El Úkimeti kásipkerlik qoǵamdastyqpen birlesip, shaǵyn jáne orta bıznesti qoldaý aıasyn keńeıtýge kiristi. Bul týraly Premer-mınıstr Oljas Bektenov Memleket basshysy Qasym-Jomart Toqaev tóraǵalyq etken Úkimettiń keńeıtilgen otyrysynda málimdedi, dep jazady Egemen.kz.
Premer-mınıstrdiń aıtýynsha, aldaǵy kezeńde ınfraqurylymdy jańǵyrtý men iri ónerkásiptik jobalardy iske asyrý negizgi basymdyq retinde saqtalady. Sonymen qatar mıkro jáne shaǵyn bıznesti qoldaýǵa aıryqsha mán beriledi.
«Ekonomıkalyq turaqtylyqty qamtamasyz etý týraly tapsyrmańyzǵa sáıkes, mıkro jáne shaǵyn bıznes sýbektilerine arnalǵan qarjylyq, qarjylyq emes jáne ınfraqurylymdyq qoldaý sharalaryn bir júıege keltiretin «Isker Aımaq» baǵdarlamasy bekitildi», dedi Oljas Bektenov.
«Isker aımaq» shaǵyn kásipkerlikti qoldaıdy
Otyrysta qoldanystaǵy quraldardyń shaǵyn jáne orta bıznestiń barlyq áleýetin ashýǵa jetkiliksiz ekeni de aıtyldy. Osyǵan baılanysty Úkimet bıznes qaýymdastyqpen birlesip, qosymsha qarjylyq jáne retteýshilik sharalardy ázirlep jatyr. Sonyń ishinde negizgi baǵyttardyń biri retinde shaǵyn jáne orta kásiporyndardy zamanaýı jabdyqtarmen qaıta jaraqtandyrý baǵdarlamasy ataldy.
Atalǵan bastama «Báıterek» holdıngi arqyly iske aspaq. Arnaıy baǵdarlama kásipkerlerge 10 kún ishinde qosymsha kepilsiz, jeńildikti nesıe esebinen zamanaýı stanoktar satyp alýǵa múmkindik beredi. Bul óz kezeginde bıznestiń básekege qabilettiligin arttyryp, tozǵan materıaldyq-tehnıkalyq bazany jańartýǵa jol ashady.
«Báıterek» – ekonomıkalyq ornyqty damýdyń draıveri
Sondaı-aq Memleket basshysynyń Ulttyq quryltaı otyrysynda aıtqan ustanymyn eskere otyryp, jańa Salyq kodeksindegi ózgeristerdiń birqalypty engizilýine basymdyq beriledi. Úkimet salyqtyq retteýdi jetildirýge qatysty bıznes ókilderiniń syndarly usynystaryn nazarda ustaıtynyn jetkizdi. Buǵan deıin 2026 jyldyń 1 qańtaryna deıin barlyq salyqtyq tekserýdi toqtatý týraly sheshim qabyldanǵan. Sonymen qatar bıyl mıkro jáne shaǵyn bızneske jol berilgen zańbuzýshylyqtar úshin jaýapkershilik sharalary qoldanylmaıdy.
Resmı derekterge súıensek, 2025 jyldyń qorytyndysy boıynsha elde jumys istep turǵan shaǵyn jáne orta bıznes sýbektileriniń sany 5 paıyzǵa ósip, 2,2 mln kásiporynnan asty. Bul sektorda jumyspen qamtylǵandar sany 3,9 paıyzǵa artyp, 4,5 mln adamǵa jetken. Atalǵan kórsetkish jalpy jumyspen qamtylǵandardyń shamamen 46 paıyzyna, al ekonomıkalyq belsendi halyqtyń jartysyna jýyǵyna teń.
Shaǵyn jáne orta bıznes qoldaýdan kende emes
Shaǵyn jáne orta bıznestiń jalpy ishki ónimdegi úlesi 40,5 paıyzdy qurap, óndirilgen ónim kólemi shamamen 73 trln teńgege jetken. Úkimet bul kórsetkishterdi odan ári arttyrý úshin qoldaý sharalary júıeli túrde jalǵasa beretinin atap ótti.