǵyntaev tıisti qujatqa, ıaǵnı «Qazaqstan Respýblıkasy Premer-mınıstriniń 2016 jylǵy 5 tamyzdaǵy «Qazaqstan Respýblıkasynyń Premer-mınıstri, Qazaqstan Respýblıkasy Premer-mınıstriniń orynbasarlary jáne Qazaqstan Respýblıkasynyń Premer-mınıstri Keńsesiniń basshysy arasyndaǵy mindetterdi bólý týraly» ókimine ózgerister engizý týraly» ókimge qol qoıǵanyn búgin primeminister.kz habarlady.