Tallınde ekonomıkalyq jáne ǵylymı-tehnıkalyq yntymaqtastyq jónindegi Qazaqstan-Estonııa úkimetaralyq komıssııanyń (ÚAK) 5-shi otyrysy ótti, - dep habarlaıdy egemen.kz Premer-Mınıstrdiń resmı saıtyna silteme jasap.
ÚAK-tiń qazaqstandyq bóligin Qazaqstan Respýblıkasy syrtqy ister mınıstriniń orynbasary Roman Vasılenko, estondyq bóligin Estonııa Respýblıkasy syrtqy ister mınıstrliginiń vıse-kansleri Vıaıno Reınart basqardy.
Taraptar ınvestısııalyq jáne tranzıttik-kólik salalaryndaǵy, agroónerkásip salasyndaǵy, aýyl sharýashylyǵy ónimderin óńdeý, qurylys jáne týrızmdegi ózara is-qımyl bolashaǵyn talqylady. Aqparattyq tehnologııalardy engizý, bilim jáne ǵylym, densaýlyq saqtaý salalaryndaǵy yntymaqtastyqtyń edáýir damý áleýeti atap ótildi.
V. Reınart óz sózinde Qazaqstan Estonııa úshin óńirdegi mańyzdy saýda-ekonomıkalyq áriptes bolyp tabylatynyn málimdedi. Ekonomıkalyq qarym-qatynastardy talqylaý sheńberinde negizgi taqyryp retinde tranzıttik-kólik salasynda ózara is-qımyl ornatý usynyldy. Estondyq tarap «Jibek joly ekonomıkalyq beldeýi» tujyrymdamasy aıasynda birlesken jobalardy iske asyrý úshin óz eliniń port jáne temirjol qýattylyqtaryn paıdalaný múmkindikterimen tanystyryp ótti.
О́z kezeginde, R. Vasılenko Estonııamen qarym-qatynasty jan-jaqty damytý mindetin eýropalyq baǵyttaǵy mańyzdy mindetterdiń qataryna jatqyzatynymyzdy atap ótti. Estonııa Qazaqstan men EO arasyndaǵy, ásirese ekonomıkalyq salada qosymsha baılanystyrýshy býyn bola alady.
Qazaqstandyq dıplomattyń aıtýy boıynsha, eýrazııalyq keńistikte jańa tranzıttik-kólik dálizderiniń, magıstraldy baǵdarlardyń ashylýy osy maqsatqa yqpal etýi múmkin.
Taraptar bilim jáne ǵylym salasyndaǵy yntymaqtastyq, sondaı-aq eki eldiń joǵarǵy oqý oryndarynyń ózara is-qımyly týraly kelisimderdi iske asyrýdaǵy ózara jetistikterin atap ótti. Odan basqa, Qazaqstan men Estonııanyń birlesken jobalarǵa, ásirese IT-tehnologııalardy engizý salasyndaǵy baǵdarlamalarǵa qatysatyn joǵarǵy oqý oryndarynyń stýdentteri men oqytýshylarynyń sanyn odan ári ulǵaıtý oryndylyǵy da atap ótildi.
Týrızmdi damytý múmkindikterin talqylaı otyra, R. Vasılenko ekonomıkanyń osy salasy úshin EKSPO-2017 halyqaralyq mamandandyrylǵan kórmesiniń mańyzdylyǵyn atap ótip, Qazaqstanda ázirlengen, Qazaqstannyń áleýmettik-ekonomıkalyq jáne týrıstik áleýetimen tanystyratyn «Qazaqstan – Uly dala eli» atty qosymshamen tanystyrdy.
Otyrys qorytyndysy boıynsha, ekijaqty yntymaqtastyqtyń bolashaq baǵyttaryn kórsetetin hattamaǵa qol qoıyldy.