26 qazanda saǵat 19:00-de Túrkııa Respýblıkasynyń Qazaqstan Respýblıkasyndaǵy elshiligi, Astana qalasyndaǵy Iýnýs Emre atyndaǵy túrik mádenıet ortalyǵy men Túrik yntymaqtastyq jáne úılestirý agenttiginiń (TIKA) Astana koordınatorlyǵynyń birlese uıymdastyrýymen baýyrlas el Qazaqstan Respýblıkasynyń táýelsizdiginiń 25 jyldyǵyna oraı «Túrkııa kúnderi» sharasy aıasynda «Qazaqstan –Túrkııa Dostyq áýenderi» konserttik baǵdarlamasy ótedi.
Túrkııa – Qazaqstannyń táýelsizdigin birinshi bolyp tanyǵan tatý kórshi, tabysty áriptes. Barlyq salada baılanysy berik baýyr el. Túrkııa eliniń ónerpazdary memleket egemendiginiń jıyrma bes jyldyq uly toıyn umytpaı, quttyqtaý tilekterin aıtyp, ór ónerin tartý etýge kelmek.
Merekelik keshte Túrkııa eliniń tanymal ánshileri Chıdem Gıýrdal, Djem Gıýrdal, Mýstafa Eke jáne Túrki álemi mýzykalyq ansambli bizge baýyrlas eldiń baı mádenıetin, tunyq týyndylaryn usynady.
Shara barysynda Túrkııa ánshilerimen qatar Qazaqstan ánshileri de óner kórsetedi. Olar Dımash Qudaıbergenov, Gúlnur Orazymbetova, Kamshat Joldybaeva, Shaharızat Seıdahmet, Hanzada toby jáne tanymal qobyzshy Aqerke Tájibaeva. Sondaı-aq kesh barysynda Qazaqstan men Túrkııa elderiniń dostyq ánin tyńdaýǵa kelgen ár qurmetti qonaqqa lotoreıa taratylyp, konsertte oınatylady. Iаǵnı, ár kórermenniń Túrkııaǵa tegin joldamany utyp alý múmkindigi bar.