Aqtóbeniń shaǵyn munaı óńdeý zaýyttary munaıdy eksporttyq baǵamen satyp alýǵa daıyn. Bul týraly búgin Úkimettiń selektorlyq rejimdegi otyrysynda Aqtóbe oblysynyń ákimi Berdibek Saparbaev málim etti.
«Bizdiń oblystyń aýmaǵynda 5 shaǵyn munaı óńdeý zaýyty bar. Jyldyq munaı óńdeý qýaty 675 myń tonnany quraıdy. О́kinishke oraı búgingi kúni olardyń júktelimi 4-15 paıyzǵa ǵana teń. Sizden Energetıka mınıstrligine bizben jáne basqa da múddeli memlekettik organdarmen birge bul máseleni qarastyrýdy tapsyrýyńyzdy suraımyz. Eger bul zaýyttar tolyq qýatynda jumys isteıtin bolsa, onda biz ózimizdi janar-jaǵarmaımen tolyq qamtamasyz etetin edik. Bizge janar-jaǵarmaı satyp alýǵa jylyna 200 myń tonna kvota beriledi. Al bizdiń qajettiligimiz 280 myń tonna. Aıyrmasyn reseılikterden satyp alamyz. Ekinshiden keminde 700 jańa jumys orny ashylar edi. 1,7 mlrd. teńge kóleminde qosymsha salyq túsedi», - dedi Saparbaev Úkimet basshysy Baqytjan Saǵyntaevqa qarata.
Onyń aıtýynsha, aqtóbelik munaı óńdeý zaýyttary munaıdy eksportqa shyǵarylatyn baǵamen satyp alýǵa da daıyn.
Osy rette Premer-Mınıstr Energetıka vıse-mınıstri Maǵzum Myrzaǵalıevten túsinik berýdi surady.
«Ishki naryqqa munaı jetkizýge qatysty aıtar bolsam, búgingi kúni úsh zaýytymyzdy ónimmen qamtamasyz etýde problemaǵa dýshar bolyp otyrmyz. Eshkim de óz erkimen zaýyttarǵa barǵysy kelmeıdi. Soǵan sáıkes ishki baǵamen kvota boıynsha jetkizetin bolsaq, bizdiń jer qoınaýyn paıdalanýshylar narazylyq tanytady. О́kinishke oraı biz bul jaǵdaıdy sheshe almaımyz. Egerde Berdibek Máshbekuly kóterip otyrǵandaı munaıdy eksporttyq baǵamen jetkizýge kelsek, biz onymen jer qoınaýyn paıdalanýshylarmen birge aınalysýǵa daıynbyz», - dedi vıse-mınıstr.
Osy oraıda Premer-Mınıstr Energetıka mınıstrliginiń Aqtóbe oblysynyń ákimdigimen birlesip, bul máseleni qarastyrýdy tapsyrdy.